பொருளாதார வங்குரோத்து நிலையில் மக்களுக்கு நிவாரணம் வழங்கப்படும் என பொய் கூற முடியாது – சஜித்
நாடு எதிர்நோக்கும் பொருளாதார வங்குரோத்து நிலையில் மக்களுக்கு திடீரென நிவாரணம் வழங்கப்படும் என பொய் கூற முடியாது என எதிர்க்கட்சித் தலைவர் சஜித் பிரேமதாஸ தெரிவித்துள்ளார்.
பிரஜைகள் போராட்டத்தை பிரதிநிதித்துவப்படுத்தும் குழுக்களுக்கும் எதிர்க்கட்சித் தலைவர் சஜித் பிரேமதாசவுக்கும் இடையிலான விசேட சந்திப்பொன்று இன்று (திங்கட்கிழமை) காலை கொழும்பிலுள்ள எதிர்க்கட்சித் தலைவர் அலுவலகத்தில் இடம்பெற்றது.
இதனையடுத்து, ஊடகங்களுக்கு கருத்து தெரிவிக்கும்போதே அவர் இவ்வாறு தெரிவித்துள்ளார்.
இதன்போது மேலும் உரையாற்றிய எதிர்க்கட்சித் தலைவர், “குறிப்பிட்ட வேலைத்திட்டத்தின் இலக்குகளை அடைவதற்கு இடைக்கால அரசாங்கம் அமைக்கப்பட வேண்டும்.
இடைக்கால அரசாங்கங்களுக்கு செயற்பாட்டாளர்கள் திகதிகளை நிர்ணயித்திருந்தாலும் குறித்த காலத்திற்குள் இலக்குகளை அடைய முடியாவிட்டால் அந்த அரசாங்கமும் தோல்வி அடையும்.
இந்தக் கொள்கையில் எங்களுக்குப் பெரிய பிரச்சினை இல்லை. மேலும் இதில் இன்னொரு விஷயமும் இருக்கிறது என்பதை நான் உங்களுக்குச் சொல்ல விரும்புகிறேன்.
நாடு பொருளாதார திவால் நிலையில் இருக்கும் நேரத்தில் மக்களுக்கு ஒரே நேரத்தில் நிவாரணம் கிடைக்கும் என என்னால் பொய் சொல்ல முடியாது.
மனிதனின் அடிப்படைத் தேவைகளான எரிவாயு, எண்ணெய், உரம், பால் பவுடர், அத்தியாவசிய உணவுகளை வழங்குவதில் கவனம் செலுத்துகிறோம்.
உண்மையில் நாடு முழுவதும் திவாலாகி விட்டது. இன்று நாடு நிதி ரீதியாக பூஜ்ஜியத்திற்கு கீழே உள்ளது. அதுதான் உண்மைக் கதை.
எனவே இவற்றை முறையாகச் செய்ய வேண்டும். அது நானோ நாமோ எடுத்த முடிவுகளால் அல்ல.
நீதியை அடைவதற்கு மக்களுக்கு நிதி பலம் வேண்டும். இந்த நாட்டில் மனிதாபிமான பொருளாதார நிர்வாகமும் நடக்க வேண்டும் என்பதில் நான் உறுதியாக உடன்படுகிறேன். சமநிலையான பொருளாதார நிர்வாகத்தை எதிர்பார்க்கிறோம்.
இது மிகவும் குழப்பமான சூழ்நிலை. ஆனால் இதை சிரமத்துடன் நிர்வகிக்கும் திறன் எங்களிடம் உள்ளது” என அவர் மேலும் தெரிவித்துள்ளார்.
