வருத்தப்படாத வாலிபர் சங்கம் தவசி காலமானார்!

ரஜினி முருகன், வருத்தப்படாத வாலிபா் சங்கம் உள்ளிட்ட படங்களில் நடித்துப் புகழ்பெற்ற நடிகர் தவசி, ரஜினிகாந்த் நடிப்பில் வெளிவரவிருக்கும் அண்ணாத்த படத்திலும் நடித்துள்ளாா். குடல் புற்றுநோயால் பாதிக்கப்பட்டுள்ள இவர் போதிய பணமின்றி சிகிச்சையைத் தொடர முடியாத நிலை ஏற்பட்டது. இதனால், மிகவும் உடல்நிலை பாதிக்கப்பட்டாா். 

இதனிடையே தனக்கான மருத்துவச் சிகிச்சைக்கும், வறுமையில் வாடும் தனது குடும்பத்தினருக்கும் நிதியுதவி கோரிய விடியோ ஒன்று சமூகவலைதளங்களில் பரவியது. இதையறிந்த திருப்பரங்குன்றம் தொகுதி திமுக எம்.எல்.ஏ. பா. சரவணன், தனது மருத்துவமனையில் வைத்து தனது சூர்யா தொண்டு நிறுவனத்தின் மூலம் நடிகா் தவசிக்கு இலவசமாக சிகிச்சையளித்து வந்தார்.  

உடல் மெலிந்து ஆளே அடையாளம் தெரியாமல் மாறிப்போய் உள்ள தவசியின் புகைப்படமும் சமூக வலைத்தளத்தில் வைரலாகி பெரும் சோகத்தை ஏற்படுத்தியது. நடிகர் தவசிக்கு சக நடிகர்கள் ரஜினிகாந்த், சிம்பு, சிவகார்த்திகேயன், சூரி, விஜய் சேதுபதி உள்ளிட்டவர்கள் நிதி அளித்து உதவி புரிந்தனர்.   

இந்த நிலையில், புற்றுநோய்க்கு சிகிச்சை பெற்று வந்த நடிகர் தவசி காலமானார். மதுரையில் தனியார் மருத்துவமனையில் சிகிச்சை பெற்று வந்த அவர் சிகிச்சை பலனின்றி உயிரிழந்தார். அவருக்கு வயது 60. தவசியின் மறைவையடுத்து, அவருக்கு திரைத்துறையினர் இரங்கல் தெரிவித்து வருகின்றனர்.