பதவி விலக மாட்டேன் : அடம்பிடிக்கும் ட்ரம்ப்

அமெரிக்காவில் வரும் நவம்பர் 3ஆம் தேதியன்று அதிபர் தேர்தல் நடைபெறவிருக்கிறது. இதில் ரிபப்ளிகன் கட்சி சார்பில் தற்போதைய அதிபர் டொனால்ட் ட்ரம்ப் மீண்டும் போட்டியிடுகிறார். அவரை எதிர்த்து டெமாக்ட்ரடிக் கட்சி வேட்பாளராக முன்னாள் துணை அதிபர் ஜோ பைடன் போட்டியிடுகிறார். 

  இந்நிலையில், இரு வேட்பாளர்களுக்கும் இடையேயான நேரடி விவாதம் நேற்று முன் தினம் (செப்டம்பர் 29) தொடங்கியது. முதல் நாள் விவாதத்தில் இரு வேட்பாளர்களும் ஒருவரை ஒருவர் மிக கடுமையாக தாக்கி பேசினர். அரசியல் கடந்து இருவரும் குடும்பத்தை இழுத்து பேசும் அளவுக்கு இறங்கிவிட்டனர். 

 இதையடுத்து நேற்று இரண்டாம் விவாதம் நடைபெற்றது. இதில், அதிபர் தேர்தல் முடிவுகளை டொனால்ட் ட்ரம்ப் ஏற்றுக்கொள்வாரா என்று அவரிடம் கேள்வியெழுப்பப்பட்டது. அதற்கு, தபால் வாக்குகளில் மோசடி செய்யப்பட்டால் பதவி விலக முடியாது என்று ட்ரம்ப் தெரிவித்துள்ளார்.   

ட்ரம்ப் பதிலளித்தபோது, “பல்லாயிரம் தபால் வாக்குகள் மோசடி செய்யப்படுவது தெரியவந்தால் நான் தேர்தல் முடிவுகளை ஏற்றுக்கொள்ள மாட்டேன். இது நீங்கள் இதற்கு முன் எப்போதும் பார்த்திராத அளவுக்கும் பெரும் மோசடி” என்று தெரிவித்துள்ளார். மேலும், முதல் விவாதத்தில் தான் வெற்றிபெற்றுவிட்டதாகவும் ட்ரம்ப் தெரிவித்துள்ளார்.  

 இதற்கு பதிலளித்த ஜோ பைடன், “அடுத்த அதிபர் யார் என்பதை அமெரிக்க மக்கள்தான் முடிவு செய்வார்கள்” என்று தெரிவித்தார். தேர்தல் நெருங்கி வரும் சூழலில், தேசிய அளவிலான கருத்துக் கணிப்புகளில் ஜோ பைடன் முன்னிலையில் இருக்கிறார்.   

  மறுபுறம், கொரோனா பாதிப்புக்கு இடையே ஏராளமானோர் தபால் முறையில் வாக்களிக்க தேர்வு செய்துள்ளனர். ஆனால், தபால் வாக்குகளை டொனால்ட் ட்ரம்ப் தொடர்ந்து எதிர்த்து வருகிறார். தபால் வாக்குகளில் மோசடி நடக்கக்கூடும் என்று ட்ரம்ப் தொடர்ந்து புகார் கூறி வருகிறார்.