தேர்தல்கள் ஆணைக்குழு தலைவர் வேண்டுகோள்.!
விகிதாசார முறையின் கீழ் உள்ளூராட்சி மன்றங்களுக்காக பெயரிடப்பட்டுள்ள பிரதிநிதிகளின் பெயர் பட்டியலை எதிர்வரும் மார்ச் 2 ஆம் திகதி அல்லது அதற்கு முன்னர் பெற்றுத்தர வேண்டும் என அரசியல் கட்சிகளிடம் தேர்தல்கள் ஆணைக்குழுத் தலைவர் மஹிந்த தேசப்பிரிய வேண்டுகோள் விடுத்துள்ளார்.
இராஜகிரியவில் அமைந்துள்ள தேர்தல்கள் செயலத்தில் நேற்று மாலை இடம்பெற்ற ஊடக சந்திப்பில் கலந்து கொண்டு கருத்துத் தெரிவிக்கும் போதே தெரிவித்துள்ளார்.
மேலும் தெரிவிக்கையில்.
நடைபெற்று முடிந்துள்ள உள்ளூராட்சி மன்றத் தேர்தலின் பின்னர் பெண் பிரதிநிதித்துவம் குறித்து பல்வேறு கருத்துக்கள் முன்வைக்கப்பட்டுள்ளன. உள்ளூராட்சி மன்றத் தேர்தலில் பெண் பிரதிநிதித்துவம் குறித்து சர்ச்சைகள் எழுந்துள்ளன. சட்ட திருத்தங்கள் குறித்து குழப்பகரமான செய்திகள் வெளிவருகின்றன.
எனினும் தேர்தல் பிரதி நிதித்துவத்தின் தீர்வுகள் குறித்தே நாம் செயற்பட்டு வருகின்றோம். அந்த வகையில் அனைத்து சபைகளிலும் 25 வீத பெண் பிரதிநிதித்துவம் கிடைக்கவில்லை. பெண் பிரதிநிதித்துவம் இல்லாத காரணத்தினால் சபைகளை அமைக்காமல் இருக்கவும் முடியாது.
ஆகவே சில வட்டாரங்களில் குறித்த ஒரு கட்சி சகல ஆசனங்களையும் வெற்றி பெற்றுள்ள நிலையில் அந்த கட்சியின் மூலம் 10 வீதமான பெண் பிரதிநிதித்துவமே உள்ளடக்கப்படும். இது சிறு கட்சிகள் குறைந்த ஆசனங்களை பெற்றுக்கொண்ட கட்சிகள் குழுக்கள் ஏற்றுக்கொள்ள வேண்டும்.
மேலும் மட்டக்களப்பு - மண்முனைப்பற்று பிரதேச சபை விசித்திரமான பிரதேச சபை, அந்த பிரதேச சபையில் பெண் பிரதிநிதி ஒருவராயினும் இல்லை. ஆகவே இவற்றினை எல்லாம் கருத்திற் கொண்டு நாம் செயற்பட வேண்டும்.
மேலும் விகிதாசார முறையின் கீழ் உள்ளூராட்சி மன்றங்களுக்காக பெயரிடப்பட்டுள்ள பிரதிநிதிகளின் பெயர் பட்டியலை எதிர்வரும் மார்ச் மாதம் 2 ஆம் திகதி அல்லது அதற்கு முன்னர் பெற்றுத்தர வேண்டும். இவற்றினை அரசியல் கவனத்தில் எடுத்துச் செயற்படுமாறு தெரிவித்துள்ளார்.
