ஜனவரி 6 இல் கூட்டமைப்பின் ஒருங்கிணைப்புக்குழுக்கூட்டம்
தமிழ்த் தேசியக் கூட்டமைப்பின் ஒருங்கிணைப்புக் குழு கூட்டம் எதிர்வரும் ஜனவரி மாதம் ஆறாம் திகதி நடைபெறவுள்ளது. கொழும்பில் அமைந்துள்ள எதிர்க்கட்சித்தலைவரின் காரியாலயத்தில் மாலை 4.30 மணிக்கு இக் கூட்டம் இடம்பெறவுள்ளது.
எதிர்க்கட்சித்தலைவரும் தமிழ்த் தேசியக் கூட்டமைப்பின் தலைவருமான இரா.சம்பந்தன் தலைமையில் நடைபெறும் கூட்டத்தில் தமிழ்த் தேசியக் கூட்டமைப்பில் அங்கம் வகிக்கும் பங்காளிக்கட்சிகளின் தலைவர்கள், செயலாளர்கள் உட்பட கட்சியின் முக்கியஸ்தர்கள் பங்கேற்கவுள்ளனர்.
முன்னதாக தமிழ்த் தேசியக் கூட்டமைப்பின் ஒருங்கிணைப்புக்குழு கூட்டம் மாதமொருமுறை நடைபெறுவதாக தீர்மானிக்கப்பட்டிருந்தபோதும் அவ்வாறான நடைமுறை பின்னபற்றவில்லை என்பதைச் சுட்டிக்காட்டி தமிழ்த் தேசியக் கூட்டமைப்பின் வன்னி மாவட்ட பாராளுமன்ற உறுப்பினர் சிவசக்தி ஆனந்தன் எதிர்க்கட்சித்தலைவரும் தமிழ்த்தேசியக் கூட்டமைப்பின் தலைவருமான இரா.சம்பந்தனுக்கு அவசர கடிதமொன்றை அனுப்பி வைத்திருந்தார்.
இந்நிலையிலேயே குறித்த கூட்டம் நடத்தப்படவுள்ளது. மேலும் எதிர்வரும் ஜனவரி மாதம் 8ஆம் திகதி கூட்டமைப்பின் பாராளுமன்றக் குழுக் கூட்டம் இடம்பெறுவதற்கு முன்னதாக இந்த ஒருங்கிணைப்புக் குழு கூட்டம் நடைபெறவுள்ளமையும் குறிப்பிடத்தக்கது.
