தமிழர்களின் பிரச்சினைகளை வெளிச்சத்துக்கு கொண்டுவந்தவர் பிரபாகரனே..!!
பிரபாகரனே தமிழ் மக்களின் பிரச்சினைகளை வெளிச்சத்துக்கு கொண்டுவந்தவர். அவர் மீது தமிழ் மக்களுக்கு இருக்கும் மரியாதையை ஒருபோதும் இல்லாமலாக்க முடியாது. அதனடிப்படையிலேயே விஜயகலா மகேஸ்வரனும் பிரபாகரன் தொடர்பில் கருத்து தெரிவித்துள்ளார் என நவ சமசமாஜ கட்சியின் தலைவர் விக்ரமபாகு கருணாரத்ன தெரிவித்தார்.
நவ சமசமாஜ கட்சி காரியாலயத்தில் நேற்று நடைபெற்ற செய்தியாளர் சந்திப்பின்போது விடுதலைப்புலிகளின் தலைவர் பிரபாகரன் உயிருடன் இருந்திருந்தால் பிரதமராகியிருப்பார் என இராஜாங்க அமைச்சர் விஜயகலா மகேஸ்வரன் தெரிவித்துள்ள கருத்து தொடர்பாக ஊடகவியலாளர் ஒருவரினால் கேட்கப்பட்ட கேள்வியொன்றுக்கு பதிலளித்து உரையாற்றுகையிலேயே அவர் இவ்வாறு தெரிவித்தார்.
அவர் மேலும் கூறுகையில்,
பிரபாகரனின் நடவடிக்கைகள் தொடர்பில் பெரும்பான்மையான தமிழ் மக்களுக்கு இணக்கப்பாடு இல்லாவிட்டாலும் அவர்மீது மரியாதை இருந்து வருகின்றது. ஏனெனில் பிரபாகரன் குறிப்பாக வடக்கு, கிழக்கு தமிழ் மக்கள் எதிர்கொண்டு வந்த பிரச்சினைகளை வெளிச்சத்துக்கு கொண்டுவந்தார். அதனால் அவர் மீது தமிழ் மக்கள் வைத்திருக்கும் மரியாதையை யாராலும் நிறுத்த முடியாது. அத்துடன் தமிழ் மக்கள் அவர் மீது மரியாதை செலுத்துவதால் எந்த பிரச்சினையும் ஏற்படப்போவதுமில்லை.
பிரபாகரனை யாரேனும் புகழ்ந்தாலோ அல்லது உயர்த்தி பேசினாலோ அதற்காக அவர்கள் பிரபாகரனின் வழியை பின்பற்றி செல்கின்றவர்கள் என்று கருத்து கொள்ள முடியாது. பொதுவாக எங்களுக்கு எதிர் கருத்துடையவர் மரணித்தால் நாங்கள் அவருடைய கொள்கையை நிராகரித்தாலும் அவர் தொடர்பிலான நல்லெண்ணங்களை வெளிப்படுத்துவது சாதாரண விடயம். அதனடிப்படையிலேயே விஜயகலா மகேஸ்வரனும் பிரபாகரன் தொடர்பில் வைத்திருக்கும் மரியாதையிலேயே இவ்வாறு கருத்து தெரிவித்துள்ளார்.
அத்துடன் விஜயகலா மகேஸ்வரன் பிரபாகரன் தொடர்பில் கருத்து தெரிவித்தார் என்பதற்காக அவர் பிரபாகரன் வழியில் செல்லப்போவதாக ஒருபோதும் தெரிவித்திருக்கவில்லை. அவ்வாறு தெரிவித்திருந்தால் அதனை அரசியல் பிரச்சினையாக தெரிவிக்கலாம். ஆனால் அவ்வாறு எதுவும் நடைபெறவில்லை. அத்துடன் இதில் பிரச்சினைப்படுத்துவதற்கும் எந்த விடயமும் இல்லை என்றார்.
