மீண்டும் வந்த ஆவா குழு,பிரபாகரன் படை - பின்னணியில் யார்?
மாணவர்களின் மரணத்துக்கு தமிழ்ப் பொலிஸாரே
காரணம் என்பதை வலியுறுத்தும் வகையிலும், அவர்களை இனவிரோதிகளாகவும், சமூக விரோதிகமாணவர்களின் மரணத்துக்கு தமிழ்ப் பொலிஸாரே காரணம் என்பதை வலியுறுத்தும் வகையிலும், அவர்களை இனவிரோதிகளாகவும், சமூக விரோதிகளாகவும் காண்பிக்க முனைந்திருந்தது அந்தத் துண்டுப் பிரசுரம். ளாகவும் காண்பிக்க முனைந்திருந்தது அந்தத் துண்டுப் பிரசுரம்.
யாழ்ப்பாணத்தில் மீண்டும் ஆவா குழு பற்றிய பீதி கிளப்பி விடப்பட்டிருக்கிறது. கொக்குவில் குளப்பிட்டிச் சந்தியருகே, யாழ். பல்கலைக்கழக மாணவர்கள் இருவர் பொலிசாரால், கொல்லப்பட்டு இரண்டு நாட்கள் கழித்து சுன்னாகத்தில் தேசிய புலனாய்வுப் பிரிவைச் சேர்ந்த இரண்டு பொலிசார் மீது வாள்வெட்டு மேற்கொள்ளப்பட்டது.
அந்தச் சம்பவத்துக்கு உரிமை கோரிக் கொண்டே ஆவா குழு மீண்டும் வெளியே வந்திருக்கிறது.
அதுவும், இதுவரை காலமும், வெறும் வாள்வெட்டு, கொள்ளைகள் போன்ற சமூக விரோத செயல்களின் அடையாளமாகவே பார்க்கப்பட்டு வந்த இந்தக் குழு, முதல் முறையாக உரிமை கோரும் துண்டுப் பிரசுரங்களை பரவலாக விநியோகித்து, தமக்கும் ஒரு அரசியல், சமூக நோக்கம் இருக்கிறது என்று காண்பிக்க முனைந்திருக்கிறது.
யாழ். பல்கலைக்கழக மாணவர்கள் படு கொலை செய்யப்பட்ட சம்பவம் பொலிசாரின் அப்பட்டமான மனித உரிமை மீறல், அராஜகம் என்பதை அனைவரும் ஏற்றுக் கொண்டாலும், அதற்காக பொலிசாரைப் பழிவாங்க வேண்டும் என்ற சிந்தனை மாணவர்கள் உள்ளிட்ட தரப்பினரிடம் ஏற்பட்டிருக்கவில்லை.
அதனால் தான், அமைதியான முறையில் போராட்டங்கள் நடத்தப்பட்டு, எதிர்ப்பும் கண்டனமும் வெளியிடப்பட்டது.
ஆனால், திடீரென பொலிசார் மீது வாள்வெட்டு ஒன்றை மேற்கொண்டு விட்டு, அதனை மாணவர்களின் கொலைக்கான பதிலடி என்று ஆவா குழு துண்டுப் பிரசுரங்களை விநியோகித்து, கவனத்தை திசை திருப்ப முயன்றது.
கடந்த 22 ஆம் திகதி, சுன்னாகம் சந்தியில் உள்ள வர்த்தக நிலையம் ஒன்றுக்கு முன்பாக, இலக்கத்தகடு இல்லாத மோட்டார் சைக்கிள்களில் வந்த, முகத்தை மூடி மறைத்திருந்த ஆறு பேர் சிவில் உடையில் நின்ற தேசிய புலனாய்வுப் பிரிவு பொலிசார் மீது வாள்வெட்டு தாக்குதலை நடத்தியிருந்தனர்.
இதில்,சார்ஜன்ட் நவரட்ன, கான்ஸ்டபிள் ஹேரத் ஆகிய இரண்டு பொலிசாரும் காயமடைந்தனர். எனினும் இந்தக் காயங்கள் பாரதூரமானவை அல்ல.
ஆறு பேர் கொண்ட அந்த வாள்வெட்டுக் குழு, பதிலடி நடவடிக்கையாக பழிவாங்க வேண்டும் என்று செயற்பட்டிருந்தால், இரண்டு பொலிசாரையும் மோசமாக வெட்டிக் காயப்படுத்தியிருக்க முடியும். அல்லது அவர்களை கொன்றிருக்கவும் முடியும். அவர்கள் அவ்வாறு செய்யவில்லை. சிறிய காயப்படுத்தல் நடவடிக்கை ஒன்றைத் தான் மேற்கொண்டிருந்தனர்.
அவர்களுக்கு அங்கு தேவைப்பட்டது, பொலிசார் வெட்டப்பட்டு இரத்த வெள்ளத்தில் துடிப்பதோ, உயிர்ப்பலி எடுப்பதோ அல்ல.
அதன் பின்னர் துண்டுப்பிரசுரம் ஒன்றை வெளியிடும் இலக்கில் தான் இந்தச் சம்பவம் நிகழ்த்தப்பட்டிருக்கிறது. இதற்குப் பின்னர் தான், யாழ். நகரை அண்டிய பகுதிகளில், இலக்கத்தகடு இல்லாத மோட்டார் சைக்கிள்களில் வந்த மர்மநபர்கள், ‘அசுத்தங்கள் அகற்றப்படும்’ என்ற தலைப்பில் ஆவா குழுவின் பெயரால் துண்டுப் பிரசுரங்களை வீசியிருந்தனர்.
அதிலேயே மாணவர்களின் கொலைகளுக்கு பதிலடியாக தாமே சுன்னாகத்தில் பொலிசார் மீது வாள்வெட்டு மேற்கொண்டதாக உரிமை கோரப்பட்டிருந்தது.
அந்த துண்டுப் பிரசுரம் ஆவா குழுவுக்கு மீண்டும் உயிர் கொடுக்கும் நோக்கத்தை மாத்திரமன்றி, வடக்கில் தமிழ்ப் பொலிசாரின் செயற்பாடுகளை முடக்குவதற்கான உள்நோக்கத்தையும் கொண்டிருந்தது.
மாணவர்களின் மரணத்துக்கு தமிழ்ப் பொலிசாரே காரணம் என்பதை வலியுறுத்தும் வகையிலும், அவர்களை இனவிரோதிகளாகவும், சமூக விரோதிகளாக வும் காண்பிக்க முனைந்திருந்தது அந்த துண்டுப் பிரசுரம்.
அதற்கும் அப்பால், இவர்கள் தம்மால் தண்டிக்கப்படுவார்கள் என்ற எச்சரிக்கையும் விடுக்கப்பட்டிருந்தது. அதுமாத்திரமன்றி தமிழீழம், கலாசார பூமி, சமூக சீரழிவு போன்ற வார்த்தையாடல்களின் ஊடாக தமிழ் மக்களின் கவனத்தை ஈர்ப்பதற்கு முயற்சிக்கப்பட்டிருந்தது.
ஆவா குழுவை சமூக விரோதக் குழு வாக பொலிசாரும் ஊடகங்களும் அடையாளப்படுத்தி விட்டதாகவும், ஆனால், பெண்களுக்கு எதிரான வன்முறைகளுக்கு எதிராகவே பெரும்பாலான வாள்வெட்டுகள் தம்மால் மேற்கொள்ளப்பட்டதாகவும் அந்த துண்டுப் பிரசுரத்தில் கூறப்பட்டிருந்தது.
இதுவரை இதற்கு தாம் உரிமை கோரவில்லை என்றும் இனிமேல் சமூக சீரழிவுகளுக்கு எதிராக மேற்கொள்ளப்படும் நடவடிக்கைகள் தொடர்பாக வெளிப்படுத்துவோம் என்றும் ‘ஆவா காங்ஸ்ராஸ்’ என்று ஆங்கிலத்தில் குறிப்பிடப்பட்டிருந்தது. இந்த துண்டுப் பிரசுரத்தில் பல எழுத்துப் பிழைகள் காணப்பட்டமை, கடந்தகாலத்தில் இதுபோன்ற பல துண்டுப் பிரசுரங்களை வாசித்துப் பழகிய தமிழ் மக்களுக்கு இதன் பின்னணியில் யார் இருக்கிறார்கள் என்ற உண்மையை நிச்சயம் உணர்த்தியிருக்கும்.
சுன்னாகத்தில், பொலிசார் மீது நிகழ்த்தப்பட்ட வாள்வெட்டு, சம்பவத்தை வைத்துக் கொண்டு வடக்கில் பொலிசாரின் பாதுகாப்புத் தொடர்பாக கூட்டு எதிரணி நாடாளுமன்ற உறுப்பினர் தினேஸ் குணவர்த்தன போன்றவர்கள் நாடாளுமன்றத்தில் கேள்வி எழுப்பும் நிலை ஏற்பட்டிருக்கிறது.
ஆனால் அரசாங்கமோ, இது பொலிசார் என்று தெரியாமலேயே நிகழ்த்தப்பட்ட வாள்வெட்டு என்று சமாளிக்கப் பார்க்கிறது. கடையில் கப்பம் பெற வந்தவர்களைத் தடுக்க முனைந்த போது தான் இந்தச் சம்பவம் நடந்ததாக அரசாங்கம் கூறுகிறது.
சிவில் உடையில் இருந்த புலனாய்வுப் பிரிவினர் அடையாளம் காணப்பட்டே வெட்டப்பட்டிருக்கிறார்கள். ஆவா குழு வெளியிட்ட அறிக்கை அதனைத் தான் உறுதிப்படுத்தியிருக்கிறது.
எனவே இந்தச் சம்பவத்துக்கு உள்நோக்கம் இருந்திருக்கிறது என்பது தெளிவாகிறது. ஆவா குழுவுக்கு புலனாய்வுப் பொலிசாரை அடையாளம் காணும் திறன் எவ்வாறு கிடைத்தது? என்பது முக்கியமான கேள்வியாக இருக்கிறது.
போர் முடிவுக்கு வந்த பின்னர், யாழ்ப்பாணத்தில் பல்வேறு வாள்வெட்டுக் குழுக்கள் தோன்றின. அவற்றில் ஒன்று தான் ஆவா குழு. இந்தக் குழுவின் நடவடிக்கைகள் எல்லை மீறிய போது, நீதிமன்ற உத்தரவுகள் மற்றும் பொலிசாரின் நடவடிக்கைகள் மூலம், இரண்டு ஆண்டுகளுக்கு முன்னர் கட்டுப்படுத்தப்பட்டது.
ஆவா குழுவில் செயற்பட்டவர்கள் பலர் கைது செய்யப்பட்டனர் அவர்களிடம் இருந்து வாள்கள், கத்திகளை, குண்டுகள், மோட்டார் சைக்கிள்கள் கைப்பற்றப்பட்டன.
சில காலமாக சற்றுக் குறைந்திருந்த வாள்வெட்டுகள் அண்மையில் அதிகரிக்கத் தொடங்கிய போது, மீண்டும் நீதித்துறையினரும், பொலிசாரும் உசாரடைந்தனர். இதனால், இந்தக் குழுக்களை கண்டுபிடித்து ஒடுக்குவதற்காக புதிய பொலிஸ் பிரிவு ஒன்று உருவாக்கப்பட்ட மறுநாளே கொக்குவில் சம்பவம் இடம்பெற்றது.
வாள்வெட்டுக் குழுக்களை அடக்குவதற்காக முன்னெடுக்கப்பட்ட ஒரு முயற்சி மாணவர்கள் கொல்லப்பட்டதன் விளைவாக முடங்கிப் போனது.
இந்த பின்னணியில் தான், சுன்னாகத்தில் ஆவா குழு என்ற பெயரில் வாள்வெட்டு அரங்கேற்றப்பட்டது.
பதிலடி, சமூகச் சீரழிவுகளுக்கு எதிரான நடவடிக்கை என்ற புதிய அவதாரத்துடன் ஆவா குழு யாழ்ப்பாண சமூகத்துக்குள் செல்வாக்கைப் பெற்றுவிட முயற்சிக்கிறது.
விடுதலைப் புலிகளுக்குப் பிந்திய காலகட்டத்தில் வடக்கில் சமூகச் சீரழிவுகள், குற்றச்செயல்கள் அதிகரித்து விட்டன என்பது எல்லோராலும் சுமத்தப்படுகின்ற ஒரு குற்றச்சாட்டு.
இதனை யார் தான் தடுக்கப் போகிறார்கள் என்ற ஆதங்கம், முதலமைச்சர், நீதிபதிகள், மத்திய அரசிலுள்ள அமைச்சர்களிடம் இருந்து கூட வெளிப்பட்டிருக்கிறது.
சமூகச் சீரழிவுகளை தடுக்க யாருமே இல்லையா என்று தமிழ் மக்கள் புலம்புகின்ற சூழலில், இத்தகைய சீரழிவுகளை அனுமதிக்காத புலிகளுக்குப் பின்னர் ஏற்பட்டுள்ள வெற்றிடத்தை, ஆவா குழு நிரப்ப முனைகிறது என்பதை அதன் துண்டுப் பிரசுரம் வெளிப்படுத்தியிருக்கிறது.
அது மாத்திரமன்றி, வடக்கில் தமிழ்ப் பொலிசாரை அதிகம் நியமிக்க வேண்டும் என்று அரசியல் மட்டத்தில் வலியுறுத்தப்படுகின்ற நிலையில், தமிழ்ப் பொலிசாரை இன விரோதிகளாகவும், சமூக விரோதிகளாகவும் அடையாளப்படுத்த முனைந்திருக்கிறது துண்டுப் பிரசுரம்.
இதன் மூலம், தமிழ்ப் பொலிசார் மத்தியில் அச்சத்தை ஏற்படுத்தி, அவர்களை வடக்கிற்கு வெளியே பணியாற்ற நிர்ப்பந்திக்க முயற்சிக்கப்படுவதுடன், தமிழ் பொலிசாருக்கும் தமிழ் மக்களுக்கும் இடையில் ஒரு பிளவை ஏற்படுத்தவும் முயற்சிக்கப்பட்டிருக்கிறது.
வடக்கில் வாள்வெட்டுக் குழுக்கள் தொடர்ந்து நடமாடுவதை விரும்பும் தரப்பு ஒன்றே நன்கு திட்டமிட்டுச் செயற்பட்டிருக்கிறது, செயற்படுகிறது என்பதை இதன் மூலம் உறுதிப்படுத்த முடிகிறது.
அதேவேளை, ஆவா குழு என்று கூறப்படும் குழு உண்மையில் யாருடைய தலைமையில் இயங்குகிறது என்பது யாருக்கும் தெரியாது.
ஆவா என்பது சிங்களச் சொல். ஒரு சிங்களச் சொல்லின் பெயரால், இயங்கும் குழுவொன்று யாழ்ப்பாணத்தின் கலாசாரப் பெருமையைக் காப்பதாகவும், சமூக சீரழிவுகளை தடுப்பதாகவும், கூறிக் கொள்வது முரண்பாடான விடயங்களாக இருக்கின்றன.
இந்த ஆவா குழுவை முன்னைய அரசாங்கத்தின் காலத்தில் யாழ்ப்பாணத்தில் பணியாற்றிய இராணுவ உயர்அதிகாரி ஒருவரே உருவாக்கினார் என்று கொழும்பு இணையத்தளம் ஒன்று தகவல் வெளியிட்டிருக்கிறது.
போர் முடிவுக்கு வந்த பின்னர், நன்கு திட்டமிட்டு இந்தக் குழு உருவாக்கப்பட்டிருக்கிறது என்பது, பல்கலைக்கழக மாணவர்களின் கொலை தொடர்பாக மேற்கொள்ளப்பட்ட விசாரணைகளின் மூலம் பொலிசார் கண்டறிந்துள்ளதாகவும் எனினும் இதுபற்றிய இரகசியங்களை வெளியிடக் கூடாது என்று அரசியல் தலைமைகளால் தடைவிதிக்கப்பட்டுள்ளதாகவும் அந்தச் செய்தியில் கூறப்பட்டிருந்தது.
இந்தச் சந்தேகத்தை உறுதிப்படுத்தும் வகையிலேயே, சட்டம் ஒழுங்கு அமைச்சர் சாகல ரத்நாயக்கவும் கடந்த புதன்கிழமை அமைச்சரவை முடிவுகளை அறிவிக்கும் செய்தியாளர் மாநாட்டில் நடந்து கொண்டார்.
இந்தக் குழுக்களின் பின்னணியில் இராணுவப் புலனாய்வுப் பிரிவு இருப்பதாக வடக்கு மக்கள் கூறுகிறார்களே என்று அவரிடம் கேள்வி எழுப்பிய போது, அவர் எந்தப் பதிலையும் கூறாமல் எழும்பிச் சென்றிருந்தார்.
அவ்வாறாயின் அவருக்கு ஏதோ உண்மை தெரிந்திருக்க வேண்டும். அதனால் தான் அவர் மழுப்ப முயன்றிருக்கிறார். இல்லையேல் உறுதியாக மறுத்திருக்கலாம்.
ஆவா குழுவைப் பயன்படுத்தி மீண்டும் வடக்கில் குழப்பத்தையும் பதற்றத்தையும் உருவாக்கும் நன்கு திட்டமிடப்பட்ட முயற்சிகள் மேற்கொள்ளப்பட்டிருக்கின்றன.
வடக்கில் எந்தளவு காலம் பதற்றமான நிலை நீடிக்கிறதோ, அந்தளவு காலத்துக்கு வடக்கில் படையினரின் இருப்பும் கேள்விக்கிடமற்றதாகவே இருக்கும்.
இந்த இரண்டு விடயங்களையும் ஒருங்கிணைத்துப் பார்க்கும் எவராலும், ஆவா குழு போன்றவற்றின் பின்னால் உள்ளவர்கள் யார் என்பதையும் அவர்களின் தந்திரம் என்ன என்பதையும் இலகுவாகவே உணர்ந்து கொள்ள முடியும்.
முக்கியமான செய்திகளை உடனுக்குடன் அறிந்திட Fallow ஐ கிளிக் செய்யுங்கள்
