நானுஓயா வாகன விபத்தில் உயிரிழப்பு எண்ணிக்கை அதிகரிப்பு

நானுஓயா வாகன விபத்தில் இருவர் உயிரிழந்துள்ள நிலையில், இன்று (வியாழக்கிழமை) மேலும் ஒருவர் உயிரிழந்துள்ளார்.

இதனையடுத்து, குறித்த விபத்தில் உயிரிழப்பு எண்ணிக்கை தற்போது மூன்றாக அதிகரித்துள்ள நிலையில் விபத்தில் காயமடைந்த அறுவர் தொடர்ந்தும் சிகிச்சை பெற்று வருகின்றனர்.

குறித்த விபத்து தொடர்பில், நானுஓயா பொலிஸார் மேற்கொண்ட விசாரணைகளில், தெரிவியவந்துள்ளதாவது,

‘நுவரெலியாவில் பிரபல வர்த்தக நிலையமொன்றின் விவசாய பண்ணை தொழிலுக்காக லொறி ஒன்றின் மூலம் தொழிலாளர்கள் சென்றுள்ளனர்.

மாலை தொழில் முடிந்து தத்தமது வீடுகளுக்கு செல்லவென மீண்டும் வாகனத்தில் வரும் வழியில் குறித்த வாகனம் பிரதான வீதியை விட்டு விலகி 300 அடி பள்ளத்தில் பாய்ந்து விபத்துக்குள்ளாகியுள்ளது’ என தெரிவிக்கப்பட்டுள்ளது.

நானுஓயா கிளாரன்டன் தோட்ட பகுதியில் நேற்று (புதன்கிழமை) டிப்பர் ரக வாகனமொன்று வீதியை விட்டு விலகி 300 அடி பள்ளத்தில் வீழ்த்து விபத்துக்குள்ளாகியதில் இருவர் உயிரிழந்துள்ளதுடன் ஏழு பேர் படுகாயமடைந்தனர்.

காயமடைந்தவர்கள் நுவரெலியா மாவட்ட வைத்தியசாலையில் அவசர சிகிச்சை பிரிவில் சேர்க்கப்பட்டுள்ள நிலையில் இன்று (வியாழக்கிழமை) ஒருவர் உயிரிழந்துள்ளார்.