பரவிபாஞ்சான் மக்கள் ஐந்தாவது நாளாகவும் போராட்டம்
கிளிநொச்சி – பரவிபாஞ்சான் பகுதியில் இராணுவத்தினர் வசமுள்ள தமது காணிகளை விடுவிக்குமாறு கோரி இன்று ஐந்தாவது நாளாகவும் பிரதேச மக்கள் கவனயீர்ப்பு போராட்டத்தை முன்னெடுத்துள்ளனர்.
பரவிபாஞ்சான் பகுதியில் இராணுவத்தின் தேவைக்காகப் பயன்படுத்தப்பட்டு வந்த மூன்றரை ஏக்கர் வரையான பொதுமக்களின் காணியை கடந்த 31 ஆம் திகதி விடுவிப்பதற்கான நடவடிக்கைகள் முன்னெடுக்கப்பட்டுள்ளதாக கிளிநொச்சி மாவட்ட அரசாங்க அதிபர் தெரிவித்திருந்தார்.
எனினும் அந்த காணியும் இதுவரை பொதுமக்களிடம் கையளிக்கப்படாத நிலையில் எஞ்சிய பொதுமக்களின் காணியையும் விடுவிக்குமாறு கோரி பிரதேச மக்கள் கடந்த 31 ஆம் திகதி முதல் மீண்டும் போராட்டத்தில் ஈடுபட்டுள்ளனர்.
பரவிபாஞ்சான் பகுதியில் பாதுகாப்புத் தரப்பினரால் சுவீகரிக்கப்பட்டிருந்த தமது காணிகளை மீள ஒப்படைக்குமாறு வலியுறுத்தி பிரதேச மக்கள் கடந்த வாரம் தொடர் போராட்டங்களை முன்னெடுத்திருந்தனர்.
இதனையடுத்து, கடந்த 17 ஆம் திகதி அந்த பகுதிக்கு விஜயம் செய்த எதிர்க்கட்சித் தலைவர் இரா.சம்பந்தன், பாதுகாப்பு செயலாளருடன் தொலைபேசியூடாக நடத்திய பேச்சுவார்த்தையின் பின்னர் இரண்டு வாரங்களுக்குள் மக்களின் காணிகளை மீளப்பெற்றுக்கொள்வதற்கு நடவடிக்கை எடுக்கப்படும் என வாக்குறுதியளித்திருந்தார்.
இரா.சம்பந்தன் வழங்கிய வாக்குறுதியை அடுத்து, பரவிப்பாஞ்சான் இராணுவ முகாமிற்கு முன்னால் கடந்த 13 ஆம் திகதி சனிக்கிழமை காலை முதல் 17 ஆம் திகதி வரை முன்னெடுக்கப்பட்ட எதிர்ப்பு ஆர்ப்பாட்டம் கைவிடப்பட்டது.
எவ்வாறாயினும் எதிர்க்கட்சித் தலைவரும் தமிழ் தேசிய கூட்டமைப்பின் தலைவருமான இரா.சம்பந்தன் வாக்குறுதியளித்தவாறு 14 நாட்கள் கால அவகாசம் இன்றுடன் நிறைவடையும் நிலையில், காணி விடுவிக்கப்படாமைக்கு எதிராக பொது மக்கள் மீண்டும் போராட்டத்தில் ஈடுபட்டு வருகின்றமை குறிப்பிடத்தக்கது.
