3 ஆவது டெஸ்ட்டிலும் இலங்கை அணி வெற்றி
அவுஸ்திரேலியாவுக்கு எதிரான மூன்றாவது டெஸ்ட் போட்டியிலும் வெற்றியீட்டியதன் மூலம் இலங்கை அணி, 3-0 என்ற அடிப்படையில் தொடரையும் கைப்பற்றியுள்ளது.
3 ஆவது டெஸ்ட் போட்டியில் இலங்கை அணி 163 ஓட்டங்களால் வென்றுள்ளது. கொழும்பு எஸ்.எஸ்.சி. மைதானத்தில் கடந்த 13ம் திகதி ஆரம்பமான இந்தப் போட்டியில், நாணய சுழற்சியில் வெற்றி பெற்ற இலங்கை முதலில் துடுப்பெடுத்தாடத் தீர்மானித்தது.
இதன்படி தனது முதலாவது இன்னிங்சில் களமிறங்கிய இலங்கை 355 ஓட்டங்களைப் பெற்ற வேளை சகல விக்கெட்டுக்களையும் இழந்து,
தினேஸ் சந்திமால் 132 ஓட்டங்களையும், தனஞ்சயடி சில்வா 129 ஓட்டங்களையும் தனது அணிக்காக பெற்றுக்கொடுத்தனர்.
ஆஸி சார்பில் சிறப்பாக பந்து வீசிய மிச்சல் ஸ்ராக் 5 விக்கெட்டுக்களையும் நாதன் லயன் 3 விக்கெட்டுக்களையும் பெற்றனர். இதனையடுத்து, தனது முதல் இன்னிங்சில் துடுப்பெடுத்தாட களமிறங்கிய அவுஸ்திரேலிய அணி சகல விக்கெட்டுக்களையும் இழந்தது 379 ஓட்டங்களைப் பெற்றுக்கொண்டனர்.
அவுஸ்திரேலிய அணி சார்பில் மார்ஷ் 130 ஓட்டங்களையும் ஸ்மித் 119 ஓட்டங்களையும் பெற்றுக்கொண்டனர். இலங்கை சார்பில் அபாரமாக பந்து வீசிய ரங்கன ஹேரத் 6 விக்கெட்டுக்களை வீழ்த்தினார்.
இதன்படி 24 ஓட்டங்களால் அவுஸ்திரேலியா முன்னிலையில் இருக்க இலங்கை அணி தனது இரண்டாவது இன்னிங்சை ஆரம்பித்தது. குஷல் சில்வா அதிக பட்சமாக 115 ஓட்டங்களுடன் போட்டியின் இறுதி நாளான இன்று 8 விக்கெட்டுக்களை இழந்து 347 ஓட்டங்களைப் பெற்றிருந்த இலங்கை அணி, தனது இன்னிங்சை இடைநிறுத்திக் கொண்டு அவுஸ்திரேலியாவுக்கு ஆட வாய்ப்பளித்துள்ளது.
இதனையடுத்து 324 என்ற வெற்றி இலக்குடன் களமிறங்கிய அவுஸ்திரேலிய சகல விக்கெட்டுக்களையும் இழந்து 160 ஓட்டங்களை மட்டுமே பெற்றுக்கொண்டது.
டேவிட் வோனர் மாத்திரம் சிறப்பாக ஆடி 64 ஓட்டங்களைப் பெற்றுக் கொடுத்தார். இதன்படி 163 ஓட்டங்களால் இலங்கை வெற்றியீட்டியது. இரண்டாவது இன்னிங்சிலும் அபாரமாக பந்து வீசிய ரங்கன ஹேரத் 7 விக்கெட்டுக்களை பெற்று தனது அணியின் வெற்றியை உறுதி செய்தார்.
