அரசியலமைப்பின் தீர்வுத்திட்ட முன்மொழிவை இம்மாத இறுதிக்குள் சமர்ப்பிக்க வேண்டும்!
தமிழ்த் தேசியக் கூட்டமைப்பு இம்மாத இறுதிக்குள் அரசியலமைப்பிற்கான தீர்வுத் திட்ட முன்மொழிவை சமர்ப்பித்து அரசியலமைப்பு சபைக்கு அதனை கையளிக்க நடவடிக்கை எடுக்கவேண்டும் என வடக்கு மாகாண சபை உறுப்பினர் எம்.கே.சிவாஜிலிங்கம் தெரிவித்தார்.
புதிய அரசியலமைப்பிற்கான தீர்வுத்திட்ட முன் யோசனைகளை இம்மாதம் 31ஆம் திகதி சமர்ப்பிக்க வேண்டுமென அரசியலமைப்பிற்கான குழு அறிவித்துள்ளமை தொடர்பில் கூட்டமைப்பின் நிலைப்பாடு தொடர்பாக கொழும்பு ஊடகம் ஒன்று வினாவியபோதே அவர் இதனைத் தெரிவித்தார்.
இது தொடர்பில் அவர் மேலும் தெரிவிக்கையில்,
தமிழ்த் தேசியக் கூட்டமைப்பின் ஒருங்கிணைப்பு குழுக் கூட்டம் 2015 ஆகஸ்ட் மாதம் நடைபெற்ற பாராளுமன்ற தேர்தலின் பின் தற்போது 9 மாதங்கள் கடந்த சூழ்நிலையில் இரு தடவைக்கு மேல் ஒருகிணைப்புக்குழுக் கூட்டம் நடைபெறவில்லை.
கூட்டமைப்பில் நிலவும் சர்ச்சைகளுக்குத் தீர்வு காணக்கூடிய வகையில் குறிப்பாக இனப்பிரச்சினைக்கான தீர்வாக புதிய அரசியல் அமைப்பை உருவாக்குவதற்கான வேலைத்திட்டங்கள் நடைபெற்று வரும் நிலையில் பாராளுமன்றம் அரசியலமைப்புச் சபையாக மாற்றப்பட்டு இம் மாதம் 31 ஆம் திகதிக்கு முன் அரசியல் கட்சிகளும் பொது அமைப்புகளும் அரசியல் நிர்ணய சபைக்கு யோசனையை வழங்கவேண்டுமென இறுதித் திகதியையும் அறிவித்துள்ளது.
இந்த நிலையில் தமிழ்த் தேசியக் கூட்டமைப்பு 31 ஆம் திகதிக்கு முன் தனது தீர்வுத் திட்டத்தை முன்வைக்குமா இல்லையா என்ற கேள்வி எழுந்துள்ளது.
இதில் வெறுமனே ஒரு கட்சியை மட்டும் குறை சொல்லமுடியாது. நான்கு கட்சிகளும் கூட்டாகப் பொறுப்புக் கூறவேண்டும். அப்படி நான்கு கட்சிகளும் இணைந்து ஒரு தீர்வை வழங்காவிட்டால் குறைந்தது நான்கு கட்சிகளும் தனித்தனியாக தீர்வை வழங்க வேண்டும். இது பொருத்தமானது அல்ல.
பொதுவான விடயங்களில் எல்லோருக்கும் உடன்பாடு இருக்கிறது. வடக்கு கிழக்கு மாகாணங்கள் இணைந்த மாநிலம். அரசியலமைப்பு முறையில் சமஷ்டி இருக்கவேண்டும் என்ற விடயங்கள் உள்ளடக்க வேண்டும்.
இதுவரை தீர்வுத்திட்ட முன்மொழிவை கூட்டமைப்பு வழங்காதுள்ளமை பொது மக்கள் மத்தியில் விசனத்தை ஏற்படுத்தியுள்ளது. ஆகவே, இந்த விடயத்தில் தமிழ்த் தேசியக் கூட்டமைப்பின் ஒருங்கிணைப்புக் குழு கூட்டப்பட்டு தீர்வு யோசனையை முறைப்படி கையளிக்கவேண்டும். பின்னர் பேரம் பேசும்போது தமிழ் தலைவர்கள், முஸ்லிம் தலைமைகளுடனும் மலையகத் தமிழ்த் தலைவர்களுடனும் ஏனையோருடனும் பேசி தீர்வுக்கான முயற்சிகளில் ஈடுபடலாம். தீர்வு யோசனையை முன்வைக்க வேண்டும். வரலாற்றில் இருந்து தவறக்கூடாது. இதனை முன்வைக்கவேண்டும் என்பதே தமிழ் மக்களுடைய எதிர்பார்ப்பு என்றார்.
