தேசிய அரசாங்கத்திற்கு ஒருபோதும் ஆபத்தில்லை!
புதிய அரசியலமைப்பினூடாக தமிழ் பேசும் மக்களுக்கு தீர்வுத் திட்ட மொன்றை முன்வைக்கும் விடயத்தில் தமிழ்த் தேசியக் கூட்டமைப்புடன் இரு தரப்பு பேச்சுவார்த்தைகளை அரசாங்கம் நடத்தும். ஏனைய கட்சிகளுடனும் நாம் இந்த விடயம் தொடர்பில் பேச்சு நடத்தினாலும் கூட்டமைப்புடனான பேச்சுவார்த்தைகளே மிகவும் முக்கியமானவையாகும் என்று நீதி அமைச்சர் விஜேதாஸ ராஜபக்ஷ தெரிவித்தார்.
இதேவேளை ஒருசில அமைச்சர்கள் பிரதமரை விமர்சித்தனர் என்ற காரணத்திற்காக தேசிய அரசாங்கத்திற்கு எந்த பாதிப்பும் ஏற்படாது. தேசிய அரசாங்கம் 5 வருடங்கள் நாட்டை ஆட்சி செய்யும் என்பதுடன் நிலுவையில் காணப்படுகின்ற பிரச் சினைகளை தீர்த்து வைக்கும் என் றும் அமைச்சர் குறிப்பிட்டார்.
இராஜாங்க அமைச்சர் டிலான் பெரேரா பிரதமரைவிமர்சித்துள்ளமை மற்றும் புதிய அரசியலமைப்பின் அரசியல் தீர்வு உள்ளடக்கப்படவுள்ளமை தொடர்பில் கொழும்பு ஊடகம் ஒன்றுக்கு விபரிக்கையிலேயே அவர் மேற்கண்டவாறு கூறினார்.
அமைச்சர் விஜேதாஸ ராஜபக்ஷ இந்த விடயம் குறித்து மேலும் குறிப்பிடுகையில்,
பிரதமர் ரணில் விக்கிரமசிங்கவை ஒரு அமைச்சர் கடுமையாக விமர்சித்துவிட்டார் என்பதற்காக தேசிய அரசாங்கத்தின் செயற்பாடுகள் வீழ்ச்சியடையாது. ஐக்கிய தேசியக் கட்சியும், ஸ்ரீ லங்கா சுதந்திரக் கட்சியும் இரண்டு வருடங்களுக்கு தேசிய அரசாங்கத்தை கொண்டு செல்லவே முன்வந்துள்ளன. ஆனால் ஐந்து வருடங்களுக்கு நாங்கள் தேசிய அரசாங்கத்தை கொண்டு செல்வோம்.
அதுமட்டுமன்றி தீர்க்கப்படாமல் இருக்கின்ற பிரச்சினைகளையும் எமது தேசிய அரசாங்கத்தின் கீழ் தீர்ப்பதற்கு நடவடிக்கை எடுப்போம். அதிகாரங்கள் குறைக்கப்பட்டாலும், நாட்டில் இன்னும் ஜனாதிபதி முறைமையே காணப்படுகின்றது. அந்த வகையில் பிரதமர் ரணில்விக்கிரம சிங்கவும், ஜனாதிபதி மைத்திரிபால சிறிசேனவும் மிகவும் புரிந்துனர்வுடனும், ஒத்துழைப்புடனும் செயற்பட்டு வருகின்றனர்.
எனவே ஐக்கிய தேசியக் கட்சியும் ஸ்ரீ லங்கா சுதந்திரக் கட்சியும் தேசிய அரசாங்கத்தை முன்னெடுத்து செல்லும். இந்த தேசிய அரசாங்கத்தை குழப்புவதற்கு இடையூறுகளும் முட்டுக்கட்டைகளும் வரலாம். ஆனால் அந்த சவால்களை முறையடித்து நாங்கள் தேசிய அரசாங்கத்தை முன்கொண்டு செல்வோம். இந்த தேசிய அரசாங்கத்தை ஐந்து வருடங்களுக்கு யாராலும் அசைக்க முடியாது.
தேசிய அரசாங்கத்தை அசைப்பதற்கு பல்வேறு தரப்புக்கள் முயற்சிக்கலாம். ஆனால் நாங்கள் அதற்கு இடமளிக்க மாட்டோம். சவால்களை எதிர்கொண்டு ஐந்து வருடங்களுக்கு அரசாங்கத்தை முன்னெடுத்து செல்வோம். இதில் நாங்கள் உறுதியாக இருக்கின்றோம்.
இது இவ்வாறிருக்க புதிய அரசியலமைப்பினூடாக தமிழ் பேசும் மக்களுக்கான அரசியல் தீர்வுத் திட்டமொன்றை முன்வைக்க அரசாங்கம் நடவடிக்கை எடுத்து வருகிறது. அந்த வகையில் அரசியல் தீர்வுத்திட்டமொன்றை முன்னெடுக்க அனைத்து அரசியல் கட்சிகளுடனும் பேச்சுவார்த்தை நடத்துவோம்.
ஆனால் அரசியல் தீர்வு விடயத்தில் தமிழ்த் தேசியக் கூட்டமைப்புடன் இரு தரப்பு பேச்சுவார்த்தைகளை அரசாங்கம் நடத்தும். ஏனைய கட்சிகளுடனும் நாம் இந்த விடயம் தொடர்பில் பேச்சு நடத்தினாலும் கூட்டமைப்புடனான பேச்சுவார்த்தைகளே மிகவும் முக்கியமானவைகயாகும். காரணம் தமிழ்த் தேசியக் கூட்டமைப்பானது தமிழ் மக்களின் பிரதானமான கட்சியாகும்.
எனவே இந்த தீர்வுத் திட்டம் தொடர்பில் தமிழ்த் தேசியக் கூட்டமைப்புடன் பேச்சு நடத்துவது மிகவும் அவசியமாகும். எனவே விரைவில் தமிழ் தேசியக் கூட்டமைப்புடன் அரசியல் தீர்வுத் திட்டம் தொடர்பில் இரு தரப்பு பேச்சுக்களை நடத்துவோம் என்றார்.
