இராணுவத்தை இலக்கு வைத்ததாக உள்ள விசாரணைகள் அமையாது - என்கிறார் ருவான்
தமிழ் மக்களின் உரிமைகளை பெற்றுக்கொடுப்பதும் வடக்கில் ஜனநாயக செயற்பாடுகளை பலப்படுத்துவதும் பிரிவினைவாத செயற்பாடுகள் அல்ல. முன்னைய அரசாங்கம் செய்யாததை நாம் செய்கின்றோம் என்பதற்காக தேசிய பாதுகாப்பில் சந்தேகம் கொள்ளத் தேவையும் இல்லை என பாதுகாப்பு இராஜாங்க அமைச்சர் ருவான் விஜயவர்த்தன தெரிவித்தார்.
தேசிய பாதுகாப்பை சீர்குலைக்கும் எந்த நடவடிக்கைகளுக்கும் நாம் இடமளிக்கப் போவதில்லை. அதேபோல் இப்போதிருக்கும் நிலைமையில் நாட்டின் தேசிய பாதுகாப்பில் எந்த அச்சமும் கொள்ளத்தேவையில்லை எனவும் அவர் குறிப்பிட்டார்.
எந்த சந்தர்ப்பத்திலும் சர்வதேச நீதிமன்றத் தின் மூலமாக எமது இராணுவத்தை விசாரிக்க அனுமதிப்பதில்லை என்ற நிலைப்பாட்டில் ஜனாதிபதியும் பிரதமரும் உள்ளனர். எனினும் உள்ளக பொறிமுறைகள் சரியாக நடைபெறும். இதன் போதும் இராணுவம் செய்ததாக கூறப்படும் குற்றச்சாட்டுகள் தொடர்பில் விசாரணைகள் இடம்பெற்றாலும் அது எந்த சந்தர்ப்பத்திலும் இராணுவத்தை இலக்குவைத்த பொறிமுறையாக அமையாது எனவும் அவர் கூறினார்.
தேசிய பாதுகாப்பில் அச்சநிலைமை ஏற்பட்டுள்ளதாக மஹிந்த ஆதரவு அணியினர் தெரிவித்து வரும் நிலையில். அது குறித்து கருத்து தெரிவிக்கையிலேயே அவர் மேற்கண்டவாறு குறிப்பிட்டார்.
இது தொடர்பில் அவர் மேலும் கூறுகையில், ஆட்சி மாற்றத்தின் பின்னர் நாட்டில் பிரிவினைவாத செயற்பாடுகள் பலமடைந்து செயற்படுவதாகவும் எமது இராணுவத்தை காட்டிக்கொடுக்கும் செயற்பாடுகள் தீவிரமாக முன்னெடுக்கப்படுவதாகவும் ஒரு தரப்பினர் தொடர்ச்சியாக கூறி வருகின்றனர். கடந்த காலத்தில் நாட்டில் இனவாதத்தை பரப்பி சிறுபான்மை மக்களை பிரிவினைவாதிகள் என்ற கோணத்தில் சித்திரித்தனர். முஸ்லிம் சமூகத்தினருக்கு எதிரான பல அவதூறுகளை முன்வைத்தனர். அந்த இனவாத குழுக்களை கடந்த ஜனாதிபதித் தேர்தலின் போதும் பொதுத் தேர்தலின் போதும் மக்கள் நிராகரித்து விட்டனர்.
எனினும் இனவாதத்தில் ஊறிய மஹிந்த தரப்பினருக்கு ஜனநாயகத்தின் பாதையில் பயணிக்க தெரியாதுள்ளது. நாட்டில் ஜனநாயகத்தை கட்டியெழுப்பும் அணியில் இவர்களால் பங்குகொள்ள முடியாதுள்ளது. யுத்தம் முடிவுக்கு வந்ததில் இருந்து வடக்கு மக்களுக்கு எந்த சலுகைகளையும் முன்னைய அரசாங்கத்தினால் முன்னெடுக்க முடியவில்லை. ஆனால் இன்று வடக்கில் பொதுமக்களுக்கு உரிமைகளையும், அவர்களுக்கான உடைமைகளையும் நாம் பெற்றுக்கொடுத்துள்ளோம். அதை இவர்களால் தாங்கிக்கொள்ள முடியவில்லை. ஆகவே தான் இன்றும் இவர்கள் இனவாதக் கருத்துகளை பரப்பி நாட்டில் குழப்பங்களை ஏற்படுத்தும் நடவடிக்கைகளை மேற்கொண்டு வருகின்றனர்.
எவ்வாறு இருப்பினும் நாட்டில் எந்த சந்தர்ப்பத்திலும் குழப்பங்களை ஏற்படுத்த இந்த அரசாங்கம் இடமளிக்காது. அதேபோல் தேசிய பாதுகாப்பை சீர்குலைக்கும் எந்த நடவடிக்கைகளுக்கும் நாம் இடமளிக்கப் போவதில்லை. எனினும் இப்போதிருக்கும் நிலைமையில் நாட்டின் தேசிய பாதுகாப்பில் எந்த அச்சமும் கொள்ளத்தேவையில்லை. புலம்பெயர் அமைப்புகளின் ஆதிக்கமோ அல்லது சர்வதேச தரப்பின் தலையீடுகளோ இன்று எமக்கு இல்லை. மாறாக அனைவரதும் ஒத்துழைப்புடன் நாம் ஆட்சியை முன்னெடுத்து செல்கின்றோம்.
அதேபோல் இறுதி யுத்தத்தில் இடம்பெற்றதாக கூறப்படும் போர்க்குற்றங்கள் தொடர்பில் சர்வதேச விசாரணைகளின் மூலமாக எமது இராணுவத்தை தண்டிக்கப்போவதாக கூறுகின்றனர். ஆனால் எந்த சந்தர்ப்பத்திலும் சர்வதேச நீதிமன்றத்தின் மூலமாக எமது இராணுவத்தை விசாரிக்க அனுமதிப்பதில்லை என்ற நிலைப்பாட்டில் ஜனாதிபதியும் பிரதமரும் உள்ளனர். எனினும் உள்ளக பொறிமுறைகள் சரியாக நடைபெறும். இதன் போதும் இராணுவம் செய்ததாக கூறப்படும் குற்றச்சாட்டுகள் தொடர்பில் விசாரணைகள் இடம்பெற்றாலும் அது எந்த சந்தர்ப்பத்திலும் இராணுவத்தை இலக்குவைத்த பொறிமுறையாக அமையாது.
இறுதி யுத்தத்தில் பொதுமக்கள் பாதிக்கப்பட்டனர். பொதுமக்கள் காணாமல் போனதாகக் கூறப்படுகின்றது. அதேபோல் பொதுமக்கள் இராணுவம் வசம் சரணடைந்ததாகவும் குறிப்பிடப்படுகின்றது. அவ் வாறான பொதுமக்களின் குற்றச்சாட்டுகள் தொடர்பில் பல கோணங்களில் விசாரணை கள் ஆரம்பிக்கப்பட்டுள்ளன. காணாமல் போனோரை கண்டறியும் ஆணைக்குழுவின் செயற்பாடுகளும் தொடர்ச்சியாக முன்னெடுக்கப்படுகின்றன. அவ்வாரு இருக்கையில் உண்மைகளை கண்டறியும் நடவடிக்கைகள் பலமாக முன்னெடுக்கப்படும்.
எவ்வாறு இருப்பினும் ஜனநாயகத்தையும் அதனுடன் கூடிய தேசிய பாதுகாப்பையும் முன்னெடுக்கும் எமது செயற்பாடுகளில் இனவாதிகளுக்கோ அல்லது அவர்களின் கருத்துகளுக்கோ முன்னுரிமை வழங்கப்பட மாட்டாது. நாட்டில் இன்று பிரிவினைக்கு இடம் இல்லை. அதேபோல் தேசிய பாதுகாப்பில் எந்த சிக்கலும் இல்லை. தொடர்ந்தும் தேசிய பாதுகாப்பிற்கு எந்த வித சிக்கலும் இல் லாது நடவடிக்கை கள் முன்னெடுக்கப்படும் என்றார்.
