சு.க.வை பிளவுபடுத்த மஹிந்த அணி முயற்சி
ஸ்ரீலங்கா சுதந்திரக் கட்சிக்கு இரண்டு தலைவர்கள் இல்லை. கட்சியின் தலைமைத்துவத்தை கைப்பற்றும் நோக்கத்தில் கட்சியை பிளவுபடுத்த மஹிந்த அணியினர் முயற்சிப்பதாக ஸ்ரீலங்கா சுதந்திரக் கட்சியின் உபசெயலாளரும் அமைச்சருமான மஹிந்த சமரசிங்க தெரிவித்தார்.
ஒரு சந்தர்ப்பத்தில் இரண்டு தலைமை களை ஏற்று செயற்பட முடியாது. அதை யும் தாண்டி செயற்பட விரும்புபவர்கள் கட்சியை பிளவுபடுத்தாது வெளியேறுவதே சிறந்த வழிமுறையாகும் எனவும் அவர் குறிப்பிட் டார்.
ஸ்ரீலங்கா சுதந்திரக் கட்சியினுள் ஏற்பட்டுள்ள முரண்பாட்டுக் கருத்துகள் மற்றும் மஹிந்த அணியின் தனித்த பயணம் தொடர்பில் கட்சியின் உபசெயலாளரிடம் ஊடகம் ஒன்று வினாவிய போதே அவர் மேற்கண்டவாறு குறிப்பிட்டார்.
இது தொடர்பில் அவர் மேலும் கூறுகையில்,
ஸ்ரீலங்கா சுதந்திரக் கட்சியின் முயற்சிகள் தான் நாட்டை இத்தனை காலமாக சரியான பாதையில் வழிநடத்தி வருகின்றது. எனினும் கடந்த காலங்களில் நாம் ஒருசில தவறுகளையும் செய்துள்ளோம். எவ்வாறு இருப்பினும் கடந்த ஆண்டு ஜனவரி மாதம் நாட்டில் ஏற்பட்ட மாற்றத்துடன் நாடும் கட்சியும் வேறு ஒரு திசையை நோக்கி பயணிக்க ஆரம்பித்துவிட்டது.
இதில் ஐக்கிய தேசியக் கட்சியுடன் கைகோர்த்து கூட்டணி அரசாங்கத்தை அமைத்துள்ளோம். பொதுவாக பிரதான இரண்டு கட்சிகளும் மாறுபட்ட கொள்கையில் பயணிக்கும் கட்சியாக இருந்தாலும், அரசியல் முறைமையில் மாற்றம் இருந்தாலும் முரண்பாடுகள் இருந்தாலும் பொதுவான ஒரு நோக்கத்தை வெற்றிகொள்ள பிரதான இரண்டு கட்சிகளும் ஒன்றாக பயணிக்க வேண்டிய ஒரு நிலைமை ஏற்பட்டுள்ளது.
இதை ஸ்ரீலங்கா சுதந்திரக் கட்சியின் பெரும்பாலான உறுப்பினர்கள் ஏற்றுக்கொண்டுள்ளனர். எனினும் கட்சிக்குள் ஒருசில முரண்பாடுகள் உள்ளதையும் நாம் மறுக்கவில்லை. அரசாங்கத்தை பிரதிநிதித்துவப்படுத்தும் ஒருசாரார் இருந்தாலும் முன்னாள் ஜனாதிபதியை பலப்படுத்த வேண்டும் என்ற நோக்கத்தில் தம்மை எதிரணியாக வெளிப்படுத்தும் ஒரு சிலரும் கட்சிக்குள் உள்ளனர்.
கட்சியை பிளவுபடுத்தும் நோக்கத்தில் இவர்கள் செயற்படுகின்றமை தெளிவாகத் தெரிகின்றது. அதேபோல் அதிகாரத்தை மீண்டும் பெற்றுக்கொள்ள வேண்டும் என்ற நிலைப்பாட்டில் இவர்கள் இருக்கின்றமையும் தெரிகின்றது. எவ்வாறு இருப்பினும் ஸ்ரீலங்கா சுதந்திரக் கட்சி தலைமையிலான ஐக்கிய மக்கள் சுதந்திர முன்னணி இப்போது ஜனாதிபதி மைத்திரிபால சிறிசேன தலைமையில் செயற்பட்டு வருகின்றது. ஜனாதிபதிக்கு கட்டுப்பட வகையிலேயே கட்சியின் தீர்மானங்களும் மேற்கொள்ளப்படும்.
எந்த சந்தர்ப்பத்திலும் கட்சியில் ஒரு தலைவர் மட்டுமே செயற்பட முடியும். ஒரு சந்தர்ப்பத்தில் இரண்டு தலைமைகளை கொண்டு செயற்பட முடியாது. அதேபோல் ஸ்ரீலங்கா சுதந்திரக்கட்சியின் உறுப்பினராக செயற்படும் நிலையில் கட்சியின் மத்தியகுழு தீர்மானங்களையே ஏற்றுகொள்ள வேண்டும். அதையும் தாண்டி செயற்பட விரும்புபவர்கள் கட்சியை பிளவுபடுத்தாது வெளியேறுவதே சிறந்த வழிமுறையாகும்.
இன்று கட்சியை பிளவுபடுத்த நினைப்பவர்கள் ஸ்ரீலங்கா சுதந்திரக் கட்சியின் தலைமைத்துவத்தை வீழ்த்துவதுடன் ஐக்கிய தேசியக் கட்சியின் கரங்களை பலப்படுத்த செயற்படுகின்றனர். அந்த சூழ்ச்சியில் மஹிந்த ராஜபக் ஷவும் சிக்கிக்கொள்ள போகின்றார என்ற தீர்மானத்தை அவர் எடுக்க வேண்டும். எவ்வாறு இருப்பினும் ஸ்ரீலங்கா சுதந்திரக் கட்சியில் இருக்கும்வரையில் தான் இவர்களுக்கு பலம் என்றார்.
