கூட்டமைப்பின் கோரிக்கைக்கு அரசின் பதில் என்ன ?
போதும் மாற்றங்கள் நிகழ்ந்திருக்கின்றன. குறிப்பாக தமிழ், முஸ்லிம் கட்சிகள் ஏகோபித்த ஆதரவை வழங்கிய முதல் வரவு–செலவுத் திட்டமாக திகழ்கின்றது.
விசேடமாக தமிழ் மக்களின் பெரும்பான்மை ஆதரவைப் பெற்று எதிர்க்கட்சி வரிசையில் அமர்ந்திருக்கும் தமிழ்த் தேசியக் கூட்டமைப்பு ஆதரவாக வாக்களித்தமை தற்போது பேசுபொருளாகியுள்ளது.
ஜனாதிபதி மைத்திரிபால சிறிசேன தலைமையிலான தேசிய அரசாங்கத்தின் 2016ஆம் ஆண்டுக்கான வரவு–செலவுத்திட்டம் கடந்த மாதம் 20 ஆம் திகதி நிதி அமைச்சர் ரவி கருணாநாயக்கவினால் சமர்ப்பிக்கப்பட்டிருந்தது. வரவு–செலவுத்திட்டத்தில் வடக்கு, கிழக்குக்கு ஒதுக்கிய நிதி போதவில்லை, தனித்தனியாக ஒவ்வொரு அமைச்சுகளுக்குமான நிதி பற்றாக்குறையாகவுள்ளது, பாதுகாப்புக்காக மீண்டும் அதிகமான நிதி ஒதுக்கப்பட்டுள்ளது, அரசாங்க ஊழியர்கள் கவனத்தில் கொள்ளப்படவில்லை. திடீரென வரிகள் அதிகரிக்கப்பட்டுள்ளன, நாட்டின் ஒட்டுமொத்த மக்களையும் உள்ளடக்கியவாறு அமையவில்லை இவ்வாறு பலகுறைபாடுகள் விவாதத்தின்போது சபையில் சுட்டிக்காட்டப்பட்டன. மக்கள் விடுதலை முன்னணியினரும், முன்னாள் ஜனாதிபதி மஹிந்த ராஜபக் ஷவுக்கு சார்பான கூட்டு எதிர்க்கட்சியினரும் வரவு – செலவுத்திட்ட விடயங்களை பாராளுமன்றத்திற்குள்ளும் வெளியிலும் மிக கடுமையாக விமர்சித்திருந்தார்கள்.
இது தொடர்பாக தாம் முன்மொழிந்துள்ள பரிந்துரைகளை உள்ளீர்க்குமாறும் கோரியிருந்தனர். எனினும் கடந்த இரண்டாம் திகதி மாலையில் வரவு – செலவுத்திட்டத்தின் இரண்டாம் வாசிப்பு மீதான வாக்கெடுப்பு நடத்தப்பட்டது. இதன்போது வரவு – செலவுத் திட்டத்திற்கு ஆதரவாக 159 வாக்குகளும், எதிராக 52 வாக்குகளும் அளிக்கப்பட்டன. வரவு – செலவுத்திட்டத்தில் ஒன்றுமேயில்லையெனக் கூறிய மக்கள் விடுதலை முன்னணியும் கடுமையாக விமர்சித்த மஹிந்த அணியும் எதிர்த்து வாக்களித்த நிலையிலும் இரண்டாம் வாசிப்பு மீதான வாக்கெடுப்பு 107 மேலதிக வாக்குகளால் நிறைவேற்றப்பட்டதாகவும் அடுத்து குழுநிலை விவாதங்கள் ஆரம்பமாகவுள்ளதாகவும் சபாநாயகர் கரு ஜயசூரிய அறிவித்தார்.
ஐக்கிய மக்கள் சுதந்திர முன்னணியின் பாராளுமன்ற உறுப்பினர்களான மஹிந்த ராஜபக் ஷ, பிரேமலால் ஜயசேகர, மனுஷ நாணயக்கார, ரோஹான் ரத்வத்த, ஜனக்க ஹேரத், கீதா குமாரசிங்க, சிறிலால் கம்லத், ஜனக்க பண்டார தென்னக்கோன், ஐக்கிய தேசியக் கட்சியின் பாராளுமன்ற உறுப்பினர்களான புத்திக பத்திரண, அத்துரலிய ரத்ன தேரர், எம்.கே.டி.எஸ்.குணவர்தன, தமிழ்த் தேசியக் கூட்டமைப்பின் பாராளுமன்ற உறுப்பினர்களான சிவமோகன், சிவசக்தி ஆனந்தன் ஆகியோர் பாராளுமன்றுக்கு சமுகமளித்திருக்கவில்லை.
நிபந்தனையற்ற ஆதரவளித்து ஆட்சிமாற்றத்தின் பங்காளிகளாக இருந்த தமிழ்த் தேசியக் கூட்டமைப்பு தேசிய அரசாங்கத்தின் வரவு–செலவுத்திட்டத்திற்கு ஆதரவாக வாக்களித்திருக்கின்றது. விவாதங்களின்போது தமிழ்த்தேசியக் கூட்டமைப்பின் தலைவரும் எதிர்க்கட்சித் தலைவருமான இரா.சம்பந்தன் உட்பட அனைத்து உறுப்பினர்களும் பாராளுமன்றில் உரையாற்றும்போது வரவு – செலவுத்திட்டத்தின் மீதான குறைபாடுகளை சுட்டிக்காட்டியிருந்தனர். குறிப்பாக வரவு – செலவுத்திட்டத்தில் காணப்பட்ட தமிழ் எழுத்துப்பிழைகள் முதல் நிதி ஒதுக்கீடுகள் உட்பட பல்வேறு குறைபாடுகளை மிக துல்லியமான முறையில் சுட்டிக்காட்டியிருந்தார்கள். அவ்வாறானவர்கள் திடீரென ஆதரித்து வாக்களித்தமை ஆச்சரியத்தையே அளித்திருக்கின்றது.
அதுவொருபுறமிருக்கையில், தமிழ்த் தேசியக் கூட்டமைப்பின் ஏகோபித்த தீர்மானத்தில் இந்த ஆதரவு வழங்கப்பட்டிருக்கவில்லை என்பது வெளிப்படையான விடயமாகின்றது. குறிப்பாக கூட்டமைப்பின் அங்கத்துவக் கட்சியான ஈ.பி.ஆர்.எல்.எப்.பின் பாராளுமன்ற உறுப்பினர்களான சிவசக்தி ஆனந்தன், சிவமோகன் ஆகியோர் பாராளுமன்றுக்கு சமுகமளித்திருக்கவில்லை. கூட்டமைப்பினுள் இதுவரையிலும் பல்வேறு தருணங்களில் பல முரண்பாடுகள் மேலெழுந்திருக்கின்ற போதும் அவை இவ்வளவு தூரம் பகிரங்கமானதில்லை. ஆனால் முதற்தடவையாக அவ்விடயம் பகிரங்கமாக வெளிப்பட்டிருக்கின்றது.
முன்னதாக கூட்டமைப்பினுள் முரண்பாடுகள் எழுகின்றபோது அல்லது அது தொடர்பிலான மாறுபட்ட விடயங்கள், கருத்துக்கள் வெளியாகின்றபோது வேறுபட்ட கொள்கைகளை கொண்ட கூட்டாக இருப்பதால் கருத்து மாற்றங்கள் எழுவது சகஜம், கூட்மைப்பு ஜனநாயக கட்டமைப்பு ஆகவே இவ்வாறான விடயங்களை பெரிதாக கருதாதீர்களென தலைமையும், சிரேஷ்ட உறுப்பினர்கள் சிலரும் மக்களுக்கும் ஊடகங்களுக்கும் கூறுவார்கள். தீர்மானங்களில் எமக்கு உடன்பாடுகள் காணப்படாதபோதும் கூட்டமைப்பின் ஒற்றுமைக்காக அதற்கு ஆதரவாக இருக்கின்றோம் என்ற வகையிலான கருத்துக்களையும் கூட்டமைப்பின் அங்கத்துவ உறுப்பினர்கள் குறிப்பிடுவார்கள். இதுவே வழமையாக இருந்து வந்துள்ளது.
ஆனால் தற்போது நிலைமை மாற்றமடைந்திருக்கின்றது. உள்ளக முரண்பாடுகள் வரவு –செலவுத்திட்டத்தில் பிரதிபலித்து விட்டன. முரண்பாடுகள் இருக்கின்றதா? இல்லையா என்பதை ஆராய்வது இக்கட்டுரையின் நோக்கமல்ல. மாறாக, கூட்டமைப்பு கொள்கைவழியில் பற்றுறுதியுடன் ஒன்றுபட்டு, அதன் அடிப்படையில் தமிழரின் அரசியல் தலைமை கட்டமைப்பாகத் திகழவேண்டும் என்பதையும் அதுவே உரிமைக்காக விலைமதிப்பற்ற ஈகங்களை செய்த தமிழ் மக்களின் ஆரோக்கியமான எதிர்காலத்திற்கு உறுதுணையாக அமையும் என்பதையும் அனைவரும் கருத்தில் கொள்ளவேண்டும் என்பதை வலியுறுத்துவதே இக்கட்டுரையின் நோக்கமாகும்.
நல்லெண்ண சமிக்ஞை வரவு–செலவுத்திட்ட வாக்கெடுப்பில் எதிர்க்கட்சி வகிபாகத்தைக் கொண்டிருக்கும் தமிழ்த் தேசியக் கூட்டமைப்பு என்ன செய்யப்போகின்றது என்ற எதிர்பார்ப்புக்கள் வலுத்திருந்த நிலையில் இரண்டாம் திகதி வரவு–செலவுத்திட்டத்திற்கான வாக்கெடுப்பு நடத்தப்படவிருக்கையில், அதற்கு முதல்நாள் காலை பாராளுமன்ற கட்டடத்தொகுதியில் வரவு–செலவுத்திட்டம் தொடர்பான தீர்மானம் எடுப்பதற்கான பாராளுமன்றக் குழுக் கூட்டம் நடைபெறவுள்ளதால் அனைவரும் வருகைதர வேண்டுமென கொழும்புக்கு வெளியிலிருந்த கூட்டமைப்பு பாராளுமன்ற உறுப்பினர்களுக்கு அழைப்பு விடுக்கப்பட்டது. தொடர்ந்து இரண்டாம் திகதி காலையில் பாராளுமன்றக் குழுக்கூட்டம் ஆரம்பமாகியது. இதன்போது அரசியல் கைதிகளை விடுவிப்பதில் அரசாங்கம் வாக்குறுதியை மீறிவிட்டது. வவுனியா அரசாங்க அதிபரை மாற்றும் விடயம் ஒரு தொலைபேசி அழைப்பிலேயே செய்துமுடித்துவிடலாம் அதனைக் கூட செய்யாதிருக்கின்ற நிலையில் எவ்வாறு நாம் வரவு–செலவுத்திட்டத்திற்கு ஆதரவளிக்க முடியுமென கேள்வியெழுப்பப்பட்டது.
தற்போது சர்வதேச நாடுகளில் பெரும்பாலானவை இலங்கை அரசாங்கத்தின் விசாரணைப் பொறிமுறைக்கு இணை அனுசரணை வழங்கி வருகின்றன. இலங்கை அரசாங்கமும் பல வாக்குறுதிகளை வழங்கியுள்ள நிலையில் அந்நாடுகள் அரசாங்கத்திற்கு ஆதரவான செயற்பாடுகளை முன்னெடுக்கின்றன. ஆகவே நாம் நல்லெண்ண சமிக்ஞையாக இந்த வரவு – செலவுத்திட்டத்திற்கு ஆதரவளிப்போம். எதிராக வாக்களித்தால் நல்லெண்ண சூழல் ஏற்பட்டிருக்கின்ற நிலையில் அதனை குழப்பியவர்களாகவே எம்மை சர்வதேசம் கணித்து விடும். அதுமட்டுமின்றி பெரும்பான்மைத் தரப்புக்களும் அதனை பிரசார கருவியாக எடுத்துவிடும். ஆகவே நாம் நல்லெண்ண சமிக்ஞையை வெளிப்படுத்தும் முகமாக ஆதரவாக வாக்களிப்போம். ஒருவேளை அரசாங்கம் எமது கோரிக்கைகளை நிறைவேற்றத் தவறுமாயின் நாம் அடுத்த கட்டமாக எடுக்கப்போகும் கடுமையான முடிவுக்கான காரணமாக இதனை கூறமுடியுமென பதில் வழங்கப்பட்டது.
இதனையடுத்து கூட்டமைப்பு வாக்கெடுப்பில் கலந்து கொண்டு வாக்களித்திருந்தது. சமுகமளிக்காதவர்களின் தெளிவுபடுத்தல் இந்நிலையில் புதிய அரசாங்கம் பதவியேற்றது முதல் அரசியல் கைதிகளின் விடுதலை, காணிவிடுவிப்பு, அரசாங்க அதிபர் இடமாற்றம் தொடர்பாக ஜனாதிபதியும் பிரதமரும் எமக்கு அளித்தவாக்குறுதிகள் நிறைவேற்றப்படவில்லை. ஆக்கபூர்வமான செயற்பாடுகள் முன்னெடுக்கப்படவில்லை. அதேசமயம் வரவு–செலவுத்திட்டத்தின் மீதான விவாத உரைகளில் அனைத்து தரப்பினரும் அதனை சாடியே உரையாற்றியிருக்கின்றார்கள். நாங்கள் எதிர்ப்புத் தெரிவிக்கப்போகிறோம் என்ற தகவல் வெளியாகிய பின்னரே, அவசர அவசரமாக வடக்கு மாகாணத்திற்கென பத்து திட்டங்களுக்காக நிதியொதுக்குவதற்கு அமைச்சரவை அங்கீகாரத்திற்குக் காத்திருப்பதாகத் தெரிவிக்கப்பட்டுள்ளது.
இருப்பினும், பாராளுமன்றத்தில் வரவு-–செலவுத் திட்டம் கையளிக்கப்படுவதற்கு முன்னதாக வடக்கு மாகாண சபையுடன் கலந்தாலோசிக்காமல் இருந்துவிட்டு எதிர்ப்புகள் எழுந்துள்ள நிலையில், இந்த அறிவிப்பு வந்துள்ளமையையும் சுட்டிக்காட்ட விரும்புகிறோம். இது வெறும் அறிவிப்புதான் இன்னும் அங்கீகாரம் பெறவில்லை இதுவும் இந்த அரசாங்கத்தின் ஏனைய வாக்குறுதிகளைப் போன்றே காற்றில் கரையவிடப்படாது என்பதற்கு எந்தவித உத்தரவாதமும் இல்லை இத்தகைய சூழலில் வரவு–-செலவுத் திட்டத்தின் இரண்டாம் வாசிப்பின் மீதான வாக்கெடுப்பில் ஆதரவளிக்கும் முடிவு எந்த உத்தரவாதத்தின் அடிப்படையில் தமிழ்த் தேசியக் கூட்டமைப்பின் தலைவரால் எடுக்கப்பட்டது என்பது குறித்து எமக்கு குழப்பங்களையும் ஏற்படுத்தியுள்ளது.
இருப்பினும் அரசாங்கத்திற்கு எமது எதிர்ப்பை வெளியிடுமுகமாகவும் தமிழ்த் தேசியக் கூட்டமைப்பின் தலைவருக்கு எமது அதிருப்தியைத் தெரிவிப்பதற்காகவும் எமது வேண்டுகோளை ஏற்று தேர்தல்களில் தமிழ்த் தேசியக் கூட்டமைப்பிற்கு வாக்களித்த மக்களின் உணர்வுகளை மதிக்கின்ற வகையிலும் கூட்டமைப்பின் ஐக்கியத்திற்குக் குந்தகம் ஏற்படாத விதத்திலும் நாம் இந்த வாக்கெடுப்பிலிருந்து ஒதுங்கியிருக்கத் தீர்மானித்தோம் என ஒதுங்கியிருந்தமைக்கான தெளிவுபடுத்தலாக கூட்டமைப்பின் வன்னி மாவட்ட பாராளுமன்ற உறுப்பினர்களான சிவசக்தி ஆனந்தன், சிவமோகன் ஆகியோர் முன்வைத்திருக்கின்றார்கள்.
மறுதலிக்க முடியாதவை ஒரு கருப்பொருள் குறித்தோ அல்லது விடயதானம் குறித்தோ தீர்மானமொன்றை எடுப்பதற்காக வாக்கெடுப்பு செய்யப்படும் போது பெரும்பான்மையான அங்கீகாரம் கிடைக்குமாயின் அதுவே ஏற்றுக்கொள்ளப்படுகின்றது. அதுவே ஜனநாயக தத்துவத்தின் சிறந்த பண்புமாகின்றது. இருப்பினும் பெருவாரியானவர்களின் அங்கீகாரம் பெற்ற அனைத்து தீர்மானங்களும் நூற்றுக்குநூறு வீதம் சரியானவையாக அமைந்திருக்காத சந்தர்ப்பங்களும் காணப்படுகின்றன. அதேபோன்று சிறுவாரியானவர்கள் எதிர்த்த விடயங்கள் காலவோட்டத்தில் சரியானதாக அமைந்த சந்தர்ப்பங்களும் காணப்படுகின்றன.
குறிப்பாக ரஷ்யப் புரட்சி காலகட்டத்தில் போல்ஷ்விக் மற்றும் மென்ஷ்விக்குகளுக்கிடையிலான முரண்பாடு அதே போன்று இந்தியாவில் மகாத்மா காந்தி– - பட்டேல், மகாத்மா காந்தி, - ஜவஹர்லால் நேரு ஆகியோருக்கிடையில் இந்திய விடுதலைப்போராட்டம் தொடர்பாக எழுந்த கருத்து வேற்றுமைகளும் மேற்குறித்த விடயத்தினை சான்று பகர்வதாக உள்ளன. ஆட்சி மாற்றத்தின் பின்னர் ஐக்கிய இலங்கைக்குள் தீர்வுகாண்பதற்கே தமிழர்கள் விரும்புகின்றார்கள் என்பதை உறுதியாக தெரிவித்திருந்த தமிழ்த் தேசியக் கூட்டமைப்பு, நாட்டின் இறைமையை பாதுகாப்பதற்காகவும், நல்லிணக்கத்தை ஏற்படுத்தி நிரந்தர அமைதியை ஏற்படுத்துவதற்காகவும் ஏற்கனவே ஐ.நா. மனித உரிமை சபையில் அதியுச்ச நல்லெண்ண சமிக்ஞையை வெளிப்படுத்திவிட்டது.
தற்போது இரண்டாவது தடவையாகவும் நல்லெண்ண சமிக்ஞை வெளிப்படுத்தப்பட்டுள்ளது. வரவு–செலவுத்திட்ட வாக்கெடுப்பில் கூட்டமைப்பு எதிர்த்து வாக்களித்திருந்தாலோ அல்லாது விட்டால் வெளிநடப்புச் செய்திருந்தாலோ அல்லது சபையில் நாம் கூறிய கருத்துக்களை உள்வாங்கவில்லையென காரணம் கூறி ஆகக்குறைந்தது வாக்கெடுப்பில் பங்குபற்றாது விட்டிருந்தாலோ கூட வாக்கெடுப்பின்போது இவ் வரவு – செலவுத்திட்டம் தோல்வியுற்றிருக்காது. காரணம் ஆளும் தரப்பு வரவு–செலவுத்திட்டத்தை நிறைவேற்றுவதற்கான பெரும்பான்மை பலத்தை முழுமையாகவே கொண்டிருந்தது. எந்த வொரு சந்தர்ப்பத்திலும் வாக்களிப்பில் பெரும் பான்மை கிடைக்காது போய்விடக்கூடிய நெருக்கடி நிலைமை அரசாங்கத்திற்கு ஏற்பட்டிருக்கவில்லை. அவ்வாறிருக்கையில் தமிழ்த் தேசியக் கூட்டமைப்பு ஆதரவாக வாக்களிப்பதற்காக நிபந்தனைகளை விதித்திருந்தாலும் அரசாங்கம் அதனை கருத்திலெடுத்திருக்குமா என்பது சந்தேகமே.
அந்நிலையில் நிபந்தனையின்றி வாக்களிப்பைச் செய்ததன் பின்னர் கோரிக்கைகளை நிறைவேற்றுவார்கள் என்று நம்பிக்கை கொண்டிருப்பது எவ்வளவு தூரம் சாத்தியமான சாணக்கியம் என்பதை பொறுத்திருந்தே பார்க்க வேண்டியுள்ளது. எது எவ்வாறாயினும் வரவு– செலவுத்திட்டம் குறைகள் நிறைந்தவை என்பதை பகிரங்கமாக தமிழ்த் தேசியக் கூட்டமைப்பின் பாராளுமன்ற உறுப்பினர்கள் அனைவருமே கூறியிருக்கின்றார்கள்.
அரசியல் விஞ்ஞானத்தில் காலத்தின் தேவையறிந்து முடிவுகளை எடுப்பது தவறல்ல. ஆனால் அவை தீர்க்க தரிசனமானவையாக அமையவேண்டும். வாய் வார்த்தையை மட்டுமே நம்பி அள்ளி ஆணை வழங்கிய சாதாரண பொதுமக்களின் விடியலை உறுதிப்படுத்துவதாய் இருக்கவேண்டும். தலைநகரில் தங்கியிருக்கும் பாராளுமன்ற உறுப்பினர்களை தவிர கூட்டத்தொடர் நிறைவடைந்ததும் சொந்தமண்ணிற்கு திரும்பும் பாராளுமன்ற உறுப்பினர்களின் வீட்டு வாசலில் நீண்ட வரிசையில் கூடும் பொதுமக்கள் வேலைவாய்ப்பு, காணி விடுவிப்பு, மீள்குடியேற்றம், வாழ்வாதாரம் போன்ற விடயங்களுக்கான உதவிகளை கோரிநிற்கும் போது வரவு –செலவுத்திட்டத்திற்கு ஆதரவாக வாக்களித்த பாராளுமன்ற உறுப்பினர்கள் எத்தகைய பதில்களை வழங்கப் போகின்றனர் என்பதே தற்போதைய கேள்வி. மலைபோல் மக்கள் சக்தியிருக்கும் வரையில் தான் எந்த புதிய சவாலையும் சாதிக்கமுடியும் என்பது திண்ணம்.
-பிரம்மாஸ்திரன்-
