இனப்பிரச்சினைக்கு தீர்வுகாணும்வகையில் புதிய அரசியல் அமைப்பு அமையும் - ராஜித கூறுகிறார்
போர்க்குற்ற விசாரணை கள் மாத்திரமே தமிழ் மக்களின் பிரச்சினை என்றால் அதற்கான தீர்வு பெற்றுக்கொடுப்பது கடினமான ஒன்றல்ல. ஆனால் அதையும் தாண்டி தமிழ் மக்களின் உரிமைகளை வென்றுகொடுக்க வேண்டும் என்றே அரசாங்கம் முயற்சிக்கின்றது என அமைச்சரவை பேச்சாளரும் சுகாதார அமைச்சருமான ராஜித சேனாரத்ன தெரிவித்தார்.
சர்வதேச தேவைக்காகவும் புலம்பெயர் அமைப்புகளின் குறுகிய நோக்கத்தை நிறைவேற்றுவதற்காகவும் தமிழ் மக்களின் பிரச்சினைகளை திசை திருப்ப வேண்டாம் எனவும் அவர் குறிப்பிட்டார்.
தமிழ் மக்களின் பிரச்சினைகள் முழுமையாக தீரும் வகையில் புதிய அரசியல் அமைப்பு அமைய வேண்டும் என தமிழ்த் தேசியக் கூட்டமைப்பு தெரிவித்துள்ள நிலையில் அரசியல் அமைப்பின் மூலமாக நீண்டகால பிரச்சினைகளை தீர்க்க அரசாங்கம் நடவடிக்கை எடுக்குமா என ஊடகம் ஒன்று எழுப்பிய கேள்விக்கே அமைச்சர் மேற்கண்டவாறு குறிப்பிட்டார்.
இது தொடர்பில் அவர் மேலும் கூறுகையில்,
தமிழ் மக்களின் நீண்டகால பிரச்சினைகள் என்னவென்பது எமக்கு நன்றாகவே தெரியும். அவர்களின் சொந்த இடங்களை அபகரித்தமை, சட்டவிரோதமாக அல்லது அனாவசியமாக கைது செய்தமை, அவர்களின் உரிமைகளை பெற்றுக்கொள்வதில் உள்ள தடைகள் என்பனவே தமிழ் மக்கள் நீண்டகாலமாக அனுபவித்து வரும் பிரச்சினைகளாகும்.
இந்த விடயங்களை கடந்த காலத்தில் அரசாங்கம் சரியாக செய்து கொடுக்காத காரணத்தினால் தான் சர்வதேச தரப்பின் மீது நம்பிக்கை கொண்டு அவர்கள் செயற்பட்டு வருகின்றனர். இதில் குறைகூறும் வகையில் எதுவும் இல்லை.
ஆனால் தமிழ் மக்களை பிரதிநிதித்துவப்படுத்தும் அரசியல் கட்சிகள் தமது பாதையை சரியாக தெரிவுசெயாதமையே பிச்சினையாக உள்ளது. தமிழ் மக்களின் பிரச்சினைகளை அரசாங்கத்துடன் பேசி அவர்களின் சலுகைகளை வென்றுகொள்ள வேண்டும். அதற்கு அரசாங்கம் தயாராகவே உள்ளது. அதேபோல் அடிப்படை பிரச்சினைகளை பூர்த்தி செய்து வடக்கு கிழக்கு பகுதிகளையும் அபிவிருத்தி அடையச் செய்யவேண்டும். அதை விடுத்து போர்க்குற்றம் என்ற ஒன்றை மாத்திரம் பிடித்துக்கொண்டு சர்வதேசத்தின் பின்னால் பயணிப்பதால் எந்த நன்மைகளும் கிடைக்கப் போவதில்லை.
அதையும் தாண்டி போர்க்குற்ற விசாரணைகள் மட்டுமே தமிழ் மக்களின் பிரச்சினை என்றால் அதற்கு தீர்வு விரைவில் கிடைத்துவிடும். இறுதிக்கட்ட யுத்தத்தில் இடம்பெற்ற போர்க்குற்ற விசாரணைகள் தொடர்பில் உண்மைகளை கண்டறியும் பொறிமுறைகள் அனைத்தையும் நாம் முன்னெடுத்து வருகின்றோம். அதேபோல் காணாமல்போனோர் தொடர்பில் விசாரணைகளும் தீவிரமாக முன்னெடுக்கப்பட்டு வருகின்றது.
அதையும் தாண்டி உள்ளக விசாரணைகள் மற்றும் சர்வதேச ஒத்துழைப்புடன் கூடிய ஆலோசனைகளை பெற்று அடுத்தகட்ட விசாரணைகளை முன்னெடுக்கவும் அரசாங்கம் தயாராகிக்கொண்டிருக்கின்றது.
அதேபோல் போர்க்குற்ற விசாரணைகள் தொடர்பில் நீதிமன்ற சுயாதீன செயற்பாடுகளுக்கென விசேட சட்டமூலம் ஒன்றையும் அடுத்த ஆண்டு நடுப்பகுதிக்குள் கொண்டுவர தீர்மானித்துள்ளோம். ஆகவே போர்க்குற்ற விசாரணைகள் தொடர்பில் அரசாங்கம் தெளிவாக தமது நகர்வுகளை முன்னெடுத்து வருகின்றது.
அதேபோல் அரசியல் பிரச்சினை மற்றும் இனப்பிரச்சினைக்கு தீர்வு காணும் வகையில் புதிய அரசியல் அமைப்பு அமையும். நீண்டகால பிரச்சினைகளை தீர்க்க வேண்டும் என்ற நிலைப்பாட்டில் நாம் உள்ளோம். ஆகவே அடுத்த வருட ஆரம்பம் நாட்டு மக்களுக்கு நன்மையளிக்கும் வகையில் அமையும் என்பது சந்தேகம் இல்லை.
மக்களின் அடிப்படை பிரச்சினைகளுக்கு தீர்வு பெற்றுககொள்ளப்பட்ட பின்னர் படிப்படியாக ஏனைய பிரச்சினைகளை தீக்க முடியும். ஆகவே அதற்கேற்றால் போல் தமிழ் அரசியல் கட்சிகளும் தமது ஒத்துழைப்பை வழங்க வேண்டும்.
அதை விடுத்து சர்வதேச தேவைக்காகவும், புலம்பெயர் அமைப்புகளின் குறுகிய நோக்கத்தை நடைமுறைப்படுத்தவும் எவரும் நாட்டுக்குள் குழப்பத்தை ஏற்படுத்த வேண்டாம். வெறுமனே ஒருசில காரணங்களை முக்கியத்துவப்படுத்தி ,தமிழ் மக்களையும் திசைதிருப்பி வென்றெடுத்த ஜனநாயகத்தை குழப்ப வேண்டாம் என குறிப்பிட்டார்.
