அதியுச்ச அதிகாரப் பகிர்வுடன் சமஷ்டி முறைமையில் அரசியல் தீர்வு அவசியம்! -சிவசக்தி ஆனந்தன் கோரிக்கை
எமது தாயகத்தில் அதியுச்ச அதிகாரப் பகிர்வுடனான சமஷ்டி அடிப்படையிலான தீர்வொன்றையே நாம் கேட்கின்றோம். புரையோடிப்போயுள்ள இனப்பிரச்சினைக்கு இதுவே நிரந்தரத் தீர்வாக அமையும். எனினும் முன்னைய அரசாங்கம் சர்வாதிகாரமாக செய்தவற்றையே இன்றைய அரசாங்கம் நல்லாட்சி எனும் பெயரில் செய்து வருகின்றது.
அவ்வாறானதொரு அரசாங்கத்தைப் பாதுகாக்கும் தார்மீக கடமை எமக்கில்லை. இதனை அனுமதிக்கும் அளவில் எமக்கு வாக்களித்தவர்கள் தார்மீகத் தரம் தாழ்ந்தவர்களும் அல்ல என்று தமிழ்த் தேசியக் கூட்டமைப்பின் வன்னி மாவட்ட பாராளுமன்ற உறுப்பினர் சிவசக்தி ஆனந்தன் நேற்று பாராளுமன்றத்தில் தெரிவித்தார்.
பாராளுமன்றத்தில் நேற்று செவ்வாய்க்கிழமை இடம்பெற்ற 2016 ஆம் நிதியாண்டுக்கான வரவு செலவுத் திட்டத்தின் மாகாண சபைகள் மற்றும் உள்ளூராட்சி மாநகர மற்றும் மேல் மாகாண அபிவிருத்தி ஆகிய அமைச்சுக்கள் மீதான குழுநிலை விவாதத்தில் கலந்து கொண்டு உரையாற்றுகையிலே மேற்கண்டவாறு தெரிவித்தார்.
சிவசக்தி ஆனந்தன் எம்.பி இங்கு மேலும் கூறுகையில்,
செல்வந்தர்களை மேலும் செல்வந்தர்களாக்குவதையும் வறியவர்களை மேலும் வறியவர்களாக்குவதையும் நோக்கமாக கொண்ட இந்த வரவு செலவுத் திட்டத்தைப்போன்றே மாகாணங்களுக்கான நிதி ஒதுக்கீட்டிலும் வருமானம் மிக்க மாகாணங்களுக்கு அதிக ஒதிக்கீடும் நிவாரணத்தை வேண்டி நிற்கின்ற மாகாணங்களுக்கு குறைந்த ஒதுக்கீடுகளும் மேற்கொள்ளப்பட்டுள்ளன.
மாகாண சபைக்கான நிதி ஒதுக்கீட்டிலும் வடக்கு கிழக்கு மாகாணங்கள் மாற்றான் தாய் மனப்பான்மையுடனேயே நடத்தப்பட்டுள்ளன. நாம் சகோதரத்துவத்துடன் கைகோர்த்து இணையாக நடப்பதையே விரும்புகின்றோம். மாறாக யாரையும் எமது தோள்களில் சுமப்பதற்கு நாம் தயாரில்லை.
எமது தாயக பிரதேசத்தில் அதியுட்ச அதிகார பகிர்வுடனான சமஷ்டி அடிப்படையிலான தீர்வொன்றே இந்த நாட்டில் புரையோடிபோயுள்ள இனப்பிரச்சினைக்கான நிரந்தர தீர்வாக அமையும் என்பதை இந்த சபையின் கவனத்திற்கு கொண்டு வருகின்றேன்.
இந்த நாட்டில் யுத்தம் நடைபெற்ற காலத்தை விட அதன் பின்னரான காலப்பகுதிகளில் தொடர்ச்சியாக நாட்டின் பாதுகாப்பிற்கான நிதி அதிகரித்து வந்துள்ளதை நாம் இந்த அவையில் சுட்டிக்காட்டி வந்துள்ளோம்.
2016 ஆம் ஆண்டிற்கான வரவு செலவுத் திட்டத்திலும் 306.7 பில்லியன் ரூபா (30 ஆயிரத்து 670 கோடி) பாதுகாப்பிற்காக ஒதுக்கப்பட்டுள்ளது. இங்கு ஒன்றை சுட்டிக்காட்ட விரும்புகின்றேன் . கடந்த அரசாங்கத்தின் இறுதிப் பகுதி வரை சட்டம் ஒழுங்கிற்கு என்று தனியான ஒரு அமைச்சு இருக்கவில்லை. அது பாதுகாப்பு அமைச்சிடமே இருந்தது.
இப்பொழுது அதற்கான அமைச்சு தனியாக உருவாக்கப்பட்டு அதற்கென 76.9 பில்லியன் ரூபா ஒதுக்கப்பட்டுள்ளது. ஏற்கனவே பாதுகாப்பு துறைக்கான ஒதுக்கீடு அதிகரித்திருக்கையில் மேலதிகமாக சட்டம் ஒழுங்கு அமைச்சிக்கென்று தனியாக நிதி ஒதுக்கப்பட்டிருப்பது எத்தகைய சிக்கன நடவடிக்கை என்பதை அரசாங்கம் தான் இந்த சபைக்கும் மக்களுக்கும் தெளிவுப்படுத்த வேண்டும்.
அடுத்த ஆண்டுக்கான வரவு செலவுத் திட்டத்தின் பாதுகாப்புக்காக ஒதுக்கப்பட்டுள்ள 306.7 பில்லியன் ரூபா இலங்கையின் வரலாற்றில் இதுவரையில்லாத அதியுட்ச ஒதுக்கீடாகும். இந்த வரலாற்றுச் சாதனையை புரிவதற்கு அரசாங்கம் நாட்டு மக்களை கடன்காரர்கள் ஆக்கியுள்ளது. ஒன்பது மாகாணங்களுக்கும் ஒதுக்கப்பட்டுள்ள 237.9 பில்லியன் நிதியை விட பாதுகாப்பிற்கு 67 வீதம் கூடுதலாக ஒதுக்கப்பட்டுள்ளது.
எம்மை கடன்காரர்களாக்கி எமது வரிப்பணத்தில் எமது பகுதியில் நிலைப்பெறச் செய்துள்ள இராணுவத்திற்கான இந்நிதி ஒதுக்கீட்டை நாம் எவ்வாறு ஆதரிக்க முடியும்? இந்த நாட்டை யாரிடமிருந்து பாதுகாப்பதற்காக இவ்வளவு பெருந்தொகையான மக்களின் வரிப்பணம் செலவிடப்படுகிறது? நிச்சயமாக தற்பொழுது வெளிநாட்டில் இருந்து இந்த நாட்டிற்கு எந்தவித பாதுகாப்பு அச்சுறுத்தலும் இல்லை.
பெரும்பான்மை மக்களின் நன்மதிப்பையும் ஆதரவையும் உடைய அரசாங்கம் என்றால் மக்களின் பாதுகாப்பிற்கு இவ்வளவு பாரிய தொகை தேவை இல்லை. சொந்த நாட்டு மக்களிடம் இருந்து தன்னைப் பாதுகாக்க விரும்பும் அரசாங்கம் என்றால் நிச்சயம் இத்தொகை தேவைப்படும்.
ஆனால் அவ்வாறான ஒரு அரசாங்கத்தை மக்களிடம் இருந்து பாதுகாக்கும் தார்மீகக் கடமை எமக்கில்லை. எம்மைத் தெரிவு செய்த மக்கள் அதனை அனுமதிக்கவும் மாட்டார்கள். அதை அனுமதிக்கும் அளவிற்கு அவர்கள் தார்மீகத் தரம் தாழ்ந்தவர்களும் இல்லை.
போரினால் பாதிக்கப்பட்ட எமது மக்களுக்கு ஏற்பட்ட உயிரிழப்பு சொத்திழப்பு பெண்களைத் தலைமைத்துவமாகக் கொண்ட குடும்பங்களின் வாழ்வாதாரத் தேவைகள் முறையான மீள்குடியேற்றம் போரினால் அங்கவீனமாக்கப்பட்டவர்களின் வாழ்வாதாரம் போன்ற இன்னோரன்ன விடயங்களில் முந்தைய அரசாங்கம் செய்த அதே புறக்கணிப்பையே இந்த அரசாங்கமும் செய்திருக்கிறது.
முந்தைய அரசாங்கம் சர்வதிகாரமாகச் செய்தவற்றையே இந்த அரசாங்கம் நல்லாட்சி என்ற பெயரில் தொடர்கின்றது. இனப்பிரச்சினைக்கான நிரந்தரத் தீர்வைக் காண்பதைவிடுத்து இந்த நாட்டை மாறிமாறி ஆட்சி செய்தவர்களைப் போன்றே இந்த அரசாங்கமும் பாதுகாப்பைப் பலப்படுத்துவது ஏன்? நல்லாட்சி என்பது பேச்சில் இன்றி செயலில் இருக்க வேண்டும்.
இந்த நாட்டை ஆட்சி செய்த எந்தவொரு ஜனாதிபதியோ அல்லது பிரதமரோ தமிழ் மக்களின் மனங்களை வெற்றிக் கொண்டவர்களாக இருந்ததில்லை. இந்நாட்டின் இனப்பிரச்சினை காரணமாக பல இலட்சக்கணக்கான தமிழ் மக்கள் தமது உயிர்களை இழந்துள்ளனர். பல்லாயிரக்கணக்கான சொத்துக்களை அழிக்கப்பட்டுள்ளன.
பல்லாயிரக்கணக்கான இளைஞர் யுவதிகள் வாழ வழியின்றியிருக்கின்றனர். ஆயிரக்கணக்கான குழந்தைகள் பெற்றோரை இழந்து தவிக்கின்றன . ஆனால் மாகாண சபைக்கான அதிகாரங்கள் பறித்தெடுக்கப்படுகின்றன.
இது சிறிய நாடு வடக்கு கிழக்கிற்கு சமஷ்டி அல்லது சுயாட்சி வழங்கினால் நாடு தனியானப் பிரிந்துவிடும் என்றும் இந்த சிறிய நாட்டில் மாகாணத்திற்கு அதிகாரங்களை வழங்கிவிட்டால் மத்திய அரசாங்கத்திற்கும் மத்திய அமைச்சர்களுக்கும் என்ன வேலை? என்றும் அமைச்சர்களும் அதிகாரிகளும் கேட்கின்றனர்.
நாங்கள் வடக்கு கிழக்கிற்கு மட்டுமே சமஷ்டி அடிப்படையிலான அரசியல் தீர்வைக் கோருகின்றோம். இந்த நாட்டின் முழுமைக்கும் அதனைத் கொடுப்பதா? வேண்டாமா? என்பதை நீங்களே தீர்மானியுங்கள்.
எங்களுக்கு என்ன வேண்டும் என்பதைத்தான் நாங்கள் கேட்க முடியும். இது நாட்டைப் பிளவுப்படுத்துவதோ அல்லது நடைமுறைச் சாத்தியமற்றதோ அன்று. அவ்வாறு கூறுவதானது எமக்கு வியப்பையளிக்கின்றது.
திவிநெகும சட்ட மூலத்தை இந்த அரசாங்கம் உடனடியாகத் திரும்பப் பெறவேண்டும். நல்லிணக்கம் என்பது செயலிலேயே தங்கியுள்ளது. மாற்றாந்தாய் மனப்பான்மையுடன் மாகாண சபைகளுக்கு நிதியொதுக்கீடு செய்யப்படுகையில் இந்த வரவு செலவுத்திட்டத்தை எத்தகைய நல்லெண்ண அடிப்படையில் ஆதரிப்பது?
நல்லிணக்கமும் நல்லெண்ணமும் ஒரு தரப்பில் இருந்து மட்டும் வந்தால் போதாது. அது இரண்டு தரப்புக்கும் பொதுவானது. நாம் எமது நல்லிணக்கத்தையும் நல்லெண்ணத்தையும் சுதந்திரத்திற்கான போராட்டத்திலிருந்து இன்று வரை வெளிப்படுத்தியே வந்துள்ளோம்.
இந்நாட்டில் தமிழ் மக்களுக்கு எதிராக மேற்கொள்ளப்பட்டுவரும் ஒடுக்குமுறைகளை மற்றொரு பங்குதாரர்களான சிங்கள சகோதரர்களுக்கு எடுத்துச் சொல்லி, தமிழ் மக்களுக்கான அதிகாரங்களை வழங்கி அனைவரும் ஒன்றுபட்டு இத்தேசத்தைக் கட்டியெழுப்புவதற்கான வழிவகைகளைச் செய்ய இந்த அரசாங்கம் முன்வர வேண்டும் என்றார்.
