இன்றைய காலம் சர்ச்சைக்குரிய சூழலாகவே உள்ளது - சி.சிறிதரன்
தமிழ்த் தேசியக் கூட்டமைப்பு மக்களின் எண்ணங்கள் சிந்தனைகளின் அடிப்படையிலே பயணிக்கும். இதில் இருந்து மாறாது. ஆனால் இன்றைய காலம் சர்ச்சைக்குரிய சூழலாக இருக்கிறது. எனவே நாம் நிதானமாக, தெளிவான பாதையில் பயணிக்க வேண்டுமென பாராளுமன்ற உறுப்பினர் சி.சிறிதரன் தெரிவித்தார்.
இலங்கை முதலுதவிச் சங்க தொண்டர்களுக்கான சான்றிதழ் வழங்கும் நிகழ்வும் சின்னம்சூட்டும் நிகழ்வும் நேற்று முன்தினம் தொண்டமனாறு கிராம அபிவிருத்திச் சங்கத்தில் நடைபெற்றபோது உரையாற்றுகையிலேயே அவர் இதனைத் தெரிவித்தார்.
அவர் அங்கு மேலும் தெரிவிக்கையில்,
இன்றைய காலகட்டம் ஒரு நெருக்கடியாக ஒரு சர்ச்சைக்குரிய காலமாக இருக்கிறது. மக்கள் தெ ளிவாக இருக்கவேண்டும். தெளிவு தான் மிக முக்கியமானது. ஒரு வழிப்பாதையில் இருந்து நாங்கள் மாறாது ஒற்றுமையாக ஒரே பாதையில் பயணம் செய்யவேண்டும்.
தற்போது பலவிதமான சந்தேகங்கள் இருக்கின்றன. வடக்கு, கிழக்கு இணைக்கப்படுமா? தமிழ் மக்களுக்கு நீதியான தீர்வு கிடைக்குமா? தமிழ் மக்கள் விரும்புகின்ற காணி, பொலிஸ் அதிகாரம் கிடைக்குமா? ரணில் விக்கிரமசிங்கவை தமிழ் மக்கள் நம்பலாமா என்ற சந்தேகங்கள் நிலவுகின்றன. இந்த சந்தேகங்கள் மக்களைக் குழப்ப நிலைக்குத் தள்ளியுள்ளது. இந்த குழப்பநிலைக்குள் இருந்து விடுபட்டு நாங்கள் எங்களை இழக்காமல் இருக்கவேண்டும்.
ஒரு சங்கத்தில் ஒற்றுமையாக இருப்பது என்றால் பணிக்காக, சேவைக்காக ஒருமித்து நிற்கிறீர்கள். அதேபோல் தான் நாங்களும் மக்களுக்காக மக்களின் ஆணைகளுடன் புறப்படும்போது அவர்களுடைய எண்ணங்களுக்கு சிந்தனைக்கு பாதகம் ஏற்படாத வகையில் நடக்கவேண்டிய கடமை தமிழ்த் தேசியக் கூட்டமைப்பிற்கு இருக்கின்றது.
வடக்கு, கிழக்கு இணைந்து நீடித்து நிலைத்து நிற்கக் கூடிய சர்வதேச அங்கீகாரம் பெற்ற சமஷ்டி அடிப்படையிலான தீர்வை அரசு முன்வைக்கும் போதுதான் அதனை தமிழ்த் தேசியக் கூட்டமைப்பு ஏற்றுக் கொள்ளும். அதில் மக்களும் தெ ளிவாக உள்ளனர்.
எங்களுடைய தேசம் சார்ந்த சுயநிர்ணய உரிமையை அடிப்படையாக வைத்து நாங்கள் எங்களை ஆளுகின்ற சுயாட்சியைப் பெறுகின்ற வகையில் வடக்கு கிழக்கு இணைந்த பொலிஸ், காணி, நிதி அதிகாரம் கொண்ட எங்கள் பிரதேசங்களை அபிவிருத்தி செய்யும் ஆட்சிமுறை எமக்கு வேண்டும்.
வடக்கு, கிழக்கில் இணைந்த எங்களுடைய மண்ணில் நிரந்தரமான கெளரவமான அரசியல் தீர்வை சிங்கள அரசியல் தலைமைகள் தங்களுடைய இடர்பாடுகள் இனவாதங்களை கைவிட்டு வழங்கும்போது நாங்கள் மன்னிப்புக் கொடுப்பது என்பது அதற்கு பிற்பாடு உள்ள விடயம்.
அதற்கு முன்பு எங்களை மன்னியுங்கள். உங்களுக்கு தீர்வைத் தரமுடியாது என்கின்ற விடயங்களை நாங்கள் நம்பமுடியாது. இதனால்தான் நாங்கள் மிக நெருக்கடியான காலமாக இதைப் பார்க்கவேண்டும்.
ஆகவே, நாங்கள் ஒரு பலமாக தெ ளிவான பாதையில் பயணிக்க வேண்டும். நாங்கள் நம்பமுடியாத தலைவர்கள் தான் இன்று சிங்கள அரசியல் தலைமையில் இருக்கின்றார்கள். அவர்கள் எங்களுடைய சூழலை அவதானமாகப் பார்த்துக் கொண்டு இருக்கிறார்கள்.
தமிழர்களை எவ்வாறு சின்னாபின்ன மாக்குவது புலம் பெயர் தமிழர்களை சிதைப்பதை எமது பேரம் பேசும் சக்தியை உழைப்பதை அவதானிக்கிறார்கள். இவற்றையெல்லாம் அவதானித்து நாம் ஒருமித்து ஒரே பாதையில் பயணிக்க வேண்டும் என்றார்.
