போர்க்குற்ற விசாரணைகள் குறித்த கலந்தாலோசனை ஜனவரி மாதத்தில் - ஹர்ச டி சில்வா தெரிவிப்பு
போர்க்குற்ற விசாரணைகள் தொடர்பிலான கலந்தாலோசனை ஜனவரி மாதத்தில் மேற்கொள்ளப்படும். பொறுப்புக்கூறல் விடயத்தில் நாம் பின்னிற்கப்போவதில்லை என அரசாங்கம் தெரிவித்துள்ளது. ஜெனிவா கூட்டத்தொடருக்கு முகம்கொடுக்ககூடிய வகையில் செயற்பாடுகளை கையாண்டுள்ளதாகவும் அரசாங்கம் குறிப்பிட்டது.
போர்க்குற்றம் உள்ளிட்ட மனித உரிமை மீறல்கள் தொடர்பிலான பொறுப்புக் கூறல் விடயத்தில் அரசாங்கம் உறுதியான பொறிமுறைகளை கையாளாத நிலையில் எதிர்வரும் ஜூன் மாதம் ஐ.நா.மனித உரிமைப் பேரவையின் கூட்டத்தொடரின்போது இலங்கை விவகாரங்கள் உள்ளடக்கப்பட்டுள்ள நிலையில் இது குறித்து ஊடகம் ஒன்றுக்கு கருத்து வெளியிட்ட வெளிவிவகார பிரதி அமைச்சர் ஹர்சடி சில்வா மேற்கண்டவாறு குறிப்பிட்டார்.
அவர் மேலும் கூறுகையில்,
இலங்கை மீதான சர்வதேச தாக்கம் கடந்த காலத்தில் எவ்வாறு இருந்தது என்பது குறித்து புதிதாக கூற வேண்டிய தேவை இல்லை. யுத்தம் முடிவுக்கு கொண்டுவரப்பட்ட பின்னர் கடந்த ஐந்து ஆண்டுகளின் முன்னைய அரசாங்கம் பொறுப்புக்கூறல் விடயத்தில் மிகவும் மோசமான வகையில் செயற்பட்டது.
அதேபோல் யுத்தத்தின் போது எவ்வாறு மனித உரிமை மீறல்கள் இடம்பெற்றதோ அதேபோல் யுத்தம் முடிவடைந்து ஐந்து ஆண்டுகளிலும் ஜனநாயக செயற்பாடுகளுக்கு பாரிய அச்சுறுத்தல் நிலைமை காணப்பட்டது. இதேபோல் கடந்தகால குற்றச்சாட்டுகள் தொடர்பில் ஆராய முன்னர் யுத்தத்தின் பின்னரான மக்களின் பிரச்சினைகளை தீர்க்கும் பொறிமுறை ஒன்றை பெற்றுக்கொடுக்க வேண்டும் என்ற நிலைப்பாடு இருந்தது. அவ்வாறு இருக்கையில் கடந்த ஜனவரி மாத ஆட்சி மாற்றமானது ஜனநாயகத்தை வென்றெடுக்கும் வகையில் அமைந்துள்ளது.
அதேபோல் ஆட்சி மாற்றத்தின் பின்னர் நாம் எதிர்கொண்ட ஐ.நா. மனித உரிமைபேரவையின் கூட்டத்தொடரையும் வெற்றிகரமாக முகம்கொடுக்க முடிந்தது. கடந்த காலத்தில் எம்மீது முன்வைக்கப்பட்ட குற்றச்சாட்டுகள் அனைத்தையும் விசாரணைகள் மூலமாக தெளிவுபடுத்தும் ஒரு பொறிமுறையை கையாளவேண்டிய கட்டாயமும் அரசாங்கத்திற்கு உள்ளது. எனினும் முன்னைய அரசாங்கம் விசாரணைப் பொறிமுறையை கையாள்வதில் தயங்கியமையும், உண்மைகளை மூடிமறைக்க முயன்றமையுமே நாட்டிற்கு எதிரான அழுத்தங்கள் மேலும் அதிகரிக்க காரணமாக அமைந்தன.
எனினும் ஐக்கிய நாடுகள் சபையின் பிரேரணையை நாம் ஏற்றுக்கொண்டுள்ளதுடன் உள்ளக பொறிமுறைகளின் விதிமுறைக்கு அமைய கலப்பு விசாரணை முறைமை ஒன்றை கையாள்வதாகவும் அரசாங்கம் தெரிவித்துள்ளது.
அதற்கமைய நாம் எமது நடவடிக்கைகளை மேற்கொண்டு வருகின்றோம். குறிப்பாக காணாமல்போனோரை கண்டறியும் ஆணைக்குழு மூலமாக உண்மையான வாக்கு மூலங்களையும், சரியான தகவல்களையும் பெற்று வருகின்றோம். அதேபோல் வடக்கிலும் கிழக்கிலும் மீள்குடியேற்ற நடவடிக்கைகளை மேற்கொண்டு வருகின்றோம். மக்களின் அடிப்படை பிரச்சனைக்கான தீர்வை அரசாங்கம் வழங்கி வருகின்றது. தமிழ் மக்களின் வாழ்வாதார மற்றும் அடிப்படை பிரச்சினைக்கு தீர்வு பெற்றுக்கொடுக்கப்பட்டுள்ளது.
அதேபோல் போர்க்குற்ற விசாரணைகள் தொடர்பில் எவ்வாறான பொறிமுறைகளை கையாள்வது என்பது தொடர்பிலான கலந்தாலோசனைகள் எதிர்வரும் ஜனவரி மாதம் ஆரம்பமாகும். ஜனவரியில் ஜனாதிபதி மற்றும் பிரதமர் தலைமையில் முக்கிய கலந்துரையாடல்கள் மேற்கொள்ளப்பட்டு மார்ச் மாதத்தினுள் எவ்வாறு விசாரணைகளை முன்னெடுப்பது என்பது தொடர்பில் தீர்வு எட்டப்படும்.
போர்க்குற்ற விசாரணைகள் தொடர்பிலான பொறிமுறைகள் துரிதமாக கையாளப்பட்டு வருகின்றது. ஆனால் யாரையும் திருப்திப்படுத்த பக்கசார்பான நடவடிக்கைகள் எவற்றையும் முன்னெடுக்க முடியாது. ஆகவே பொறுப்புக்கூரல் தொடர்பில் அரசாங்கம் சரியாக கையாளும். அதேபோல் எதிர்வரும் ஜெனிவா கூட்டத்தொடரில் முகம்கொடுக்கக்கூடிய வகையில் இப்போதே செயற்பாடுகளை முன்னெடுத்துள்ளோம் என அவர் குறிப்பிட்டார்.
