காணாமல் போனதற்கு காரணமானவர்களின் பெயர்களை வெளியிடுவோம்! என்கிறார் பரணகம
ஆணைக்குழு முன்னால் சாட்சியமளித்த மக்கள் குற்றஞ்சாட்டிய தரப்பினரின் பெயர் விபரங்களை காணாமல் போனோரை கண்டறியும் ஜனாதிபதி ஆணைக்குழுவின் அறிக்கையில் வெளியிடுவோம் என்று ஆணைக்குழுவின் தலைவர் முன்னாள் நீதியரசர் மெக்ஸ்வல் பரணகம நேற்று தெரிவித்தார்.
யாழ். குடா நாட்டில் கடந்த ஆறு தினங்களாக காணாமற்போனோரின் உறவுகளிடமிருந்து சாட்சியங்கள் பதிவு செய்யப்பட்டதாகவும் ஆறு தினங்களில் சுமார் 900 பேரிடமிருந்து சாட்சியங்கள் பெறப்பட்டதாகவும் அவர் தெரிவித்தார்.
சாட்சியங்களின் போது வெளிவந்த தகவல்களைக் காணாமற் போனதற்கு காரணமாகவிருந்த படை அதிகாரிகள், அரசியல் கட்சி உறுப்பினர்கள் தொடர்பாக சாட்சிகள் பல பெயர்களை வெளியிட்டுள்ளனர். இந்தப் பெயர்கள், கட்சிகள் குறித்து ஆணைக்குழுவின் அறிக்கையில் வெளியிடுவோம் என்றும் அவர் தெரிவித்தார்.
ஆணைக்குழு இதுவரை மேற்கொண்ட விசாரணைகளில் சுமார் 5000 பேரிடமிருந்து சாட்சியங்கள் பதிவு செய்யப்பட்டுள்ளன என்றும் அவர் தெரிவித்தார்.
