வட கிழக்கு மக்களின் மீள்குடியேற்றம் தொடர்பில் ஜனாதிபதி தலைமையில் புதனன்று கலந்துரையாடல்
வடக்கு, கிழக்கு மாகாணங்களில் மக்களின் மீள்குடியேற்றம் தொடர்பாக ஜனாதிபதி மைத்திரிபால சிறிசேன தலைமையில் நாளை மறுதினம் விசேட கலந்துரையாடலொன்று நடைபெறவுள்ளது.
இக்கலந்துரையாடலில் பங்கேற்குமாறு மீள்குடியேற்றம் புனர்நிர்மாணம் மற்றும் இந்து சமய அலுவல்கள் அமைச்சர் டி.எம்.சுவாமிநாதன் மற்றும் கைத்தொழில் வணிக அமைச்சர் ரிஷாட் பதியுதீன் ஆகியோருக்கு ஜனாதிபதியின் செயலாளர் பி.பீ.அபயகோன் அழைப்புவிடுத்துள்ளார்.
இவ்வழைப்பு தொடர்பில் அமைச்சர் டி.எம்.சுவாமிநாதன் தெரிவிக்கையில்,
யுத்தம் நிறைவடைந்து ஐந்து வருடங்கள் கடந்த நிலையிலும் வடக்கு, கிழக்கு மக்களின் மீள்குடியேற்ற செயற்பாடுகள் முழுமை பெற்றிருக்கவில்லை. தற்போது நாட்டில் புதிய மாற்றம் ஏற்பட்டுள்ளது. நாம் அனைத்து மக்களையும் தமது சொந்த நிலத்தில் மீளவும் குடியேற்றுவதற்கான நடவடிக்கைகளை முன்னெடுத்து வருகின்றோம்.
இந்த செயற்பாடுகள் எனது அமைச்சின் கீழாக முறையாக திட்டமிட்டு முன்னெடுக்கப்படுகின்றன. இதன் அங்கமாக மக்களுக்குச் சொந்தமான காணிகள் படிப்படியாக விடுவிக்கப்பட்டு வருகின்றன. அதேநேரம் வீடுகளை அமைப்பதற்கான கேள்வி கோரல் உள்ளிட்ட விடயங்களும் முன்னெடுக்கப்பட்டு வருகின்றன.
எம்மைப்பொறுத்தவரையில் தமிழ், முஸ்லிம் மக்கள் என்ற பாகுபாடுகளை நாம் கருதவில்லை. சிறுபான்மை சமூகத்தின் மீள்குடியேற்றம், உட்கட்டமைப்பு மேம்பாடு, அபிவிருத்தி போன்ற விடயங்களை எந்தவொரு பக்கச்சார்பு நிலையிலிருந்து முன்னெடுக்காது வெளிப்படைத்தன்மையுடன் அனைத்து மக்களையும் கருத்தில் கொண்டு முன்னெடுத்து வருகின்றோம். அவ்வாறான நிலையில் அப்பணிகளை மேலும் முன்னெடுத்துக்கொள்வதற்கு ஜனாதிபதி தலைமையிலான கலந்துரையாடல் ஆக்கபூர்வமானதாக அமையும் என்றார்.
இவ்வழைப்பு தொடர்பில் அமைச்சர் ரிஷாட் பதியுதீன் கருத்து வெளியிடுகையில்,
வடமாகாணத்திலிருந்து முஸ்லிம்கள் வெளியேற்றப்பட்டு 25 வருடங்கள் கழிந்த நிலையிலும் இவர்கள் தொடர்பில் ஆக்கபூர்வமான நடவடிக்கைகள் எடுக்கப்படாத நிலையில் தற்போது அம் மக்கள் சிரமத்துக்கு மத்தியில் மீள்குடியேறுவதற்கு முற்படும்போது அதற்கு எதிரான செயற்பாடுகளையும்,பிழையான தகவல்களையும் வெளியிட்டு இம்மக்களது தேவைப்பாடுகளை மழுங்கடிக்கும் செயற்பாடுகள் இடம் பெறுகின்றன.
இச்செயற்பாடுகள் இந்த நாட்டில் ஒரு சிறுபான்மை சமூகத்திற்கு எதிராக மேற்கொள்ளப்படும் அநீதியான செயற்பாடாகும். வாழ்விடத்திலிருந்து வெளியேற்றப்பட்ட குடும்ப உறுப்பினர் என்ற வகையில் இந்த போராட்டத்தின் உண்மைத்தன்மையினை எடுத்து கூற வேண்டிய தேவை எனக்கிருக்கின்றது. இந்த மக்களது வாக்குகளால் பாராளுமன்றம் வந்த நான்,எமது மக்கள் தொடர்பில் மௌனமாக இருக்க முடியாது, கடந்த அரசாங்க காலத்தில் இம்மக்களின் மீள்குடியேற்றத்தை ஆரம்பித்த போதும் அதனையும் தடைப்படுத்தினர்.
நல்லாட்சியில் வடபுல முஸ்லிம்கள் எதிர்பார்த்தது, கௌரவமான மீள்குடியேற்றத்தை ஆனால் அதனை செய்வதில் காணப்படும் தடங்கல் என்ன என்பது தொடர்பில்,ஜனாதிபதி, பிரதமர் மற்றும் அது தொடர்பான அமைச்சரிடத்திலும் பல முறை கேட்டுள்ளேன். ஆனால் அது நடைமுறைக்கு வரவில்லை. பாராளுமன்றத்தில் எமது மக்களின் இந்த யதார்த்த நிலை தொடர்பில் உரையாற்றியுள்ளேன்.
தற்போது ஜனாதிபதி என்னை வடக்கு மற்றும் கிழக்கு மாகாண மக்களது மீள்குடியேற்ற நிலை தொடர்பில் கலந்துரையாடல்களை செய்ய அழைப்புவிடுத்துள்ளார். அதற்கு எமது மக்களது சார்பில் நன்றிகளை தெரிவித்துக் கொள்கின்றேன் என்றார்.
முன்னதாக கடந்த 5 ஆம் திகதி புதன் கிழமை இடம்பெற்ற அமைச்சரவைக் கூட்டத்தின் போது மீள்குடியேற்ற அமைச்சர் சுவாமிநாதன் முஸ்லிம்கள் தொடர்பில் வெளியிட்டுள்ள பிழையான புள்ளிவிபரங்கள் மக்களை வெகுவாக பாதித்துவருவதாகவும், வெளியேற்றப்பட்ட முஸ்லிம்களில் தானும் ஒருவன் என்ற வகையில் இந்த மக்களின் வேதனைகளையும்,தேவைகளையும் இந்த அமைச்சரவை கூட்டத்தில் சகலருக்கும் விளக்கமளிக்க நேரம் தரப்பட வேண்டுமென அகில இலங்கை மக்கள் காங்கிரஸின் தலைவரும்,அமைச்சருமான ரிஷாட் பதியுதீன் விடுத்த வேண்டுகோளுக்கு கிடைத்த அனுமதிக்கு அமைவாக அவ்விடயங்களை புள்ளி விபரங்களுடன் அமைச்சரவையில் விவரித்தார்.
தொடர்ந்து வடக்கு முஸ்லிம்களின் மீள்குடியேற்றம் தொடர்பில் ஜனாதிபதியும், பிரதமரும் மற்றும் மீள்குடியேற்ற அமைச்சரும் எவ்விதமான ஆக்கபூர்வமான நடவடிக்கை எடுக்கவில்லையெனவும் அது
தொடர்பில் உரிய நடவடிக்கைகளை மேற்கொள்ளுமாறும் கோரிக்கை விடுத்தி ருந்தமை குறிப்பிடத்தக்கது.
