வடமாகாண பாடசாலைகளில் வேண்டத்தகாத பல செயல்கள் வேகமாகப் பரவி வருகின்றன - விக்னேஸ்வரன்
வடமாகாணத்திலுள்ள பாடசாலைகளில் தற்போது வேண்டத்தகாத பல செயல்கள் வேகமாகப் பரவி வருவது அச்சத்தையும் மன வேதனையையும் தருகின்றன என வடமாகாண முதலமைச்சர் சி.வி.விக்னேஸ்வரன் தெரிவித்துள்ளார்.
வடமாகாணத்தில் இயங்குகின்ற பாடசாலை அதிபர்களுக்கான பயிற்சிப் பட்டறை நேற்றைய தினம் கைதடி ஸ்ரீவிநாயகர் மண்டபத்தில் இடம்பெற்றது. இந் நிகழ்வில் பிரதம விருந்தினராகக் கலந்து கொண்டு உரையாற்றுகையிலேயே அவர் மேற்கண்டவாறு தெரிவித்தார்.
அவர் அங்கு மேலும் கூறுகையில்,
போதை வஸ்து பாவனை, நவீன தொழில்நுட்ப இலத்திரனியல் கருவிகள் மூலமாக வேண்டத்தகாத இணைய பக்கங்களில் நுழைந்து உணர்வுகளைத் தூண்டக் கூடிய காட்சிகளைப் பார்வையிடல் போன்ற செயற்பாடுகளில் மாணவ சமுதாயம் ஈடுபடுவதால் கல்வியில் அக்கறையில்லாமல் காணப்படுகின்றனர்.
இத்தகைய புலனுணர்வு சார்ந்த விடயங்களில் பொழுதைக் கழித்து கல்வியை இழந்து, உடல் உளத் தூய்மைகளையும் இழக்க வேண்டிய ஒரு காலமாக இந்தக் கால கட்டம் மாறியுள்ளது.
நாங்கள் வாழ்ந்து கெட்ட சமுதாயமாகக் கணிக்கப்படக் கூடாது. வாழ்ந்து, வீழ்ந்து, மேலும் மேலெழுந்து வாழப்போகும் வலிமை மிக்க சமுதாயமாகப் போற்றப்பட வேண்டும். அதில் அதிபர்கள், ஆசிரியர்களின் பணி மகத்தானது. அதை மறந்து விடாதீர்கள்.
பத்திரிகைகள் மற்றும் ஒளி ஒலிபரப்புச் சாதனங்கள் மூலம் தினமும் கிடைக்கப்பெறுகின்ற செய்திகளைப் பார்க்கின்ற போது மனதுக்கு மிகவும் வேதனையாக உள்ளது. சில ஆசிரியர்கள் கூட மாணவ மாணவியரைக் கீழ்த்தரமான நடவடிக்கைகளுக்குப் பயன்படுத்தியதாகக் குற்றஞ் சாட்டப்பட்டு அவர்கள் பணி இடைநிறுத்தத்தில் கிடப்பதாக அறிகின்றேன். இவற்றில் எவ்வளவு தூரம் உண்மை, பொய் உள்ளதென்பதை நான் அறியேன். எனினும், உண்மைகள் ஏதுமிருப்பின் அவர்கள் ஆசிரியர்களாகக் கடமையாற்றுவதற்கு தகுதியற்றவர்கள் என்பது எனது கருத்து.
காரணம் ஒரு சட்டத்தரணி, ஒரு வைத்தியர், ஒரு ஆசிரியர் என்போர் மக்களின் உண்மைகளை அறிந்து பழக வேண்டியிருப்பதால் நம்பிக்கைப் பொறுப்பாளர்களாகக் கடமையாற்ற வேண்டிய கடப்பாடு உடையவர்களாக இருக்கின்றார்கள். அவர்கள் மீது கனமான நம்பிக்கையைச் சமுதாயம் வைத்திருக்கின்றது. அந்த நம்பிக்கைக்குப் பங்கம் ஏற்படும் விதத்தில் நடந்து கொண்டால் அவர்கள் அத் தொழிலில் நீடிக்கத் தகுதி அற்றவர்கள் ஆகின்றார்கள்.
நல்ல விடயங்கள் நடைபெறுகின்ற போது தட்டிக் கொடுத்துப் பாராட்டவும் அதேநேரம் பிழைகளைக் கண்டிப்புடன் திருத்தவும் தவறுகின்றவர் சிறந்த அதிபராக இருக்க முடியாது.
அதிபர்களில் பலர் இன்று ஏனோ தானோ என்ற நிலையில் பாடசாலைகளுக்குச் சென்று வருவது கண்கூடு. மாணவர்களைத் தண்டித்தால் மனித உரிமை மீறல் வழக்குகள் வரக் கூடும், ஆசிரியரைத் தண்டித்தால் தனக்குக் கட்டாய இடமாற்றம் ஏற்படக் கூடும் என்று இப்படியான சிக்கல்களில் இருந்து விடுபடுவதற்கு எதையும் கண்டுகொள்ளாமல் இருக்கக்கூடிய ஒரு பழக்கத்தைக் கையாளத் தலைப்படுகின் றனர். இல்லையேல், அரசியல் செல்வாக் குப் பெற்ற ஒருவரின் வேட்டியை அல்லது சேலையைக் கெட்டியாகப் பற்றிக் கொண்டு தான்தோன்றித்தனமாக நடந்து கொள்ளத் தலைப்படுகின்றார்கள்.
எந்த ஆசிரியரை எந்தப் பணிக்கு நியமிக்க வேண்டும் அல்லது எந்தப் பாடத்தைப் படிப்பிக்க நியமிக்க வேண்டும் என்பது கூட அதிபர்களின் கடமையாக இருக்க வேண்டும். ஆசிரியர்களின் தகைமைகளை,குணாதிசயங்களை ஆராய்ந்து பரிசீலித்துப் பார்த்துத் தீர்மானங்களை எடுக்க வேண் டும்.
மேலும் அதிபர்கள், மாணவர்களின் பெற்றோருடனும் சிவில் சமூக ஆர்வலர்களுடனும் சுமுக உறவைப் பேண வேண் டும். பாடசாலைக்கு கொடைகள் எதிர் பார்க்கப்படுவதாயின், அவற்றின் சட்ட வலுவைப் பற்றி ஆராய்ந்து நடவடிக்கைகள் எடுக்க வேண்டும். பெற்றோர், சமூக ஆர்வலர்களுடனான உங்கள் சுமுக உறவு முறை உங்கள் நடவடிக்கைகளை நியாயமானதாக எடுத்துக் காட்டவல்லன. வெளிப்படைத்தன்மை இல்லாமல் நடக் கும் நீதியான காரியங்களும் மக்களிடையே சந்தேகங்களை எழுப்பி விடுவன.
எல்லாப் பணிகளையும், கடமைகளையும் ஒரு அதிபர் தாமாகவே செய்யமுடியாது. அதனைப் பகிர்ந்து கொள்ள அவர் முன் வரவேண்டும். நம்பிக்கைக்குப் பாத்திரமானவர்களை அடையாளம் கண்டு இதனை நடைமுறைப்படுத்த வேண்டும் என்றார்.
