சம்பந்தன் ஒரு தேசிய தலைவர் - சபையில் பிரதமர் ரணில் புகழாரம்
வடக்கின் பிரச்சினைகளை எவ்வாறு நோக்குகின்றாரோ அதே போன்று தெற்கின் பிரச்சினைகளையும் நோக்கும் இலங்கையின் உண்மையான தேசியத் தலைவர் இரா. சம்பந்தன் என பிரதமர் ரணில் விக்கிரமசிங்க நேற்று சபையில் புகழாரம் சூட்டினார்.
பாராளுமன்றத்தில் நேற்று செவ்வாய்க்கிழமை உயர் தேசிய கணக்கியல் டிப்ளோமா பாட நெறி மாணவர்கள் உயர்கல்வி அமைச்சு முன்பாக வைத்து பொலிஸாரால் தாக்கப்பட்டமை தொடர்பில் எதிர்க்கட்சித் தலைவரான இரா. சம்பந்தன் விசேட வினாவை எழுப்பினார்.
இதனையடுத்து சபையில் எழுந்த பிரதமர் ரணில் விக்கிரமசிங்க எதிர்க்கட்சித் தலைவரான இரா. சம்பந்தன் தான் இலங்கையின் உண்மையான தேசியத் தலைவர் எதிர்க்கட்சித் தலைவராவார். வடக்கின் பிரச்சினைகளை அவர் எவ்வாறு நோக்குகின்றாரோ அதேபோன்று தென் பகுதி பிரச்சினைகளையும் நோக்குகின்றார்.
இதேபோன்று தென் பகுதியில் காணப்படும் ஏனைய பிரச்சினைகளையும் இரா. சம்பந்தன் விரைவில் இங்கு எழுப்புவார் என்று நான் நம்புகின்றேன் என்றார்.பிரதமர் ரணில் விக்கிரமசிங்க இவ்வாறு கூறியபோது சபையிலிருந்த மஹிந்த ராஜபக்ஷ ஆதரவு அணியினர் கூச்சலிட்டனர்.இதன்போது எழுந்த எதிர்க்கட்சித் தலைவர் சம்பந்தன் நான் எழுப்பிய கேள்விக்கு பதில் வேண்டும் என்றார்.
