இனப்பிரச்சினையை பேச்சுவார்த்தை மூலமே தீர்த்துக்கொள்ள முடியும் - ஜனாதிபதி
எங்களுக்கு உலகத்தில் இன்று எதிரிகள் இல்லை.எதிராக செயற்படுகின்றவர்களும் இல்லை. இந்தியா, பாகிஸ்தான், இங்கிலாந்து, சீனா, ஜப்பான் என எல்லோரும் எங்களுடன் இருக்கின்றார்கள். எனவே இந்த நாட்டை முன்னோக்கி கொண்டு செல்வதற்கு இதுவே நல்ல சூழலாக அமைந்துள்ளது என ஜனாதிபதி மைத்திரிபால சிறிசேன தெரிவித்தார்.
நேற்று கிளிநொச்சியில் இடம்பெற்ற உணவு உற்பத்தி தேசிய வேலைத்திட்டத்தின் ஆரம்ப நிகழ்வில் கலந்துகொண்டு உரையாற்றுகையிலேயே அவர் இவ்வாறு குறிப்பிட்டுள்ளார்.
ஜனாதிபதி மைத்திரிபால சிறிசேன மேலும் குறிப்பிடுகையில்;உலகத்தில் எல்லோரும் எங்களுடன் நல்ல நட்பாக உள்ளனர். அவர்கள் எங்களோடு சேர்ந்து செயற்படுகின்றனர். எங்களுக்கு உலகத்தில் இன்று எதிரிகள் இல்லை. எதிராக செயற்படுகின்றவர்களும் இல்லை. இந்தியா, பாகிஸ்தான், இங்கிலாந்து, சீனா, ஜப்பான் என எல்லோரும் எங்களுடன் இருக்கின்றார்கள்.
எனவே இந்த நாட்டை முன்னோக்கி கொண்டுசெல்வதற்கு இதுவே நல்ல சூழலாக அமைந்துள்ளது. இதுதான் சரியான யுகம். எனவே அரசாங்கத்தின் காலத்தில் சிறப்பான நிலைமையை உருவாக்க வேண்டும்.
மேலும் எங்களுக்குள் எந்தப் பிரச்சினை இருந்தாலும் அதனை பேச்சுவார்த்தை மூலம் தீர்த்துக்கொள்ள முடியும். வடக்கு மாகாண முதலமைச்சர் தனது உரையில் முக்கியமான விடயங்களை குறிப்பிட்டிருந்தார்.எனவேதான் நாங்கள் அனைவரும் ஆக்கபூர்வமான பேச்சு வார்த்தைகளை மேற்கொண்டு எங்களுடைய பிரச்சினைகளை தீர்த்துகொள்ள வேண்டும் என்பதனை நான் கூறுகின்றேன்.
இந்த நாட்டில் வாழ்கின்ற எல்லா மக்களும் ஒற்றுமையாக சகோதரத்துவதோடு வாழ்கின்ற சூழலை உருவாக்குவதுதான் எங்களுடைய நோக்கமாகும்.எங்களுடைய நாட்டின் அபிவிருத்திக்கு அனைத்து சர்வதேச நாடுகளும் நிறுவனங்களும் தங்களுடைய உதவிகளை வழங்கிக்கொண்டிருக்கின்றன.
வறுமையை இலங்கையில் இல்லாதொழிக்கும் நோக்கில் பயிரிடக்கூடிய அனைத்து நிலங்களிலும் பயிர்செய்கை மேற்கொள்ள வேண்டும். அவ்வாறு பயிர்செய்கைக்கு பயன்படுத்தாது வெறுமையாக உள்ள அரச மற்றும் தனியார் நிலங்கள் அரசினால் மீளப்பெறப்பட்டு அவை உற்பத்தியில் ஈடுப்படக்கூடியவர்களுக்கு வழங்க்கப்படும். எனவே இதுவரை காலமும் வெறுமையாக வைத்திருந்த நிலங்களை உற்பத்திக்கு பயன்படுத்த அனைவரும் முன்வர வேண்டும்.
இலங்கையை பொறுத்தவரை எம்மால் உற்பத்தி செய்யக் கூடிய பல பொருட்கள் வருடந்தோறும் பல கோடி ரூபாக்கள் இறக்குமதி செய்யப்பட்டு வருகின்றன. ஏற்றுமதி இறக்குமதி துறையில் இலங்கை மிக மோசமான நிலையில் இருக்கிறது. கடந்த 2004 ஆம் ஆண்டு தொடக்கம் இலங்கையில் உற்பத்தி செய்யக் கூடிய பல பொருட்கள் இறக்குமதி செய்யப்படுவதற்காக 6000 கோடி ரூபாக் செலவு செய்யப்பட்டுள்ளது.
இவ்வாறு வருடந்தோறும் பல கோடிக்கணக்கான ரூபாவை இறக்குமதிக்கு செலவு செய்தால் எங்களுடைய விவசாயிகள் எவ்வாறு முன்னேற்றம் அடைவார்கள்? அவர்களின் ஏழ்மை எவ்வாறு இல்லாது போகும்? எனவே எம்மால் உற்பத்தி செய்யக் கூடிய பொருட்களை இறக்குமதி செய்வதனை தவிர்த்து அதனை இங்கேயே உற்பத்தி செய்ய அனைவரும் முன்வர வேண்டும். அடுத்து வரும் ஆண்டுகளில் இலங்கையில் உற்பத்தி செய்யக் கூடிய பொருட்கள் இறக்குமதி செய்வதனை தடை செய்ய இருக்கின்றோம்.
இந்த உணவு உற்பத்தி தேசிய வேலைத்திட்டத்தின் பிரதான இலக்கு இந்த நாட்டிலிருந்து ஏழ்மையை இல்லாதொழிப்பதாகும். இன்று இந்த வேலைத்திட்டம் நாட்டில் உள்ள அனைத்து மாகாணங்களிலும் சம காலத்தில் ஆரம்பித்து வைக்கப்படுகிறது.
இந்த தேசிய வேலைத்திட்டத்தை எல்லா மாகாண சபைகளையும் பொறுப்பெடுத்து செய்ற்படுத்துமாறு கோருகின்றேன். அத்தோடு இந்த தேசிய வேலைத்திட்டத்தின் ஆரம்ப நிகழ்வை நாம் வடக்கில் அதுவும் கிளிநொச்சியில் ஆரம்பித்ததன் நோக்கம் வடக்கு விவசாயிகளுக்கு ஒரு கௌரவமாக இருக்கவேண்டும் என்பதற்காகவேயாகும் என்றார்.
