போர்க்குற்றம் தொடர்பான சர்வதேச விசாரணைக்கு இந்தியா நடவடிக்கை எடுக்க வேண்டும்
இலங்கை இராணுவம் போர்க்குற்றத்தில் ஈடுபட்டது உண்மை என அந்நாட்டில் உள்ளக விசாரணை குழுவினரே ஏற்றுக்கொண்டமையை சுட்டிக்காட்டியுள்ள தி.மு.க. தலைவர் கருணாநிதி, இதனை தொடர்ந்து சர்வதேச விசாரணைக்கு இந்திய அரசு நடவடிக்கை எடுக்க வேண்டும் என வலியுறுத்தியுள்ளார்.
இலங்கையில், 2009ஆம் ஆண்டு நடைபெற்ற உள்நாட்டுப் போரின் போது இலங்கைஇராணுவம், போர்க்குற்றங்களில் ஈடுபட்டதாக கூறப்படும் குற்றச்சாட்டுகள் உண்மைதான். இதுகுறித்த, உள்நாட்டு விசாரணையில், வெளிநாட்டு நீதிபதிகள் இடம்பெற வேண்டுமென்ற பரிந்துரை
ஏற்கத்தக்கதே என்று இலங்கை அரசால் நியமிக்கப்பட்ட விசாரணைக் குழு தெரிவித்துள்ளது.இலங்கையில் நடைபெற்ற உள்நாட்டுப் போரின் இறுதி நாட்களில் மனித உரிமை மீறல் சம்பவங்களில் இராணுவத்தினர் ஈடுபட்டதாக ஐ.நா. மனித உரிமை ஆணையகம் குற்றம் சாட்டியது.
இது தொடர்பாக வெளிநாட்டு நீதிபதிகளை கொண்ட குழுவிசாரணை நடத்த வேண்டுமென, ஐ.நா. ஏற்கனவே பரிந்துரைத்த போதிலும், போர்க்குற்றங்கள் குறித்து, இலங்கை உள்நாட்டு குழு விசாரணைக்கு ஆதரவு தெரிவித்து, கடந்த மாதம் அமெரிக்கா கொண்டு வந்த தீர்மானம், ஐ.நா. சபையில் நிறைவேறியது.
இந்நிலையில், முன்னாள் ஜனாதிபதி மஹிந்த ராஜபக் ஷ பதவிக் காலத்தில் நியமித்த, ஓய்வுபெற்ற நீதிபதி மெக்ஸ்வெல் பரணகம தலைமையிலான விசாரணைக்குழு சமர்ப்பித்துள்ள 178
பக்க அறிக்கையில் இறுதிக்கட்டப் போரில் இராணுவம் போர்க்குற்றங்களில் ஈடுபட்டதாக கூறப்படும் குற்றச்சாட்டுகள் நம்பத்தக்கவை.
சரியான முறையில் விசாரணை நடத்தப்பட்டால் இராணுவ வீரர்கள், போர்க்குற்றங்களில் ஈடுபட்டது நிரூபணம் ஆகலாம். போர்க்குற்ற முறைப்பாடுகள் குறித்த விசாரணையில், சர்வதேச நாடுகளின் நீதிபதிகள் இடம்பெற வேண்டுமென்ற ஐ.நா.பரிந்துரை ஏற்கத்தக்கது என்று தெரிவித்துள்ளது.
தற்போது இலங்கை அரசினால் நியமிக்கப்பட்ட குழுவே திட்டவட்டமாக அறிக்கை கொடுத்து, அந்த அறிக்கையும் இலங்கை பாராளுமன்றத்தில் தாக்கல் செய்யப்பட்டுவிட்ட நிலையில்,
இந்திய அரசு இனியும் இலங்கையை நட்பு நாடு என்று கூறிக் கொண்டிருக்காமல், இலங்கைஇராணுவம் நடத்திய போர்க்குற்றங்கள், மனித உரிமை மீறல்கள், இனப்படுகொலைகள் குறித்து சர்வதேச நம்பகமான, சுதந்திரமான விசாரணையை நடத்துவதற்கான முயற்சியை மேற்கொள்ள வேண்டும்.
அவ் விசாரணையை இலங்கையிலே நடத்தாமல், உலக நாடுகளின் பொதுவான இடத்திலே வைத்து நடத்தினால்தான் உண்மைக் குற்றவாளிகள் கண்டறியப்பட்டு அவர்கள் மீது நடவடிக்கை எடுக்கப்படும் என்பதைப் புரிந்து கொண்டு அதற்கேற்ப தன்னுடைய நடவடிக்கையை முன்னெடுத்துச் செல்ல முடியும். எனவே, இந்திய மத்திய அரசு உடனடியாக அதற்கான முயற்சிகளை மேற்கொள்ள வேண்டுமென்று திராவிட முன்னேற்றக் கழகத்தின் சார்பில் வலியுறுத்திக் கேட்டுக் கொள்கிறேன் என்று கருணாநிதி தெரிவித்துள்ளார்.
