தமிழ் அரசியல் கைதிகளின் விடுதலையின் பின்னணியில் மிகப் பெரிய சூழ்ச்சி உள்ளது
சிறைச்சாலையில் உள்ள தமிழ் கைதிகளின் விடுதலையின் பின்னணியில் மிகப்பெரிய சூழ்ச்சி உள்ளது. எமது இராணுவத்திற்கு எதிராக கலப்பு நீதிமன்றத்தில் சாட்சிசொல்லவே இந்த கைதிகளை விடுவிக்கப்படுகின்றனர் என மஹிந்த அதரவு அணியின் உறுப்பினரும் தேசிய சுதந்திர முன்னணியின் தலைவருமான விமல் வீரவன்ச தெரிவித்தார்.
ரணில் –மைத்திரி கூட்டணியை நம்பி வாக்களித்த மக்களின் நிலைமை இன்று கேள்விக்குறியாகிவிட்டதாகவும் அவர் தெரிவித்தார். அரசியல் கைதிகளின் விடுதலை தொடர்பில் கருத்து தெரிவிக்கையிலேயே அவர் மேற்கண்டவாறு குறிப்பிட்டார். அவர் மேலும் கூறுகையில்,
யுத்தக் குற்றச்சாட்டுகள் தொடர்பில் எமது இராணுவத்தை குற்றவாளிகளாக்க அரசாங்கம் கடுமையான முயற்சிகளை மேற்கொண்டு வருகின்றது. இலங்கையில் போர்க்குற்ற விசாரணைகளை மேற்கொள்ள உருவாக்கப்பட்டுள்ள கலப்பு நீதிமன்ற முறைமை மற்றும் சர்வதேச உதவியுடனான விசாரணை பொறிமுறைகள் என்பன முழுமையாக எமது பாதுகாப்பு படைகளையே பாதிக்கும் வகையில் அமைந்துள்ளது.
இலங்கைக்கு எதிரான சர்வதேச அழுத்தங்களை எமது அரசாங்கம் கையாண்ட முறைமைக்கும் இந்த அரசாங்கம் கையாளும் முறைமைக்கும் இடையில் மிகப்பெரிய வேறுபாடுகள் உள்ளன. நாம் எமது நாட்டை முழுமையாக பாதுகாத்து நாட்டில் மூவின மக்களும் அமைதியாக வாழக்கூடிய வகையில் ஆட்சியமைத்தோம். அதேபோல் சர்வதேச பிரிவினைவாதிகளின் செயற்பாடுகளை நாட்டில் முழுமையாக கட்டுப்படுத்தினோம். ஆனால் இந்த அரசாங்கம் எமது செயற்பாடுகளுக்கும் இந்த நாட்டுக்கும் பொருந்தாத வகையில்தான் தமது வெளிநாட்டு கொள்கைகளை முன்னெடுத்து வருகின்றது.
அதேபோல் இப்போது புதியதாக ஒரு சிக்கலையும் உருவாக்க அரசாங்கம் முயற்சிக்கின்றது. அதாவது கடந்த காலங்களில் புலம்பெயர் அமைப்புகள் மற்றும் சர்வதேச பிரிவினைவாதிகளினால் அழுத்தம் கொடுக்கப்பட்டு வந்த சிறைகளில் உள்ள விடுதலைப்புலிகளின் விடுதலையை உறுதிப்படுத்தும் வகையில் அரசாங்கம் இணக்கம் கண்டு வருகின்றது. விடுதலைப்புலிகளின் இந்த விடுதலையின் பின்னணியில் மிகப்பெரிய சூழ்ச்சி உள்ளது.
அதாவது இலங்கையில் இடம்பெற்ற போர்க்குற்றங்கள் தொடர்பில் இராணுவத்தை குற்றவாளியாக்கும் முயற்சிகளின் போது இந்த சிறைச்சாலைகளில் உள்ள விடுதலைப்புலிகளின் உறுப்பினர்களை சாட்சிகளாக பயன்படுத்த அரசாங்கம் முயற்சிக்கின்றது. அதற்காகவே இவர்களை உடனடியாக விடுவிக்கவும் அரசாங்கம் முயற்சித்து வருகின்றது. நாம் சர்வதேச அழுத்தங்களில் இருந்து விடுபட வேண்டும், இலங்கையில் சுயாதீன செயற்பாடுகளை பலப்படுத்த வேண்டும் என்பதில் எமக்கு எந்த முரண்பாடுகளும் இல்லை. அந்த நம்பிக்கையில் தான் ரணில் — மைத்திரி கூட்டணிக்கு மக்கள் வாக்களித்தனர்.
ஆனால் இன்று நிலைமைகள் தலைகீழாக மாறியுள்ளன. எமது இராணுவத்தை தூக்கு மேடைக்கு அனுப்பும் வகையில் இந்த கூட்டணி செயற்பட்டு வருகின்றது. அதற்கான முதற்கட்டமே இந்த கலப்பு நீதிமன்றமாகும். அதேபோல் கலப்பு நீதிமன்றத்தில் இராணுவத்தை குற்றவாளியாக்கும் வகையில் விடுவிக்கப்படவுள்ள புலிகளின் உறுப்பினர்கள் சாட்சி சொல்வார்கள். அந்த ஆதாரங்களை வைத்து எமது இராணுவத்தினர் தண்டிக்கப்படுவார்கள்.
அண்மையில் சிறைகளில் உள்ள இந்த கைதிகள் உண்ணாவிரத போராட்டங்களை முன்னெடுத்தனர். எனினும் ஜனாதிபதியின் உறுதிமொழியை அடுத்து இந்த கைதிகள் தமது உண்ணாவிரதத்தை கைவிட்டுள்ளனர். அதேபோல் ஜனாதிபதியும் நீதியமைச்சரும் கைதிகளின் விடுதலையில் உறுதியளித்துள்ளதாக எதிர்க்கட்சி தலைவர் சம்பந்தன் தெரிவித்துள்ளார்
ஆகவே பயங்கரவாத தடுப்புச் சட்டத்தின் கீழ் தடுத்து வைக்கப்பட்டுள்ள பல தமிழ் கைதிகள் இந்த வாய்ப்பை பயன்படுத்தி விடுவிக்கப்படுவார்கள்.
அதேசமயம் இராணுவத்திற்கு எதிராக கலப்பு நீதிமன்றத்திலும் இவர்கள் சாட்சிகூறுவார்கள். இறுதியில் எமது இராணுவம் தண்டிக்கப்படும் என அவர் குறிப்பிட்டார்.
