அமெரிக்க தீர்மானம், ஐ.நா. அறிக்கையைவிட பரணகம அறிக்கை பாரதூரமானது - விஜேதாஸ
உடலாகம, மெக்ஸ்வல் பரணகம ஆகியோரது அறிக்கைகள் ஐ.நா. அறிக்கை மற்றும் அமெரிக்காவின் தீர்மானம் ஆகியவற்றை விட பாரதூரமானவை அந்தளவில் இங்கு பாரிய குற்றச் செயல்கள் இடம்பெற்றுள்ளன.
ஆதலால் தான் கடந்த ஒன்பது வருடங்களாக உடலாகம அறிக்கை ஜனாதிபதி மாளிகையில் ஒளித்து வைக்கப்பட்டிருந்தது என்று நீதி அமைச்சர் ஜனாதிபதி சட்டத்தரணி விஜேதாஸ ராஜபக் ஷ நேற்று சபையில் குற்றம் சாட்டினார்.
யுத்தம் நிறைவடைந்ததன் பின்னர் தெற்கிலே பாற்சோறு உண்டு, ரபான் அடித்து, தேசியக் கொடியையும் பௌத்த கொடியையும் பிடித்து பைத்தியக்காரர்களைப் போன்று ஆட்டம் போட்டதையும் வடக்கிலே யுத்தத்தால் பாதிக்கப்பட்டு உடல் உறுப்புக்களை உறவுகளை உடமைகளை இழந்த நிலையில் பாண் துண்டுக்காக அப்பாவித் தமிழ் மக்கள் முகாம்களில் வரிசையில் நின்றதையும் சர்வதேசம் நன்கு அறிந்து வைத்துள்ளது என்றும் சுட்டிக்காட்டினார்.
பாராளுமன்றத்தில் நேற்று வியாழக்கிழமை இடம்பெற்ற ஐ.நா. அறிக்கை மற்றும் அமெரிக்காவின் தீர்மானத்துடனான அரசாங்கத்தின் இணக்கப்பாடு தொடர்பிலான சபை ஒத்திவைப்பு வேளைப் பிரரேணை மீதான விவாதத்தில் கலந்து கொண்டு உரையாற்றுகையிலேயே மேற்கண்டவாறு தெரிவித்தார்.
நீதி அமைச்சர் விஜேதாஸ ராஜபக் ஷ இங்கு தொடர்ந்தும் உரையாற்றுகையில்;
ஐ.நா. அறிக்கை அமெரிக்காவின் தீர்மானம் தொடர்பில் இங்கு பாரிய எதிர்ப்புகள் கிளம்பியுள்ளன.இவ்வாறான நிலைமை வருவதற்கு முன்னாள் ஜனாதிபதி தலைமையிலான முன்னைய அரசாங்கமே வழி வகுத்துள்ளது.
உடலாகம மற்றும் மெக்ஸ்வல் பரணகம ஆகியோரது அறிக்கைகளை நாம் பாராளுமன்றத்தில் சமர்ப்பித்திருக்கின்றோம். அவ்வறிக்கைகளில் கூறப்பட்டுள்ள உள்ளடக்கங்கள் ஆலோசனைகள், நடைமுறைப்படுத்தப்பட வேண்டியவை தொடர்பில் கூறப்பட்டுள்ளவற்றை நாட்டு மக்கள் அறிந்து கொள்ள வேண்டும் என்றே நாம் இவற்றை வெளிப்படுத்தியுள்ளோம்.
உடலாகம மற்றும் மெக்ஸ்வல் பரணகம ஆகியோரது அறிக்கைகளில் கூறப்பட்டுள்ளவற்றை நிறைவேற்றும்பட்சத்தில் அவை ஐ.நா. அறிக்கை மற்றும் அமெரிக்காவின் தீர்மானம் ஆகியவற்றை விட மிகவும் பாரதூரமானவையாக அமையும்.
மேற்படி இரு ஆணைக்குழுக்களையும் முன்னாள் ஜனாதிபதி மஹிந்த ராஜபக்ஷவே நியமித்திருந்தார்.மேலும் யுத்தம் நிறைவடைந்ததன் பின் னர் 48 மணித்தியாலங்களுக்குள் இலங்கை வந்த பான் கீ மூனுடன் கூட்டு உடன்படிக்கை கைச்சாத்திடப்பட்டது. இதன் பாரதூரம், பின் விளைவு ஆகியவை தொடர் பில் நாம் அன்றே கூறினோம்.
எனினும் எமது கருத்துக்களை உள்வாங்கிய அன்றைய ஆட்சியாளர்கள் எம்மை ஏளனமாக பார்த்ததுடன் சிரித்தனர். எமது கருத்துக்களை, வாதங்களை பொருட்படுத்தவில்லை.இதன் பின்னர் தான் கற்றுக் கொண்ட பாடங்கள் மற்றும் நல்லிணக்கம் தொடர்பான ஆணைக்குழுவும் நிறுவப்பட்டது. இதன் அடிப்படையில்தான் தருஷ்மன் குழுவும் பான் கீ மூனினால் நிறுவப்பட்டது.
மேலே கூறப்பட்டது போன்று உடலாகம அறிக்கையில் கூறப்பட்டுள்ள பாரதூரமான விடயங்களை நோக்கினால் இங்கு பாரிய குற்றச் செயல்கள் இடம்பெற்றுள்ளன. அதேபோன்று தான் மெக்ஸ்வல் பரணகம அறிக்கையும் அமைந்துள்ளது. உண்மை விடயங்களை நாட்டு மக்களிடம் இருந்து மறைப்பதற்கே உடலாகம அறிக்கை ஒன்பது வருடங்களாக ஜனாதிபதி மாளிகையில் ஒளித்து வைக்கப்பட்டிருந்தது. இப்போது நாம் அதனை வெளிப்படுத்தியுள்ளோம். நாட்டில் நடந்தவற்றை மக்கள் தெரிந்து கொள்ள வேண்டும்.
தமிழர்களுக்கும் இராணுவத்துக்கும் இடையிலான ஆயுத ரீதியிலான யுத்தம் நிறைவடைந்ததும் ஊடகக் கண்காட்சி இடம்பெற்றதைக் காண முடிந்தது. அது மட்டுமல்லாது புறக்கோட்டையில் பாற் ்சோறு உண்டு மகிழ்ந்ததையும் ரபான் அடித்தும் தேசிய கொடியையும் பௌத்தக் கொடியையும் பிடித்து உயர்த்தி பைத்தியங்களைப் போன்று ஆட்டம் போட்டதையும் சர்வதேசம் அறிந்து கொண்டது. அதே சந்தர்ப்பத்தில் வடக்கிலே யுத்தத்தால் பாதிக்கப்பட்டு உறவுகளை உடமைகளை, உடல் உறுப்புக்களை இழந்த தமிழ் மக்கள் முகாம்களுக்குள் பாண் துண்டுக்காக வரிசையில் நின்றதும் சர்வதேசத்துக்கு படம் பிடித்துக்காட்டப்பட்டுள்ளது.
அது மாத்திரமின்றி பிரதேச சபை, நகர சபைத் தேர்தல்களில் கூட யுத்த வெற்றியைக் காட்டி மின்சாரக் கதிரையை ஞாபகப்படுத்தி வாக்கு கேட்டு வெற்றி பெற்ற நிலை முன்னைய அரசாங்கத்திடம் காணப்பட்டது.இந்நாட்டில் வாழும் தமிழர், சிங்களவர்,முஸ்லிம், பறங்கியவர், மலேயர் என அனைத்து தரப்பினருமே இந்நாட்டின் குடிமக்களாவர். அவர்கள் அனைவருமேஇந்நாட்டின் உரிமையாளர்களாக இருக்கின் றனர். எனவே கடந்த காலங்களைப் போன்றுதான இனவாதப்போக்கு எதிர் காலத்திலும் இருக்கக் கூடாது என்பதே எமது இலக்காகும்.
நாம் அனைத்து தரப்பினரையும் அர வணைத்து சமத்துவம் ஒற்றுமையுடனான சமூகத்தைக் கட்டியெழுப்பவே முற்ப டுகிறோம். எனவே இந்த நல்லெண்ண செயற்பாட்டுக்கு எதிர்க்கட்சியினர் தடைக் கல்லாக இருக்க வேண்டாம். தேசிய, தேச இன ஒற்றுமைக்கு குந்தகம் விளைவித்தால் 1000 சந்ததியினரும் சாபமிடுவர் என்றார்.
