வடக்கு கிழக்கில் இராணுவ கட்டுப்பாட்டில் உள்ள காணிகளை விடுவிக்க நடவடிக்கை - சிறிதரன்
கிளிநொச்சி பரவிப்பாஞ்சானில் விடுவிக்கப்படாத காணிகள் உட்பட வடகிழக்கில் இராணுவ கட்டுப்பாட்டிலுள்ள சகல காணிகளும் விடுவிக்க துரித நடவடிக்கை எடுக்கப்பட்டு வருவதாக யாழ். _ கிளிநொச்சி மாவட்ட பாராளுமன்ற உறுப்பினரும் தமிழ் தேசியக் கூட்டமைப்பின் பாராளுமன்ற குழுவின் செயலாளருமான சிவஞானம் சிறிதரன் குறிப்பிட்டார்.
கிளிநொச்சி நகரில் ஏ ௯ வீதியிலிருந்து பரவிப்பாஞ்சான் பிரதான வீதியூடாக பரவிப்பாஞ்சான் மக்கள் மற்றும் ஆதரவாளர் சகிதம் ஊர்வலமாக நேற்று முன்தினம் புதன்கிழமை அழைத்துச் செல்லப்பட்ட பாராளுமன்ற உறுப்பினர் சிறிதரன் அங்குள்ள மக்களுடன் கலந்துரையாடலை மேற்கொண்டார்.
இதன் போது தமது காணிகளில் தொடர்ந்தும் இராணுவம் நிலை கொண்டுள்ளதால் அவர்களை வெளியேற்றித் தமது காணிகளை தம்மிடம் ஒப்படைக்குமாறு கண்ணீர் மல்க அவர்கள் கேட்டுக் கொண்டனர்.
இதனையடுத்து அவர் அங்கு மேலும் குறிப்பிட்டதாவது,
தமிழ் மக்கள் சந்ததி சந்ததியாக வசித்து வந்த பொது மக்களின் காணிகளில் இராணுவம் நிலை கொண்டிருப்பது பொருத்தமற்ற செயலாகும். கிளிநொச்சி நகரில் மிகவும் பழைமை வாய்ந்த இப்பகுதி பெரும் அழிவுகளைச் சந்தித்துள்ளது. பரவிப்பாஞ்சானில் தற்போது குறிக்கப்பட்ட தொகை காணிகளே விடுவிக்கப்பட்டுள்ளன.
மிகுதிக் காணிகளை இராணுவமே தம்வசம் வைத்துள்ளது. பரவிப்பாஞ்சானில் விடுவிக்கப்படாத காணிகள் உட்பட கிளிநொச்சியில் படைத்தரப்பு வைத்துள்ள காணிகளும் வடகிழக்கில் இராணுவம் நிலை கொண்டுள்ள சகல பொது மக்களது காணிகளையும் விடுவிக்க தமிழ்த் தேசியக் கூட்டமைப்பு துரித நடவடிக்கை எடுத்துள்ளது. இதையே எமது தலைவர் இரா.சம்பந்தனும் உறுதிபடத் தெரிவித்துள்ளார். இவ்வருட முடிவிற்குள் நல்லதொரு மாற்றத்தை எதிர்பார்க்கின்றோம். தமிழ் மக்களின் சுதந்திரம் நிம்மதியான வாழ்க்கை மிகவும் முக்கியமானதாகும். இதற்காக நாம் தொடர்ந்து போராடுவோம் என்றார்.
குறித்த மக்கள் சந்திப்பில் கலந்துகொண்ட பிரதேச செயலர் கோபாலபிள்ளை நாகேஸ்வரன் அங்கு கருத்துத் தெரிவிக்கையில், பரவிப்பாஞ்சானில் காணி ஆவணங்கள் சரிவர உள்ளவர்களுக்கு விடுவிக்கப்பட்ட பகுதிகளில் உரிய காணிகள் வழங்கப்பட்டு வருகின்றன. இவ்வாறு காணிப் பத்திரங்கள் சரிவர இல்லாத காணி உரிமையாளர்கள் பிரதேச செயலகத்துடன் தொடர்பு கொண்டு தமது காணிகளை உறுதிப்படுத்தலாம் எனக் குறிப்பிட்டார்.
