எதிர்க்கட்சித் தலைவர் பதவிக்கு சம்பந்தனே பொருத்தமானவர் - ஹசன் அலி
தமிழ்த் தேசியக் கூட்டமைப் பின் தலைவர் சம்பந்தன் அரசியல் சாணக்கியம் நிறைந்த ஒரு சிரேஷ்ட அரசியல் தலைவராவார்.
எனவே சம்பந்தன் போன்ற ஒருவர் எதிர்க்கட்சித் தலைவராக நியமிக்கப்படுவது நல்லதொரு விடயமாகும். அதேபோல் சம்பந்தனே எதிர்க்கட்சி பதவிக்கு பொருத்தமானவர் என ஸ்ரீலங்கா முஸ்லிம் காங்கிரஸின் பொதுச்செயலாளர் ஹசன் அலி தெரிவித்தார்.
எனினும் எதிர்க்கட்சியாகிய செயற்பட விரும்புபவர்கள் கலந்தாலோசித்து ஒரு தீர்மானத்தை எடுக்க வேண்டும் எனவும் அவர் குறிப்பிட்டார்.
இன்று பாராளுமன்றம் கூடுகின்ற நிலையில் எதிர்க்கட்சி பதவி தொடர்பில் ஸ்ரீலங்கா முஸ்லிம் காங்கிரஸின் நிலைப்பாட்டை வினவிய போதே கட்சியின் பொதுச்செயலாளர் ஹசன் அலி மேற்கண்டவாறு குறிப்பிட்டார்.
இது தொடர்பில் அவர் மேலும் கூறுகையில்,
புதிய பாராளுமன்றம் நாளை(இன்று) கூடுகின்ற நிலையில் பல முக்கிய அம்சங்களை எதிர்பார்க்க முடியும். குறிப்பாக இந்த பாராளுமன்றத்தின் எதிர்க்கட்சித் தலைவர் யார் என்ற கேள்வி எழுந்துள்ளளது. இந் நிலையில் அதற்கான விடை நாளை(இன்று) கிடைக்கும் என எதிர்பார்க்கின்றோம். எனினும் இப்போதிருக்கும் நிலையில் பலமான எதிர்க்கட்சியை அமைக்கவேண்டிய தேவை உள்ளது.
தமிழ்த் தேசியக் கூட்டமைப்பு உள்ளிட்ட ஒரு சிலருக்கு எதிர்க்கட்சி பதவி வழங்கப்பட வேண்டும் என கருத்துக்கள் முன்வைக்கப்பட்டு வருகின்றது. எனினும் யாரை நியமிப்பது என்பதை நாம் தெரிவிக்க முடியாது. ஆயினும் தமிழ்த் தேசியக் கூட்டமைப்பின் தலைவர் சம்பந்தன் அரசியல் சாணக்கியம் நிறைந்த ஒரு சிரேஷ்ட அரசியல் வாதியாவார். அவரைப்போன்ற உறுப்பினர்கள் பாராளுமன்றத்தில் செயற்படுவது மிகவும் ஆரோக்கியமான அதேபோல் அவசியமான விடயமாகும். ஆகவே சம்பந்தன் போன்ற ஒருவர் எதிர்க்கட்சி தலைவராக நியமிக்கப்படுவது நல்லதொரு விடயமாகும். அதேபோல் சம்பந்தனே எதிர்க்கட்சி பதவிக்கு பொருத்தமானவர் என்ற தனிப்பட்ட கருத்து எம்மிடம் உள்ளது.
எனினும் எதிர்க்கட்சியாக செயற்படவிருக்கும் நபர்களே யார் எதிர்க்கட்சி தலைவர் யார் எதிர்க்கட்சியாக செயற்படுவது என்பதை தீர்மானிக்க வேண்டும். இப்போது ஒரு சிலர் தாம் எதிர்க்கட்சி ஆசனத்தில் அமரவிருப்பதாக தெரிவித்து வருகின்றனர். அதேபோல் எதிர்க்கட்சி பதவி தமக்குக் கிடைக்க வேண்டும் என்றும் தத்தமது கருத்துக்களை வெளியிட்டு வருகின்றனர். அவ்வாறு இருக்கையில் எதிர்க்கட்சியாக செயற்படவிருப்பவர்கள் கலந்துரையாடி தமது தீர்மானங்களை மேற்கொள்ள வேண்டும்.
அதேபோல் பாராளுமன்ற விதிமுறைகளுக்கு அமைய சபாநாயகர் எதிர்க்கட்சி தலைவர் யார் என்பதை தெரிவு செய்வார். ஆளும் தரப்பினர் எதிர்க்கட்சியை நியமிக்க முடியாது. ஆகவே ஸ்ரீலங்கா முஸ்லிம் காங்கிரஸ் இப்போது அரசாங்கத்துடன் செயற்படுவதால் எம்மால் ஸ்திரமான கருத்தினை தெரிவிக்க முடியாது. ஆயினும் தமிழ்த் தேசியக் கூட்டமைப்பின் தலைவர் சம்பந்தன் எதிர்க்கட்சித் தலைவர் பதவிக்கு மிகவும் பொருத்தமானவர் என நம்புவதாகவும் அவர் குறிப்பிட்டார்.
