வடக்கு கிழக்கை பிற மாகாணங்களுடன் ஒப்பிட்டு பார்த்ததாலேயே தனித்துவங்கள் பாதிப்படைந்தன
வடக்கு கிழக்கு மாகாணங்கள் இலங்கையின் ஏனைய மாகாணங்களில் இருந்து முற்றிலும் வேறுபட்டவை. ஆனால், அதனை ஏனைய மாகாணங்களுடன் அரசாங்கம் ஒப்பிட்டு பார்த்ததாலேயே எமது தனித்துவங்கள் பாதிப்படைந்தன என வடமாகாண முதலமைச்சர் சி.வி.விக்னேஸ்வரன் தெரிவித்துள்ளார்.
யாழ்ப்பாணத்தை அபிவிருத்தி செய்யப்படும் நகரமாக மாற்றுவதில் முகங்கொடுக்க வேண்டிய சவால்களை அடையாளப்படுத்தும் முகமாக நகர அபிவிருத்தி நீர் வழங்கல் மற்றும் வடிகால் அமைப்பு அமைச்சின் கீழ் இயங்கும் நகர அபிவிருத்தி அதிகாரசபையினால் கூட்டம் ஒன்று முதலமைச்சர் காரியாலயத்தில் நேற்று முன்தினம் காலை 10 மணிக்கு நடாத்தப்பட்டது. அதில் உலக வங்கியைச் சேர்ந்த அதிகாரிகளும் பங்கு பற்றியிருந்தனர்.
இதன்போது உரையாற்றிய முதலமைச்சர் மேலும் தெரிவித்ததாவது:-–
தெற்கில் இருக்கும் 7 மாகாணங்களில் இருந்து வடகிழக்கு மாகாணங்கள் வேறுபட்டவை. மண்ணியல் ரீதியாகப் பார்த்தால் வடமாகாணம் வித்தியாசமான ஒன்றாகவே இருப்பதை அவதானிக்கலாம். வடமாகாணத்தில் நதிகள் இல்லை. நீர் வீழ்ச்சிகள் இல்லை. கிணறுகளிலும் குளங்களிலும் இருந்துதான் நீர் எடுக்கவேண்டியுள்ளது.
அரசியல் ரீதியாக வடகிழக்கு மாகாணங்கள் தமது தனித்துவத்தை இலங்கை சுதந்திரம் அடைந்த காலந்தொடக்கம் வெளிக்காட்டிவந்துள்ளார்கள். எம்மை பிறமாகாணங்களுடன் சேர்த்துப் பார்த்ததால் எமது தனித்துவம் பாதிப்படைந்தது. 1987ஆம் ஆண்டு இந்தியாவின் உதவியுடன் 13ஆம் திருத்தச் சட்டம் வடகிழக்குமாகாண மக்களுக்காகவே கொண்டுவரப்பட்டது.
ஆனால், மாகாண சபைகளை நாடு முழுவதும் ஏற்படுத்தி எமது தனித்துவத்தை நிலைபெறச் செய்யாமல் பாதிப்புக்குள்ளாக்கி வந்துள்ளன. தொடர்ந்துவந்த இலங்கை அரசாங்கங்கள். 13ஆம் திருத்தச் சட்டத்தின் கீழ் தரப்பட்ட குறைவான உரித்துக்களைக் கூட மகாவலி அதிகார சபை, நகர அபிவிருத்தி அதிகார சபை போன்ற மத்திய அரசாங்கத்தின் அதிகார சபைகளுக்கு ஊடாக அரசாங்கத்தினர் பிரித்தெடுத்துள்ளனர்
அவ்வாறான ஒருசெயற்றிட்டத்தைப் போலவே இதையும் காண்கின்றோம். எம்மு டன் கலந்தாலோசித்து எமக்கான நகர அபிவிருத்தியை ஏற்படுத்தாமல் மத்திய அரசாங்கம் தான்தோன்றித்தனமாக இங்கு தமக்கேற்றவாறு ஏற்பாடுகளை நடாத்திவருகின்றது. என்று நான் கருதுகின்றேன். இதனை நாம் ஏற் றுக் கொள்ளமுடியாது. எமக்கான அபிவிருத்தியை நாமே உருவாக்க வசதிகள் அளிக்கப்பட வேண்டும்.
சரித்திர ரீதியாகவும் நாங்கள் வேறுபட்டவர் கள். 2000 வருடங்களுக்கு மேலான சரித்திரத் தைக் கொண்டவர்கள் எம் மக்கள். தற்பொழுது போரினால் பாதிக்கப்பட்ட ஒரு பிரதேசமாகவடமாகாணம் உள்ளது. காலி கண்டி போன்ற இடங்களை அபிவிருத்தி செய்வதற்கும் வடமாகாணத்தை அபிவிருத்தி செய்வதற்கும் இடையில் பல வேறுபாடுகள் இருப்பதை அவதானிக்கவேண்டும்.
அதாவது, முதலில் எமது பிரதேசம் இயல் பான நிலைக்கு கொண்டுவரப்பட வேண்டும். கண்டி, காலி போன்ற மற்றைய இரண்டு நக ரங்களும் அபிவிருத்தி அடைந்த நகரங் கள். எம்மைப் பொறுத்தவரையில் மத்திய அரசி னால் புறக்கணிக்கப்பட்ட ஒரு பிரதேசமே எமது பிரதேசம் என்பதைக் உணரவேண்டும்.
பொருளாதார ரீதியாகவும் எமது மாகாணம் சற்று வேறுபட்டது. எம்மைப் பொறுத்த வரையில் விவசாய அடிப்படையிலான பொருளாதார விருத்தியையே நாங்கள் நாடி நிற்கின்றோம். சிறிய இடைநிலைதொழில் முயற்சிகளில் ஈடுபடவே நாங்கள் விரும்புகின் றோம். பாரிய செயற்றிட்டங்களை வகுத்து தொழிற்பேட்டைகளை உருவாக்கி எமது பாரம்பரியத்தையும் விவசாய பின்புலத்தையும் மாற்றியமைக்க நாங்கள் விரும்பவில்லை.
மேலும் சுற்றுலாத்துறை போன்றவை எமது பாரம்பரியம், கலாசாரம், இயற்கை வளங்கள் சுற்றாடல் போன்றவற்றிற்கு அமைவாக விருத்தி செய்யப்பட வேண்டும் என்பது எமது விருப்பம் என்றார்.
