இனப்பிரச்சினை குறித்து கால அட்டவணையின் பிரகாரம் பேச்சுவார்த்தை ஆரம்பிக்கப்படவேண்டும்
எமது இனப்பிரச்சினை இழுத்தடிப்புக்கள் இல்லாமல் ஒரு கால அட்டவணை உருவாக்கி பேச்சுவார்த்தை ஆரம்பிக்கப்படவேண்டுமென வலியுறுத்தியுள்ள இலங்கைத் தமிழரசுக் கட்சியின் தலைவர் மாவை சேனாதிராஜா ,
தேர்தல் அறிக்கையின் பிரகாரம் தமிழ்த் தேசியக் கூட்டமைப்பின் எதிர்காலச் செயற்பாடுகள் தொடர்பில் அரசு சர்வதேச சமூகம், புலம் பெயர் சமூகம், புத்திஜீவிகள் இளம் சமூகத்துடன் சந்திப்புக்கள், கலந்துரையாடல்களை மேற்கொண்டு அடுத்த கட்ட நகர்வை மேற்கொள்ளவுள்ளதாகவும் தெரிவித் தார்.
தமிழ்த் தேசியக் கூட்டமைப்பின் அடுத்த கட்ட நகர்வு தொடர்பாகக் கருத்து வெளியிடும்போதே அவர் இதனைத் தெரிவித்தார்.
மேலும் அவர் தெரிவிக்கையில்,
புதிய மாற்றத்திற்கு பின்னர் புதிய பாராளுமன்ற பிரதிநிதிகள் தெரிவு செய்யப்பட்டுள்ளார்கள். வடக்குகிழக்கில் எத்தனையோ குழப்பங்கள் திட்டமிட்ட பொய்ப் பிரசாரங்கள் தமிழத் தேசியக் கூட்டமைப்பு பிரதிநிதிகள் மீது சுமத்தப்பட்டபோதும் எம்முடைய மக்கள் மிக நிதானமாக தங்களுடைய திடசங்கற்பம் மீதும் தங்களுடைய இலக்கை நோக்கி தமிழ்த் தேசியக் கூட்டமைப்புத்தான் தங்கள் பிரதிநிதிகள் என்று தமது அங்கீகாரத்தை வழங்கியுள்ளார்கள்.
நாங்கள் எமது தேர்தல் அறிக்கையில் தெரிவித்தவாறு இனப்பிரச்சினை தீர்க்கப்படவும் நிலஅபகரிப்பு நிறுத்தப்பட்டு அபகரிக்கப்பட்ட நிலங்கள் விடுவிக்கப்படவேண்டும். அன்றாட பிரச்சினைகளுக்கும் தீர்வு காணப்படவேண்டும் என்பதில் உறுதியாகவுள்ளோம்.
குறிப்பாக ஜனவரி 8ஆம் திகதிக்குப் பின்னர் ஜனாதிபதி மைத்திரிபால சிறிசேன பிரதமர் ரணில் விக்கிரமசிங்க முன்னாள் ஜனாதிபதி சந்திரிக்கா ஆகியோருடன் பல்வேறு கட்டப் பேச்சுவார்த்தைகளை நடத்தியிருந்தோம். இந்நிலையில் புதிய ஆட்சி அமையவுள்ள ஆட்சியுடனும் பேச்சுவார்த்தைகளை மேற்கொள்ளவுள்ளோம்.
புதிய ஆட்சியும் எமது தேர்தல் அறிக்கையில் கூறப்பட்ட விடயங்களை ஏற்றுக் கொள்வார்கள்.
எமது இனப்பிரச்சினை இழுத்தடிப்புக்கள் இல்லாமல் ஒரு கால அட்டவணை உருவாக்கி பேச்சுவார்த்தை ஆரம்பிக்கப்படவேண்டும். இவை நடைபெறும் காலத்தில் எமது அன்றாட பிரச்சினைகளும் தீர்க்கப்படவேண்டும். மேலும் வடக்கு, கிழக்கில் தமிழ், முஸ்லிம் மக்கள், இளைஞர்களுக்கான வேலைவாய்ப்பு உருவாக்கவும் குறிப்பாக சர்வதேசத்துடன் இணைந்து பொருளாதாரத்தை உருவாக்கவும் முயற்சி மேற்கொள்ளப்படும்.
புதிய பாராளுமன்ற அமர்வுகள் ஆரம்பமான பின்னர் எமதுமக்களை கிராமங்கள் தோறும் சென்று தமது தேவைகள் தொடர்பிலும் அவசர அவசிய விடயங்களை அடையாளப்படுத்தவும் தேர்தல் காலத்தில் மக்களாலும் இளம் சமுதாயத்திலும் முன்வைக்கப்பட்ட ஆலோசனைகளுக்கு ஏற்ப நடவடிக்கை எடுக்கவுள்ளோம்.
எங்களுடைய இனப் பிரச்சினை அன்றாட பிரச்சினைகளைத் தீர்த்துக் கொள்வதில் தமிழர்கள் முஸ்லிம்கள் அவர்களது அரசியல் கட்டமைப்புகளுடனும் எமது ஆலோசனை முன்வைக்கவுள்ளதுடன் இனப்பிரச்சினைத் தீர்வு தேசத்தின் பொருளாதாரத்தை கட்டியெழுப்ப புலம்பெயர்ந்த சமூகம் புத்திஜீவிகள் மத்தியில் சென்று எமது தேசத்தை கட்டியெழுப்புவதற்கு கலந்து ரையாடல்களை மேற்கொள்ளவுள்ளோம் என்றார்.
