கூட்டமைப்பில் புளொட் சார்பில் யாழ்ப்பாணத்தில் சித்தார்த்தன் போட்டி

தமிழ்த் தேசியக் கூட்டமைப்பின் பங்காளிக்கட்சிகளில் ஒன்றாகிய புளொட் அமைப்பின் சார்பில் யாழ்ப்பாணத் தேர்தல் மாவட்டத்தில் அதன் தலைவர் த.சித்தார்த்தனும், மட்டக்களப்பு மாவட்டத்தில் சதாசிவம் வியாழேந்திரனும் போட்டியிடுவதற்கு புளொட் அமைப்பின் மத்திய குழு நேற்று அனுமதி வழங்கியுள்ளது. 

புளொட் அமைப்பின் மத்திய குழுக் கூட்டம் வவுனியாவில் நேற்று இடம்பெற்றது. அந்தக் கட்சியின் தலைவரும் வடக்கு மாகாண சபை உறுப்பினருமான த.சித்தார்த்தன் தலைமையில் இந்தக் கூட்டம் இடம்பெற்றது. இதன்போதே மேற்படி அனுமதி வழங்கப்பட்டுள்ளது. 

யாழ்ப்பாணத் தேர்தல் மாவட்டத்தில் த.சித்தார்த்தன், மட்டக்களப்பு மாவட்டத்தில் சதாசிவம் வியாழேந்திரன் (அமலன் மாஸ்ரர்) ஆகிய இருவரும் போட்டியிடுவதற்கு அனுமதி வழங்கி இறுதிசெய்யப்பட்டுள்ளது. வன்னி, திருகோணமலை, அம்பாறை தேர்தல் மாவட்டங்களில் பொருத்தமான வேட்பாளரை கட்சித் தலைவரே (த.சித்தார்த்தனே) தீர்மானிப்பதற்கும் மத்திய குழு அனுமதி வழங்கியுள்ளது.