"அரசியல் தீர்வைப் பெற்றுக் கொள்வதற்கான சந்தர்ப்பமாக தேர்தலை பயன்படுத்திக் கொள்ளவும்"
வடக்கு–கிழக்கில் வாழும் தமிழ் மக்கள் நிரந்தர அரசியல் தீர்வைப் பெற்றுக் கொள்வதற்கான நல்ல சந்தர்ப்பமாக எதிர்வரும் பொதுத் தேர்தலை பயன்படுத்த வேண்டும்.
எதிர்வரும் செப்டெம்பர் மாதம் ஐக்கிய நாடுகள் சபையின் அறிக்கை வெளியாகவுள்ளதை மனதில் கொண்டு, தமிழ் மக்களின் அரசியல் பலம் தமிழ்த் தேசியக் கூட்டமைப்புத்தான் என்பதை உணர்ந்து உணர்வு பூர்வமான முறையில் இத் தேர்தலில் தமிழ்த் தேசியக் கூட்டமைப்புக்கு வாக்களிக்க வேண்டியது தலையாய கடமையாகும் என தமிழ்த் தேசியக் கூட்டமைப்பின் முன்னாள் பாராளுமன்ற உறுப்பினர் பா. அரியநேத்திரன் குறிப்பிட்டார்.
பாராளுமன்ற பொதுத் தேர்தலும், தமிழ் மக்களின் நிலைப்பாடும் என்ற தொனிப்பொருளில், முன்னாள் பாராளுமன்ற உறுப்பினர். பா. அரியநேத்திரன் மேலும் குறிப்பிடுகையில்,
கடந்த காலங்களில் பல்வேறு அச்சுறுத்தல்கள், கெடுபிடிகள் என்பவற்றுக்கு மத்தியிலும் எமது தமிழ் மக்கள் கொண்ட கொள்கைகளில் பற்றுறுதி கொண்டவர்களாக சகல தேர்தல்களிலும் தமிழ்த் தேசியக் கூட்டமைப்புக்கு வாக்களித்து தமிழ் உணர்வை பறைசாற்றினார்.
இன்று இத்தகைய சூழ்நிலை தணிந்து, எமது மக்கள் ஓரளவேனும் சுதந்திரமாக நடமாடவும், தமது கருத்துக்களை பரிமாறிக் கொள்ளவும் ஏற்ற சூழல் உதயமாகியுள்ளது. இந்த சுமுகமான சூழலில் எமது தமிழ் மக்களின் வாக்களிப்பு வீதம் அதிகரிக்கப்படுவதுடன், அதன் பலாபலன் எமது மக்களுக்கு விடிவைத் தரும் முடிவை அளிப்பதாக இருக்க வேண்டும்.
பாராளுமன்ற பொதுத் தேர்தலில் நாம் யாருக்கு வாக்களிக்கப் போகின்றோம் என்பது முக்கியமல்ல. மாறாக நாம் எந்தக் கட்சிக்கு வாக்களிக்கின்றோம். இதனால் எமக்கு ஏற்படப் போகும் நன்மை தீமை என்னவென்பதே முக்கியம்.
இந்த வகையில் தமிழ் மக்களாகிய நாம் தமிழ்த் தேசியக் கூட்டமைப்புக்கு வாக்களிக்கத் தவறுவோமாயின் நாம் பல வருட காலமாக பல கோணங்களில் நடத்திய போராட்டங்கள், எமது மக்கள் சிந்திய இரத்தங்கள், தியாகங்கள், உயிர் இழப்புக்கள், சொத்திழப்புக்கள் உள்ளிட்ட பல விடயங்கள் அர்த்தமற்றதாகி விடும்.
எனவே நாம் இத் தேர்தலை தியாக வேள்வியாக கருதி, ஒன்றுபட்ட சக்தியாக தமிழர்கள் தமிழ்த் தேசியக் கூட்டமைப்பின் கீழ் அணிதிரண்டுள்ளனர் என்பதை உலகிற்கு உரத்துச் சொல்ல வேண்டும் என்றார்.
