மஹிந்தவை இணைத்ததன் மூலம் கட்சிக்கு பெரும் பலம்! ரணிலை தோற்கடிப்போம் என்கிறார் நிமல்
ஐக்கிய மக்கள் சுதந்திரக் கூட்டணியில் மஹிந்த ராஜபக்ஷவை இணைத்துக்கொண்டமை கட்சியை பலப்படுத்தும் செயற்பாடா கும். ஆனால் பிரதமர் வேட்பாளராக மஹிந்த ராஜபக் ஷவை நியமிப்பது தொடர்பில் இன்னமும் தீர்மானிக்கப்படவில்லை என்று எதிர்க்கட்சித் தலைவர் நிமல் சிறிபால டி சில்வா தெரிவித்தார்.
எதிர்வரும் பொதுத் தேர்தலில் ரணிலை தன்னால் வீழ்த்த முடி யும் எனவும் அவர் குறிப்பிட்டார். ஸ்ரீலங்கா சுதந்திரக்கட்சியின் தலைமையிலான ஐக்கிய மக்கள் சுதந்திரக் கூட்டணியின்
தேர்தல் நடவடிக்கைகள் மற்றும் பிரதமர் வேட்பாளர் தொடர்பில் வினவிய போதே அவர் மேற்கண்டவாறு தெரிவித்தார்.
அவர் மேலும் கூறுகையில்,
ஐக்கிய மக்கள் சுதந்திரக் கூட்டணியை ஒன்றிணைத்து மீண்டும் பலமான ஆட்சியை அமைக்க வேண்டும் என்பதே எம் அனைவரினைதும் எதிர்பார்ப்பாகும். ஜனாதிபதி மைத்திரிபால சிறிசேன மற்றும் கட்சியின் உறுப்பினர்கள் அனைவரும் ஒன்றிணைத்து நல்லாட்சியை ஏற்படுத்தும் நோக்கத்தில் தான் கடந்த காலங்களில் நாம் போராடினோம்.
இந்த போராட்டத்தில் மஹிந்த ராஜபக் ஷவை மீண்டும் இணைத்துக்கொள்ள வேண்டும் என்ற எண்ணம் கட்சிக்குள் அனைவருக்கும் இருந்தது. அதை தடுக்க ஒருசில புறக் காரணிகளும், சர்வதேச மற்றும் பிரிவினைவாத சக்திகள் செயற்பட்டன. ஆனால் இன்று அவற்றை வெற்றி கொண்டு கட்சியை பலப்படுதிவிட்டோம். முன்னாள் ஜனாதிபதி மஹிந்த ராஜபக் ஷ மீண்டும் எம்முடன் கைகோர்த்தமை வரவேற்கத்தக்க விடயமாகும்.
மேலும் ஐக்கிய மக்கள் சுதந்திரக் கூட்டணியின் வேட்பாளர் பட்டியலில் மஹிந்த ராஜபக் ஷவும் இணைத்துக் கொள்ளப்பட்டுள்ளார். ஆனால் கட்சியின் பிரதமர் வேட்பாளர் யார் என்பது இன்னும் தீர்மானிக்கப் படவில்லை. மஹிந்தவை பிரதமர் வேட்பாளராக்க வேண்டும் என ஒரு சிலர் தமது தனிப்பட்ட கருத்துக்களை முன்வைத்துள்ளனர்.
என்னை பிரதமர் வேட்பாளர் ஆக்கக் கோரியும் சில பரிந்துரைகள் முன்வைக்கப்பட்டுள்ளது. அவ்வாறு இன்னும் சில முக்கிய உறுப்பினர்களின் பெயர்களும் பரிந்துரைக்கப்பட்டுள்ளன. ஆகவே இதில் இறுதி முடிவை கட்சியின் தலைவரும் கட்சியின் மத்திய குழுவுமே தீர்மானிக்கும். கட்சியின் இறுதி முடிவு எவ்வாறு அமையுமோ அதற்கு கட்சியின் அனைத்து உறுப்பினர்களும் கட்டுப்பட வேண்டும் என்பதில் நாம் முரண்படமாட்டோம். அதேபோல் கட்சியில் யாரை பிரதமர் வேட்பாளராக நிறுத்தினாலும் எதிர்த்தரப்பு வேட்பாளர் ரணில் விக்கிரமசிங்கவுக்கு சவாலாகவே அமையும்.
என்னால் ரணில் விக்கிரமசிங்கவை தோற்கடிக்க முடியும். நாம் கட்சியாக ஒன்றுபட்டால் ஐக்கிய தேசியக் கட்சியை வீழ்த்துவோம் என்பதை மறந்துவிடவேண்டாம். மஹிந்த மட்டுமல்ல என்னை நிறுத்தினாலும் ரணிலுக்கு நெருக்கடியாகவே அமையும்.
நாம் எப்படியேனும் இம்முறை தேர்தலில் வெற்றிபெற்று ஆட்சியை கைப்பற்றுவோம். அதில் எந்த சந்தேகமும் இல்லை. அதேபோல் இனிமேல் தேசிய அரசாங்கம் என்ற பேச்சுக்கே இடம் இல்லை. ஸ்ரீலங்கா சுதந்திரக் கட்சியின் தலைமையில் ஐக்கிய மக்கள் சுதந்திரக் கூட்டணி ஆட்சியையே உருவாக்குவோம். அதேபோல் தமிழ், முஸ்லிம் மக்களையும் இணைத்துக்கொண்டு மீண்டும் ஜனநாயக ஆட்சியை நாம் முன்னெடுக்க வேண்டும். எமது ஆட்சியில் நாட்டில் யுத்தம் முடிவுக்கு கொண்டுவரப்பட்டது. வடக்கிலும், கிழக்கிலும் அமைதியான சூழல் உருவாக்கப்பட்டது.
ஆனால் கடந்த ஆறுமாத காலத்தில் இவை அனைத்தும் மீண்டும் அழிக்கப்பட்டுள்ளன. வென்றெடுத்த ஜனாயகம் மீண்டும் பிரிவினைவாதிகளின் செயற்பாடுகளுக்காக தாரைவாக்கப்பட்டுள்ளது. புலம்பெயர் புலிகளின் தேவைக்காக நாட்டை காட்டிக்கொடுக்கும் செயற்பாடுகளை ஐக்கிய தேசியக் கட்சி மேற்கொண்டு வருகின்றது. ஆகவே இவை அனைத்தையும் தடுத்து மீண்டும் நாட்டை பாதுகாத்து வளமான நாட்டை கட்டியெழுப்ப வேண்டும். அதற்கு இம்முறை தேர்தலை சாதகமாக நாம் பயன்படுத்திக் கொள்வோம் எனக் குறிப்பிட்டார்.
