கிழக்கை அபிவிருத்தி செய்யும்வரை தேர்தலில் இறங்கப் போவதில்லை! - கிழக்கு முதலமைச்சர்
கிழக்கை அபிவிருத்தி செய்யும்வரை தேர்தலில் இறங்கப்போவதில்லை என கிழக்கு மாகாண முதலமைச்சர் ஹாபீஸ் நஸீர் அஹமட் தெரிவித்தார்.
முதலமைச்சர் நஸீர் அஹமதிடம் பொதுத்தேர்தல் பற்றி கேட்ட போதே அவர் மேற்கண்டவாறு கூறினார்.
இது தொடர்பாக அவர் மேலும் கூறுகையில்,
கிழக்கில் தேங்கிக் கிடக்கும் பாரிய அபிவிருத்திகளான வேலையற்ற இளைஞர், யுவதிகளுக்கு வேலைவாய்ப்பு வெளிநாடுகளுக்கு செல்லும் பணிப்பெண்களைத் தடுத்து அவர்களை சுயதொழில் முயற்சிக்கு ஊக்குவித்தல் போன்றவற்றுடன் கிழக்கில் செய்யப்படவிருக்கின்ற பாரிய அபிவிருத்திப் பணிகளை என் ஆட்சியில் செய்து முடிக்கும்வரை தேர்தலில் போட்டியிடுவதில்லை.
பொதுத் தேர்தலில் என்னைக் களமிறங்குமாறு என் நண்பர்களும், ஆதரவாளர்களும் கேட்டுக்கொண்டிருந்தனர். கிழக்கு மாகாண மக்களின் கோரிக்கை கருதியும், இங்குள்ள அபிவிருத்தி கருதியும் நான் போட்டியிடுவதில் இருந்து பின்வாங்கினேன். ஆனால் இத்தேர்தலானது நல்லாட்சியின் பார்வையில் முக்கியம் வாய்ந்த தேர்தலாகும். ஒவ்வொரு பொதுமகனும் சிறந்த முறையில் சிந்தித்து தங்களின் வாக்குரிமைகளைப் பாவிக்க வேண்டும்.
மீண்டும் இந்த நாட்டில் கடந்த கால நிலைமைகள் தலைதூக்க விடாமல் நாசமடைந்திருக்கும் நல்லாட்சியை மேலும் மெருகூட்டி நாட்டில், வீட்டில் ஒவ்வொரு பொதுமகனும் சந்தோஷமாக தங்கள் குடும்பங்களுடன் வாழவேண்டும். அந்த நிலைமை என்றும் இந்நாட்டில் இருக்கவேண்டும். இனமத வேறுபாடுகளற்ற ஆட்சி சிறப்பாக இந்நாட்டில் நடைபெற வேண்டுமென்பதே எனது ஆவலாகும்.
அந்த வகையில் இத்தேர்தலில் புதியவர்களுக்கு இடமளித்து கிழக்கில் தேங்கிக் கிடக்கும் முக்கிய அபிவிருத்திகளை மூவினமக்களும் வாழும் கிழக்கு மாகாணத்தில் சிறப்பாக முன்னெடுத்து செய்து முடிக்க வேண்டும் என்பதில் உறுதியாக செயற்பட்டுக் கொண்டிருக்கிறேன்.
அந்தவகையில் ஒவ்வொரு தேர்தல் மாவட்டங்களிலும் போட்டியிடும் நான் சார்ந்த கட்சி வேட்பாளர்களுக்கு எனதும் எனது ஆதரவாளர்களினதும் ஆதரவும் சிறப்பாகக் கிடைக்கும், என்பதில் எந்தச்சந்தேகமுமில்லை. பிரசாரத்திலும் ஈடுபடத் தயாராக இருக்கிறேன்.
நாட்டில் சமாதானமும், அமைதியும் மேலோங்க எந்தவித பிரச்சினைகளும் இல்லாமல் இந்த தேர்தலில் முகம்கொடுக்குமாறு சகல வேட்பாளர்களையும் பொதுமக்களையும் கிழக்கு மாகாண முதலமைச்சர் என்றவகையில் கேட்டுக்கொள்கிறேன். என்றும் அவர் தெரிவித்தார்.
