தமிழ் தேசிய கூட்டமைப்பின் நியாயமான கோரிக்கைகள் குறித்து ஆராய்வதற்கு தயாராக இருக்கிறோம் -மஹிந்த
தமிழ்த் தேசியக் கூட்டமைப்பின் நியாயமான கோரிக்கைகள் குறித்து ஆராய்வதற்கு தயாராக இருக்கின்றோம். ஆனால் நாட்டை பிரிப்பதற்கு இட்டுச் செல்லும் கோரிக்கைகளை நிராகரிக்கின்றோம் என்று முன்னாள் ஜனாதிபதி மஹிந்த ராஜபக்ஷ தெரிவித்தார்.
மாத்தளையில் நேற்று முன்தினம் நடைபெற்ற ஐக்கிய மக்கள் சுதந்திர முன்னணியின் தேர்தல் பிரசாரக்கூட்டத்தில் கலந்துகொண்டு உரையாற்றுகையிலேயே அவர் மேற்கண்டவாறு குறிப்பிட்டார்.
அவர் அங்கு மேலும் குறிப்பிடுகையில்
தமிழ்த் தேசியக் கூட்டமைப்பின் நியாயமான கோரிக்கைகள் குறித்து பரிசீலிக்கவேண்டும் என்பதே எனது நிலைப்பாடாகும். தமிழ் மக்கள் முகம்கொடுக்கின்ற பிரச்சினைகள் குறித்து நியாயமான ரீதியில் ஆராயவேண்டும். ஆனால் தமிழ்த் தேசியக் கூட்டமைப்பு முன்வைக்கின்ற நாட்டை பிரிப்பதற்கு இட்டுச் செல்லும் கோரிக்கைகளை நிராகரிக்கின்றோம். அவற்றை நாங்கள் தவிர்க்கின்றோம் என்றார்.
கடந்த சனிக்கிழமை தனது தேர்தல் விஞ்ஞாபனத்தை முன்வைத்த தமிழ்த் தேசியக் கூட்டமைப்பு சமஷ்டி முறைமையில் தேசிய பிரச்சினைக்கு தீர்வை எதிர்பார்ப்பதாக தெரிவித்தது.
நாட்டின் தேசிய இனப்பிரச்சினைக்கு ஒன்று பட்ட இலங்கைக்குள் சமஷ்டிக் கட்டமைப்பின் ஊடாக அதி உச்ச அதிகாரபகிர்வே தீர்வாக அமையும் என தமிழ் தேசியக்கூட்டமைப்பு கடந்த தனது தேர்தல் விஞ்ஞாபனத்தில் வலியுறுத்தியுள்ளது.
அத்துடன் தமிழ் பேசும் மக்களின் வரலாற்று ரீதியான வாழ்விடப்பகுதிகளான
வடக்கு, கிழக்கில் சுயநிர்ணய உரிமையின் பிரகாரம் இந்தத் தீர்வு அமையவேண்டு மென்றும், இதுவே நாட்டின் இனப்பிரச் சினைக்கு நிரந்தர தீர்வாக அமையும் என்றும் அதில் குறிப்பிடப்பட்டுள்ளது.
