மஹிந்த – மைத்திரி ஆட்சியை மீண்டும் அமைப்போம்! ஒன்றிணைந்த எதிர்க்கட்சி ஆருடம்
தேசிய அரசாங்கத்தின் மோசடி ஆட்சியின் இறுதி அத்தியாயங்கள் இப்போது அரங்கேறி வருகின்றன. எதிர்வரும் தேர்தலின் பின்னர் மீண்டும் மஹிந்த –மைத்திரி ஆட்சியை அமைப்போம் என எதிர்க்கட்சி தெரிவித்தது.
மஹிந்தவை வெற்றிபெறச் செய்வதா அல்லது வீழ்த்துவதா என்பதை மக்களே தீர்மானிக்க வேண்டும். மாறாக சர்வதேசம் தீர்மானிக்க முடியாது எனவும் எதிர்க்கட்சி குறிப்பிட்டது. மஹிந்த ஆதரவு அணியினர் நேற்று அபயராம விகாரையில் செய்தியாளர் சந்திப்பொன்றினை நடத்தினர். இனத்போதே மஹிந்த ஆதரவு அணியினர் மேற்கண்டவாறு குறிப்பிட்டனர்.
இந்த சந்திப்பில் முன்னாள் அமைச்சர் வாசுதேவ நாணயக்கார தெரிவிக்கையில்,
ஐக்கிய மக்கள் சுதந்திர முன்னணியின் பலம் நாளுக்கு நாள் கூடிக்கொண்டே வருகின்றது. கட்சியை பிளவுபடுத்தி ஸ்ரீலங்கா சுதந்திரக் கட்சியை தனிக் கட்சியாகவும் ஐக்கிய மக்கள் சுதந்திர முன்னணியை தனிக் கட்சியாகவும் மாற்றியமைக்க பலர் திட்டம் தீட்டினர். ஆனால் அவர்கள் கண்ட கனவு நனவாகவில்லை. ஐக்கிய மக்கள் சுதந்திர முன்னணி எதிர்வரும் பொதுத் தேர்தலில் பலமான கூட்டணியாக களமிறங்க தயாராகி விட்டது. ஐக்கிய தேசியக் கட்சி பண பலத்தையும், அமைச்சு அதிகாரங்களையும் தன்வசம் வைத்துக்கொண்டு மக்களுக்கு இலஞ்சம் கொடுக்க தயாராகி வருகின்றது.
இப்போதே அவர்களது தேர்தல் வியாபாரம் ஆரம்பமாகிவிட்டது. ஆனால் நாம் எமது மக்கள் பலத்தை மட்டும் நம்பியே இம்முறை களத்தில் இறங்குகின்றோம். எமது வெற்றியை தட்டிப்பறிக்க யார் முயற்சித்தாலும் நாம் அவை அனைத்தையும் தாண்டி மிகப்பெரிய வெற்றியை பெறுவோம்.
விமல் வீரவன்ச
செய்தியாளர் மாநாட்டில் கலந்து கொண்ட முன்னாள் அமைச்சர் விமல் வீரவன்ச கருத்து தெரிவிக்கையில்,
ஐக்கிய மக்கள் சுதந்திர முன்னணியில் இரு பிரிவுகளை ஏற்படுத்தும் முயற்சிகள் மேற்கொள்ளப்பட்டன. ஆயினும் அவற்றுக்கு முற்றுப்புள்ளி வைத்து கட்சியை மீண்டும் ஒரு கூட்டணியாக்கி இம்முறை தேர்தலை எதிர்கொள்ள நாம் தயாராகியுள்ளோம். வெற்றியை நோக்கிய எமது பயணத்தில் முன்னாள் ஜனாதிபதி மஹிந்தவை முதன்மைப்படுத்தி களத்தில் இறங்கியுள்ளோம். மீண்டும் மஹிந்த ஆட்சியை அமைப்பதே எமது ஒரே நோக்கமாகும்.
மேலும் கடந்த காலத்தில் எமது அரசாங்கத்தை மோசடிகார அரசாங்கமாக விமர்சித்தவர்கள் இன்று மிகவும் மோசமான ஆட்சியை நடத்துகின்றனர். நல்லாட்சி பற்றி பேசியவர்கள் இன்று அராஜக ஆட்சியை நடத்துகின்றனர். எமது ஆட்சியில் நிதி மோசடிகள், குற்றச் செயல்கள், ஊடக அடக்குமுறை தொடர்பில் பேசியவர்கள் இன்று என்ன செய்கின்றனர் என்பது வெளியாகியுள்ளது.
இலங்கையின் நிதித்துறையில் மிகப்பெரிய ஊழல் மோசடி இம்முறை ஐக்கிய தேசியக் கட்சியின் ஆட்சியில் நடந்துள்ளது. இது மிகப்பெரிய கறுப்புப் புள்ளியாகவே பதிவாகியுள்ளது. அதேபோல் இந்த அரசாங்கம் ஊடகங்களை மிகவும் ஏளனமாக நடத்துகின்றது. ஊடகவியலாளர்கள் சுயாதினமாக செயற்பட முடியாது உள்ளது. அரசாங்கத்துக்கு எதிராக ஏதேனும் செய்திகள் வெளியாகினால் நேரடியாக பிரதமரின் தலையீடுகள் இடம்பெறுகின்றன.
ஆகவே அடக்குமுறைகளை கையாண்டு மக்களை ஏமாற்றி ஆட்சியை கைப்பற்ற ஐக்கிய தேசியக் கட்சி முயற்சிக்கின்றது. ஆனால் ஐக்கிய தேசியக் கட்சியினால் ஆட்சியை அமைக்க முடியாது. அவர்களை தலைதூக்க நாம் அனுமதிக்க மாட்டோம். எனவே மைத்திரிபால சிறிசேன மற்றும் மஹிந்த ராஜபக்ஷ ஆகியோரின் கூட்டணியே நாட்டை பலப்படுத்தும். அந்த ஆட்சியை நாம் இம்முறை ஏற்படுத்துவோம் என்றார்.
பந்துல குணவர்தன.
இதில் கலந்துகொண்ட முன்னாள் அமைச்சர் பந்துல குணவர்தன தெரிவிக்கையில்,
இந்த நாட்டுக்கு மைத்திரி –ரணில் தலைமையிலான ஆட்சி பொருத்தமில்லை. மைத்திரி –மஹிந்த ஆட்சியே இந்த நாட்டுக்கு பொருத்தமானது. அந்த ஆட்சியை உருவாகக் நாம் முயற்சித்து வருகின்றோம்.
கடந்த ஆறு மாதங்களில் இந்த நாட்டில் பல மோசடிகள் இடம்பெற்றுள்ளன. அதில் மத்திய வங்கி ஊழல் மிகவும் முக்கியமானதாகும். மக்களையும், ஏனைய கட்சிகளையும் ஏமாற்றி இந்த ஊழலை ஐக்கிய தேசியக் கட்சி செய்துள்ளது. இலங்கையின் அரசியல் வரலாற்றில் இவ்வாறானதொரு நிதி மோசடி வேறு எப்போதிலும் நடைபெற்றதில்லை. அந்த சாதனையையும் ஐக்கிய தேசியக் கட்சி படைத்துள்ளது.
எனவே மீண்டும் நாட்டில் ஜனநாயக ஆட்சியை கொண்டுவர வேண்டும். மக்கள் விரும்பும் நல்லாட்சியை மீண்டும் உருவாக்க வேண்டும். அதற்கான அனைத்து நடவடிக்கைகளையும் நாம் மேற்கொண்டு வருகின்றோம். மீண்டும் மஹிந்த ராஜபக் ஷ தலைமையில் நாட்டில் நல்லாட்சியை ஏற்படுத்தி மஹிந்த –மைத்திரி அரசாங்கத்தை ஏற்படுத்துவோம் என்றார்.
உதய கம்மன்பில
இந்த செய்தியாளர் சந்திப்பில் கலந்துகொண்டிருந்த தூய்மையான ஹெல உறுமைய அமைப்பின் தலைவர் உதய கம்மன்பில தெரிவிக்கையில்,
ஐக்கிய தேசியக் கட்சி நடத்திவரும் நல்லாட்சியின் இறுதி அத்தியாயங்கள் இன்று அரங்கேறிக்கொண்டிருக்கின்றன. தேசிய அரசாங்கத்தில் பல கூட்டுக் கட்சிகள் கைகோர்த்தன. ஆனால் இன்று அவை அனைத்தும் தேசிய அரசாங்கத்தின் கூட்டில் இருந்து விலகியுள்ளன. கடந்த ஜனாதிபதி தேர்தலின் போது இந்த அரசாங்கத்துக்கு 62 இலட்சம் வாக்குகள் கிடைத்தது. இந்தக் கணக்கையே இப்போதும் வைத்துக்கொண்டு ஐக்கிய தேசியக் கட்சி வெற்றிக் கனவில் உள்ளனர்.
ஆனால் இந்த கூட்டணியில் இருந்து இம்முறை தமிழ்த தேசியக் கூட்டமைப்பு, மக்கள் விடுதலை முன்னணி, ஜனநாயகக் கட்சி, ஜாதிக ஹெல உறுமைய ஆகிய பிரதான கட்சிகள் வெளியேறிவிட்டன. இதில் தமிழ்த் தேசியக் கூட்டமைப்பு 7 இலட்சம் வாக்குகளுடன் வெளியேறிவிட்டது, மக்கள் விடுதலை முன்னணி 5 இலட்சம் வாக்குகளுடனும், ஜனநாயகக் கட்சி 2 இலட்சம் வாக்குகளுடனும், ஜாதிக ஹெல உறுமைய 1 இலட்சம் வாக்குகளுடனும் வெளியேறியுள்ளனர்.
அதேபோல் ஜனாதிபதி மைத்திரிபால சிறிசேனவின் சுமார் 3இலட்சம் வாக்குகளும் இம்முறை எமக்கே வந்தடைந்துள்ளது. ஆகவே 62 இலட்சம் வாக்குளில் வெளியேறிய கூட்டணிக் கட்சிகளின் 18 இலட்சம் வாக்குகள் வெளியேறினால் அவர்களுக்கு 44 இலட்சம் வாக்குகளே உள்ளது. இதில் கடந்த ஆறு மாதகாலத்தில் இந்த அரசாங்கத்தை வெறுத்துள்ள மக்களின் எண்ணிக்கை 1௦ இலட்சம் அளவில் உள்ளனர். அவர்களது வாக்குகளும் எமது பக்கம் சேரும். ஆகவே இம்முறை ஐக்கிய தேசியக் கட்சி மிகவும் மோசமானதொரு தோல்வியை சந்திக்கும். அதேபோல் நாம் இம்முறை வரலாறு காணாத வெற்றியை பெறுவோம்.
மேலும் முன்னாள் ஜனாதிபதி மஹிந்த ராஜபக் ஷவை தேர்தலில் களமிறக்குவதா, இல்லையா என்பதை தெரிவு செய்வது ஐக்கிய மக்கள் சுதந்திர முன்னணியே. அதேபோல் மஹிந்தவை வெற்றிபெற வைப்பதா அல்லது தோல்வியுற வைப்பதா என்பதை மக்கள் தான் தீர்மானிக்க வேண்டும். இதில் சர்வதேச நாடுகள் தலையிட வேண்டிய அவசியம் இல்லை. ஆனால் மஹிந்தவின் அரசியலை தீர்மானிக்கும் வேலையினை நோர்வே, கனடா போன்ற நாடுகள் செய்கின்றன. சர்வதேச தலையீடுகளை நாம் அனுமதிக்கப் போவதில்லை எனக் குறிப்பிட்டார்.
