பிரேரணையை தோற்கடிப்போம்! ஐ.தே.க., கூட்டமைப்பு, ஸ்ரீல.மு.கா. சூளுரை
பிரதமர் ரணில் விக்கிரமசிங்கவுக்கு எதிராக ஐக்கிய மக்கள் சுதந்திர முன்னணி சமர்ப்பித்துள்ள நம்பிக்கையில்லா பிரேரணையை தோற்கடிப்போம் என ஐக்கிய தேசியக் கட்சி, மக்கள் விடுதலை முன்னணி, தமிழ்த் தேசியக் கூட்டமைப்பு மற்றும் சிறிலங்கா முஸ்லிம் காங்கிரஸ் ஆகிய கட்சிகள் சூளுரைத்துள்ளன.
பிரதமருக்கு எதிராக கொண்டுவரப்படும் நம்பிக்கையில்லா பிரேரணையை ஆதரிக்கப் போவதில்லை என்றும் அதனை தோற்கடிக்க அனைத்து செயற்பாடுகளையும் முன்னெடுப்பதாகவும் இந்தக் கட்சிகள் குறிப்பிட்டுள்ளன. பிரதமர் ரணிலுக்கு எதிராக நம்பிக்கையில்லா பிரேரணை ஐக்கிய மக்கள் சுதந்திரக் கூட்டமைப்பின் 112 உறுப்பினர்கள் கைச்சாத்திட்டு சமர்ப்பித்துள்ள நிலையில் அது தொடர்பில் வினவியபோதே இந்தகட் சிகளின் பிரதிநிதிகள் மேற்கண்டவாறு குறிப்பிட்டனர்.
ஐக்கிய தேசிய கட்சி
ஐக்கிய தேசியக் கட்சியின் பாராளுமன்ற உறுப்பினர் அஜித் பி பெரேரா இது தொடர்பில் கூறுகையில்,
பிரதமருக்கு எதிராக கொண்டுவரும் நம்பிக்கை இல்லா பிரேரணையை ஒரு போதும் அனுமதிக்கப் போவதில்லை. பிரேரணை பாராளுமன்றத்தில் சமர்ப்பிக்கப்பட்டால் அதை தோற்கடிப்போம். பாராளுமன்றத்தில் தற்போது எமக்கே பலம் உள்ளது. இவ்வாறான நிலையில் பிரதமருக்கு எதிராக நம்பிக்கை இல்லா பிரேரணை கொண்டுவந்தாலும் அதை எதிர்த்து வாக்களிக்கும் உறுப்பினர்களின் எண்ணிக்கை அதிகமாக உள்ளது. ஆகவே நம்பிக்கை இல்லா பிரேரணை கொண்டு வந்தால் அதை நாம் தோற்கடிப்போம்.
அதேபோல் ஸ்ரீலங்கா சுதந்திரக் கட்சி தேர்தலுக்கு தயாராக இருந்தால் பாராளுமன்றத்தை கலைத்து உடனடியாக தேர்தலுக்கு செல்ல முடியும். ஆனால் இன்று மஹிந்த கூட்டணியே தேர்தலுக்கு பயந்துவிட்டது. இவர்கள் பிரதமர் ரணிலுக்கு எதிராக செயற்பட்டாலும் அல்லது எமக்கு சேறு பூசும் நடவடிக்கைகளை மேற்கொண்டாலும் பொதுத் தேர்தலின் பின்னரும் ஐக்கிய தேசியக் கட்சியின் அரசாங்கமே அமையும். மக்களின் பெரும்பான்மை ஆதரவுடன் மீண்டும் ரணில் விக்கிரமசிங்க பிரதமராவார் எனக் குறிப்பிட்டார்.
தமிழ்த் தேசியக் கூட்டமைப்பு,
இந்நிலையில் பிரதமருக்கு எதிராக கொண்டுவரப்படவுள்ள நம்பிக்கை இல்லா பிரேரணை தொடர்பில் தமிழ் தேசியக் கூட்டமைப்பின் நிலைப்பாட்டினை வினவியபோது கூட்டமைப்பின் பாராளுமன்ற உறுப்பினர் சுமந்திரன் பதிலளிக்கையில்,
பிரதமருக்கு எதிரான நம்பிக்கை இல்லா பிரேரணை கொண்டுவருவது என்பது சாத்தியமற்றதாகும். இதற்கு முன்னர் பல சந்தர்ப்பங்களில் பாராளுமன்றம் கூடிய போதும் பிரதமருக்கு எதிராக நம்பிக்கை இல்லா தீர்மானம் கொண்டுவருவது தொடர்பில் இவர்கள் தெரிவித்தனர். ஆனால் ஒரு சந்தர்ப்பத்திலேனும் அதை நிறைவேற்ற முடியவில்லை. ஆகவே இனிமேலும் பிரதமருக்கு எதிராக நம்பிக்கை இல்லா பிரேரணை கொண்டு வரும் சாத்தியம் இல்லை. அவ்வாறான நடவடிக்கைகள் மேற்கொள்ளப்படுமாயின் அந்த சந்தர்ப்பத்தில் நாம் தீர்மானம் எடுப்போம். என்னினும் இப்போது நம்பிக்கை இல்லா தீர்மானத்தை ஆதரிக்கும் எண்ணம் இல்லை எனக் குறிப்பிட்டார்.
முஸ்லிம் காங்கிரஸ்
இது தொடர்பில் முஸ்லிம் காங்கிரஸின் பொதுச் செயலாளர் ஹசன் அலி தெரிவிக்கையில்,
பிரதமருக்கு எதிரான நம்பிக்கை இல்லா பிரேரணைக்கு நாம் ஒருபோதும் ஆதரவு தெரிவிக்க மாட்டோம். ஒரு தனி மனிதனை பழிவாங்கவே இவ்வாறான பிரேரணை கொண்டுவரப்படுகின்றதே தவிர இதனால் நாட்டுக்கு எந்த பயனும் இல்லை. ஆகவே இந்த நம்பிக்கை இல்லா பிரேரணையை நிராகரிக்க வேண்டும். மேலும் இப்போது நடைமுறையில் இருக்கும் பாராளுமன்றமானது ஐந்து வருடங்களுக்கு முன்னர் நியமிக்கப்பட்டதாகும். ஆனால் கடந்த ஜனாதிபதி தேர்தலின் போது இதில் பலரை மக்கள் நிராகரித்து விட்டனர். மக்கள் இப்போது தமக்கான புதிய தலைவர்களை நியமித்துள்ளனர். ஆகவே பிரதமருக்கு எதிராக நம்பிக்கை இல்லா பிரேரணையை கொண்டுவர ஸ்ரீலங்கா சுதந்திரக் கட்சியில் எவருக்கும் அருகதை இல்லை. எனவே ஸ்ரீலங்கா முஸ்லிம் காங்கிரஸ் பிரதமருக்கு எதிரான நம்பிக்கை இல்லா பிரேரணையை ஒருபோதும் ஆதரிக்காது என்றார்.
ஜே.வி.பி
மக்கள் விடுதலை முன்னணியின் பொதுச் செயலாளர் ரில்வின் சில்வா குறிப்பிடுகையில்,
கடந்த காலத்தில் பல சந்தர்ப்பங்களில் எதிர்க்கட்சியால் நம்பிக்கை இல்லா பிரேரணையை கொண்டுவருவதாக தெரிவித்தனர். ஆனால் இன்றுவரை ஒன்றையேனும் இவர்கள் கொண்டுவரவில்லை. தமது அரசியல் சுயநலத்துக்காக ஒருசிலர் சவால் விடுவதை நாம் பெரிதுபடுத்தவும் இல்லை. மேலும் அடுத்த ஒரு சில வாரங்களில் பாராளுமன்றம் கலைக்கப்பட வேண்டும் என்பதே எமது நிலைப்பாடாகும். அவ்வாறு கலைக்கப்படுமாயின் இவ்வாறான நம்பிக்கை இல்லா பிரேரணைகள் எவையும் அவசியப்படாது.
எனவே பிரதமர் ரணிலுக்கு எதிராக நம்பிக்கை இல்லா பிரேரணை கொண்டுவந்தால் அந்த சந்தர்ப்பத்தில் நாம் தீர்மானம் எடுப்போம். பிரேரணையை ஆதரிப்பதா அல்லது நிராகரிப்பதா என்பது தொடர்பில் இப்போது எந்த தீர்மானமும் இல்லை எனக் குறிப்பிட்டார்.
