கற்றுக் கொடுத்த ‘கூல் கேப்டன்’ டோனி: உருகும் ரஹானே

சூழ்நிலைகளுக்கு ஏற்றார் போல் செயலாற்ற வேண்டும் என்பதை கற்றுக் கொடுத்தவர் டோனி என்று இந்திய அணியின் முன்னணி வீரர் அஜிங்கே ரஹானே தெரிவித்துள்ளார்.

இந்திய அணி வங்கதேசத்திற்கு சுற்றுப்பயணம் மேற்கொண்டு ஒரு டெஸ்ட் மற்றும் 3 ஒருநாள் ஆட்டத்தில் விளையாடுகிறது. டெஸ்ட் போட்டியில் இருந்து டோனி ஓய்வு பெற்று விட்டதால் அவருக்கு பதிலாக கோஹ்லி இந்திய அணியை வழிநடத்துகிறார்.

இது தொடர்பாக ரஹானே கூறுகையில், டோனி டெஸ்ட் போட்டிகளில் விளையாடவில்லை என்றாலும் ஒருநாள் போட்டிகளில் அவரின் கீழ் விளையாடுவது சிறப்பான தருணமாக இருக்கும். நாங்கள் டோனியிடம் இருந்து அதிகமாக கற்றுக் கொண்டோம். அவர் எங்கள் மீது எங்களுக்கு நம்பிக்கையை ஏற்படுத்தினார்.

ஒருநாள் போட்டி, டெஸ்ட் போட்டி அல்லது டி20 போட்டி என அனைத்து போட்டிகளிலும் எப்படி சூழ்நிலைக்கு ஏற்றார் போல் செயலாற்ற வேண்டும் என்பதை கற்றுக்கொடுத்தார் என்று கூறியுள்ளார்.