20 ஐ வைத்து பிரதமர் இனவாதம் செய்கிறார் பிரபா கணேசன் குற்றச்சாட்டு
தேர்தல்முறை மாற்றத்தின் மூலமாக சிறுபான்மை பிரதிநிதித்துவத்தை குறைப்பதற்கான வேலைத்திட்டத்தை பிரதமர் ரணில் விக்கிரமசிங்க மேற்கொண்டு வருவதாக கொழும்பு மாவட்ட பாராளுமன்ற உறுப்பினர் பிரபா கணேசன் தெரிவித்துள்ளார்.
இது தொடர்பில் அவர் விடுத்துள்ள அறிக்கையில் மேலும் தெரிவித்துள்ளதாவது;
20ஆவது திருத்த சட்டத்தின் மூலம் தனது தொகுதிக்கு பொறுப்புக் கூறக்கூடிய பிரதிநிதித்துவத்தைப் பெற்றுக் கொள்ளலாம். இதன் மூலம் அனைத்து தொகுதிகளும் அபிவிருத்தி செய்யப்படுவது கட்டாயமாக்கப்படும்.
விருப்புவாக்கு முறை ஒழிக்கப்படுவதன் மூலம் அரசியல் குரோதங்கள் கலையப்படும். அது மட்டுமின்றி தொகுதியிலேயே பிரசாரம் செய்வதற்கு பாரிய பணவிரயம் செய்ய வேண்டிய அவசியம் இருக்காது. இதன் மூலம் பணம் படைத்தவர்களுக்குத் தான் அரசியல் என்ற நிலை மாற்றப்படும். எது எவ்வாறாயினும் சிறுபான்மை பிரதிநிதித்துவத்திற்கு பாதிப்பு ஏற்படாத வகையில் இத்திருத்த சட்டம் உள்வாங்கப்பட வேண்டும். இதற்காகவே சிறுபான்மை மக்களின் கட்சிகளுக்கும் சிறிய கட்சிகளுக்கும் அழைப்பு விடுத்து இது சம்பந்தமான பேச்சுவார்த்தையை ஆரம்பிப்பதற்கு முன்னோடியாக இருந்து செயல்பட்டேன்.
அதன் மூலமாக பல விதமான கலந்துரையாடல்கள் இடம்பெற்றன. ஸ்ரீலங்கா சுதந்திர கட்சிக்கும் ஐக்கிய தேசிய கட்சிக்கும் சிறுபான்மை மக்களின் பிரதிநிதித்துவம் சம்பந்தமான அக்கறையை தோற்றுவித்தோம்.
பாராளுமன்றத்தில் பெருபான்மை கொண்ட கட்சியான ஐக்கிய மக்கள் சுதந்திர கூட்டமைப்பின் 20ஆவது திருத்தம் சம்பந்தமான பல கலந்துரையாடல்களில் கலந்து கொண்டு சிறுபான்மை மக்களுக்கு சாதகமான வரைபு ஒன்றை தயாரித்திருந்தோம். திங்கட்கிழமை இடம்பெற்ற அமைச்சரவை கூட்டத்தில் இவ்வரைபை சமர்ப்பிக்கவிருந்த போதும் ஐக்கிய தேசிய கட்சி தான் தயாரித்த வரைபை அமைச்சரவையில் சமர்ப்பித்தது. இவர்களது யோசனையின்படி 160 தொகுதிகள் 125ஆக குறைக்கப்பட வேண்டும் என்றும் 75 பேர் மாவட்ட ரீதியாகவும் 25 பேர் தேசிய பட்டியலிலும் தெரிவு செய்யப்படுவார்கள் என்றும் குறிப்பிடப்பட்டுள்ளது
160 தேர்தல் தொகுதிகள் 125ஆக குறைக்கப்படும் போது வாக்காளர்களின் எண்ணிக்கையும் நிலப்பரப்பும் கணக்கில் எடுக்கப்படும். இப்படி புதிதாக கணிக்கப்படும் போது ஒரு தொகுதிக்கு ஒரு இலட்சத்து இருபதாயிரம் வாக்காளர்கள் தேவைப்படுகிறார்கள்.
யாழ் மாவட்டத்தில் இன்றைய வாக்காளர் தொகுதியின்படி பதினொரு தொகுதிகள் நான்கு அல்லது ஐந்து தொகுதிகளாக குறைக்கப்படும் அபாயம் உள்ளது. அது மட்டுமல்ல நுவரெலியா மாவட்டத்திலும் இவ்வாறானதொரு நிலைமை ஏற்படும். கொழும்பு மாநகரத்திற்குள்ளும் கொழும்பு மேற்கு பொரளை போன்ற தொகுதிகள் ஒரு தொகுதியாக மாற்றப்படும் சாத்தியம் இருக்கிறது.
இதன் மூலம் சிறுபான்மை மக்களுக்கு பாரிய பாதிப்புகள் ஏற்படவிருக்கின்றது. இது சம்பந்தமாக செவ்வாய்க்கிழமை இடம்பெற்ற ஸ்ரீலங்கா சுதந்திர கட்சி தலைவர்கள் கூட்டத்திலும் குழு கூட்டத்திலும் எமது அதிருப்தியை நாம் தெரிவிதத்திருந்தோம். இதனை ஏற்றுக் கொண்ட அமைச்சர் ராஜித சேனாரத்ண ஹெலஉறுமய தலைவர் ரத்ன தேரர் இருவரும் ஏற்றுக் கொண்டார்கள்.
பிரதமர் ரணில் விக்கிரமசிங்கவின் சிறுபான்மை மக்களுக்கு எதிரான இவ்வாறான செயல்பாடுகளுக்கு தாம் ஒரு போதும் துணை போகப் போவதில்லை என அமைச்சர் ராஜித சேனாரத்ண குறிப்பிட்டார். அது மட்டுமல்ல தொகுதிகளை 125ஆக குறைக்கும் யோசனையை பிரதமர் முன் வைக்கும் பொழுது அமைச்சர்களான ஹக்கீம், ரிசாட் பதியுதீன், திகாம்பரம் போன்றவர்கள் வாய்மூடி மௌணித்திருந்ததாகவும் இதனை தான் பகிரங்கப் படுத்துவதாகவும் குழு கூட்டத்தின் போது அமைச்சர் ராஜித்த சேனாரத்ண தெரிவித்தார். இதனை பார்க்கும் போது சிறுபான்மை அமைச்சர்கள் தமிழ் ஊடகங்களுக்கு சொல்வதொன்று அமைச்சரவையில் நடந்து கொள்வது வேறொன்றாக இருக்கின்றது.
இருப்பினும் சிறுபான்மை கட்சிகளின் எதிர்ப்பை ஏற்படுத்தி 20ஆவது திருத்த சட்டத்தை கொண்டுவராமல் தடுப்பதற்கு பிரதமர் ரணில் விக்கிரமசிங்க வேடம் போடுகிறாரா என்பது கேள்விக்குறியாக இருக்கிறது.
பிரதமர் ரணில் விக்கிரமசிங்கவின் இப்புதிய ஆலோசனை நடைமுறைப்படுத்தப் படுமாயின் சிறுபான்மை பிரதிநிதித்துவம் பாரியளவில் பாதிக்கப்படும். கடந்த சில நாட்களாக 20ஆவது திருத்த சட்டத்தை வைத்து கலந்துரையாடல் நடத்துகின்றோம் என்று ஊடக விளம்பரத்தை தேடிக் கொண்ட ஐக்கிய தேசிய கட்சியின் தமிழ் முஸ்லிம் கட்சி தலைவர்கள் இப்பொழுது வாய்மூடி மௌனித்திருப்பது ஏன் என கேட்க விரும்புகின்றேன்.
