சிறுபான்மை இனங்கள் மூலம் ஏற்பட்ட ஜனநாயக புரட்சி பாதுகாக்கப்படவேண்டும்
ஆட்சிமாற்றத்தின் பின்னரான காலத்தில் சிறுபான்மை கட்சிகள் அனைத்தும் ஒன்றுபட்டு நிற்கவேண்டிய தேவை அதிகமாக உள்ளது. சிறுபான்மையினரின் மூலம் ஏற்பட்ட ஜனநாயக புரட்சி பாதுகாக்கப்படவேண்டுமென தமிழ்த் தேசியக் கூட்டமைப்பின் பாராளுமன்ற உறுப்பினரும் இலங்கை தமிழரசுக் கட்சியின் தலைவருமான மாவை சேனாதிராஜா தெரிவித்தார்.
தேசிய நீர் வழங்கல் வடிகாலமைப்புச் சபையின் யாழ். பிராந்தியத்திற்கான கட்டடத் திறப்பு விழா நிகழ்வில் கலந்து கொண்டதன் பின்னர் உரையாற்றுகையிலேயே மேற்கண்டவாறு தெரிவித்தார்.
இது தொடர்பில் அவர் மேலும் தெரிவிக்கையில்,
தமிழ், முஸ்லிம், மலையக சமூகங்கள் ஒன்றிணைந்தே புதிய அரசாங்கத்தை ஆட்சி பீடத்தில் அமர்த்தின. தற்போதைய நிலையில் நாம் அனைவரும் ஒன்றிணைந்து நின்றே மக்களின் பிரச்சினைகள் தொடர்பாக உரிய தீர்வைப்பெற்றுக் கொள்ள முடியும். ஆகவே, சிறுபான்மை தரப்புக்கள் ஒன்றிணைந்து செயற்படுவதே சிறுபான்மை மக்களின் எதிர்காலத்திற்குச் சிறந்ததாக அமையும்.
குடா நாட்டைப் பொறுத்தவரை குடிநீர் தொடர்பில் பல்வேறு பிரச்சினைகள் காணப்படுகின்றன. அவ்வாறான நிலையில் இப்புதிய கட்டடம் தோற்றம் பெற்றமை மகிழ்ச்சி அளிப்பதுடன் குடாநாட்டு மக்களின் நீர்ப் பிரச்சினைக்கு அமைச்சர் ரவூப் ஹக்கீம் உரிய நடவடிக்கைகளை எடுத்து தீர்வினை வழங்குவார் என்ற நம்பிக்கையும் எமக்கு உள்ளது.
அத்துடன் வடக்கில் யுத்தத்தின் பின்னரான சூழ்நிலையில் வடிகாலமைப்புக்களை மேம்படுத்தல், மழை நீர் சேகரிப்பு போன்ற நிகழ்ச்சித் திட்டங்களை மாகாண சபை, உள்ளூராட்சி மன்றங்களூடாக முன்னெடுக்கவேண்டிய தேவை காணப்படுகின்றது.
ஆகவே, இவற்றை ஆவன செய்தே உரிய நடவடிக்கைகளை குறித்த அமைச்சு மேற்கொள்ளும் என்ற எதிர்பார்ப்பு எமக்குள்ளது. இதேவேளை, தற்பொழுது 20 ஆவது திருத்தச் சட்டம் தொடர்பில் பல்வேறு கருத்துக்கள் முன்வைக்கப்படுகின்றன. எவ்வாறாயினும் சிறுபான்மை மக்களின் ஆதரவுடன் ஏற்பட்ட ஜனநாயக புரட்சி எதிர்காலத்திலும் பாதுகாக்கப்பட்டு தேசிய அரசு தொடரவேண்டும். ஆகவே, சிறுபான்மை இனங்களை, கட்சிகளைப் பாதிக்காத வகையில் புதிய ஆட்சியாளர்கள் செயற்பாடுகளை முன்னெடுக்க-வேண்டுமென்றார்.
