இலங்கை ஊடாக ஆயுதங்களைப் பெறும் நக்ஸல்கள்?
நக்ஸல்கள் இலங்கையின் ஊடாக அதி நவீன ஆயுதங்களை கடத்தி வருவதாக வௌியான தகவல்களையடுத்து, இந்திய மத்திய உளவுத்துறையினர் விரிவான விசாரணைகளை ஆரம்பித்துள்ளனர்.
முன்னதாக தமிழீழ விடுதலைப் புலிகளுக்கு ஆயுதங்களை வழங்கியவர்கள் என சந்தேகிக்கப்படுபவர்களே இவ்வாறு இந்திய நக்ஸல் தீவிரவாதிகளுக்கும் ஆயுதங்களை வழங்குவதாக தகவல் கிடைத்துள்ளதாக இந்திய மத்திய உளவுத்துறை கூறியுள்ளது.
சீனாவில் தயாரிக்கப்பட்ட ஆயுதங்கள் நேபாளம் மற்றும் மியன்மார் ஊடாக நக்ஸல்கள் பெற்றுக் கொள்வது ஆதாரங்களுடன் உறுதியாகியுள்ளதாகத் தெரிவிக்கப்படுகிறது. எனினும் தற்போது இலங்கை கடல் மார்க்கத்தின் மற்றுமொரு புதிய வழியின் ஊடாகவும் ஆயுதங்களை கடத்தப்படுவதாக குற்றம் சுமத்தப்பட்டுள்ளது.
இவ்வாறான ஆயுதங்கள் நக்ஸல் தீவிரவாதிகளுக்கு கிடைக்க பெறுவதினால் பாரியளவு ஆபத்துக்கள் ஏற்படக்கூடும் என இந்திய புலனாய்வு அமைப்பு எச்சரிக்கை விடுத்துள்ளது. நக்சலைட் போராளிகளுக்கு நிதியும் ஆயுதங்களும் கிடைத்து வருவது பாதுகாப்பு படையினருக்கு பிரச்சினைகளை ஏற்படுத்தும் என சிரேஷ்ட இந்திய புலனாய்வு அதிகாரி ஒருவர் கூறியுள்ளார்.
