அடுத்த ஆண்டுக்குள் இனப்பிரச்சினைக்குத் தீர்வு ; யாழில் சம்பந்தன் சூளுரை
நீண்ட காலமாக இலங்கையில் நிலவிவரும் இனப்பிரச்சினைக்கு அடுத்த ஆண்டுக்குள் அரசியல் தீர்வு எட்டப்படும் ஒரு சூழல் உருவாகும் என எதிர்க்கட்சித் தலைவரும் தமிழ்த்தேசியக் கூட்டமைப்பின் தலைவருமான இரா.சம்பந்தன் தெரிவித்துள்ளார்.
தமிழ்த் தேசியக் கூட்டமைப்பின் தலைவர் இரா.சம்பந்தன் எதிர்க்கட்சி தலைவர் பதவியை பெற்றபின்னர் யாழ்ப்பாணத்திற்கான முதல் விஜயத்தை நேற்றையதினம் மேற்கொண்டார்.
அவர் யாழ். புனித பத்திரிசியார் கல்லூரியின் நிகழ்வொன்றில் பிரதம விருந்தினராகக் கலந்துகொண்டு உரையாற்றுகையிலேயே மேற்கண்டவாறு தெரிவித்தார்.
அவர் மேலும் உரையாற்றியதாவது.
நாம் ஒரு அரசியல் தீர்வினை விரைவில் எட்ட வேண்டும். அத்தீர்வு எம் மக்களுக்கு ஏற்புடையதாகவும் நிரந்தரமானதீர்வாகவும் அமையவேண்டும். அத்துடன் அதனை நடைமுறைப்படுத்தக்கூடிய தீர்வாகவும் இருக்கவேண்டும் மேலும் எமதுமக்களின் இறைமையை சுதந்திரமாகக் கொண்ட தீர்வாகவும் காணப்படவேண்டும்.
இது தொடர்பில் நாங்கள் மிகவும் நிதானமாகச் செயற்படுகிறோம். எம்மக்களுக்கு ஏற்புடையதான தீர்வை வழங்கும்வரை அதிலிருந்து நாங்கள் விலகவும் மக்களைக் கைவிடவும் மாட்டோம்.
அரசியலுக்குள் என்னை கொண்டுவந்தவர் தந்தை செல்வாவாகும்.அவர் இல்லையென்றால் நான் அரசியலுக்குள் வந்திருக்கமுடியாது. அவர் எப்போதும் எனக்குக் கூறுவார் மிகவும் நிதானமாகச் செயற்படவேண்டும்.
மேலும் எமது மக்களது பிரச்சினைகளுக்கு ஓர் அரசியல் தீர்வினைப் பெற்று மக்கள் சுதந்திரமாகவும் நிம்மதியாகவும் சுயமரியாதையுடனும் பாதுகாப்பாகவும் வாழக்கூடிய நிலைமையை ஏற்படுத்தவேண்டும். ஆகையால் ஓர் தீர்வை எட்டுவதில் எங்களுக்கும் ஓர் பங்கு இருக்கின்றது அந்தப் பங்களிப்பை வழங்கவேண்டுமென தந்தை செல்வா என்னிடம் கூறியிருந்தார்.
எனவே இப்போதும் தந்தை செல்வாவின் சிந்தனைகளிலும் கருத்துக்களிலும் செயற்பட்டுவருகிறோம். எவ்வாறு மக்களை தந்தை செல்வா கைவிடாமல் தீர்வுக்காகப் போராடினாரோ அவ்வாறே நாமும் போராடுவோம்.
சர்வதேசத்தின் நிலைப்பாடு
தற்போது முன்னெப்போதும் இல்லாத அளவுக்கு சர்வதேச சமூகம் எமது பிரச்சினையில் அதிகூடிய கவனம் எடுத்துவந்துள்ளது. அதன் அடிப்படையில்தான் மனித உரிமைப் பேரவை கடந்த 2012, 2013, 2014 ஆம் ஆண்டுகளில் போர்க்குற்ற விசாரணைகள் தொடர்பில் தீர்மானங்களை நிறைவேற்றியுள்ளது.
அவற்றை இலங்கை அரசாங்கம் எதிர்த்திருந்தன. அவ்வாறான சூழலிலும் தீர்மானங்கள் பெரும்பான்மை வாக்கினால் நிறைவேற்றப்பட்டது. நேற்று ஒரு தீர்மானம் ஐ.நா. மனித உரிமை சபையில் நிறைவேற்றப்பட்டது. அதிலுள்ள விடயங்களை அமுல்படுத்துவதற்கு எம்மாலான சகல நடவடிக்கைகளையும் மேற்கொள்வோம். இதனை எனக்கு எதிர்க்கட்சித்தலைவர் பதவி கிடைத்த காரணத்தால் கூறவில்லை. அந்தப் பதவி கிடைத்தாலும் கிடைக்காவிட்டாலும் அதனை அமுல்படுத்த கடுமையான நடவடிக்கையை மேற்கொண்டிருப்போம்.
எதிர்க்கட்சித் தலைவர் பதவி
வடக்குக் கிழக்கிலுள்ள மக்கள் ஒற்றுமையாக எமது கட்சியை ஆதரித்து .பெரும்பான்மையாக வாக்களித்ததன் அடிப்படையிலும் அவர்களின் ஜனநாயக ரீதியான முடிவின் அடிப்படையிலும் கிடைக்கப்பெற்ற பதவியே எதிர்க்கட்சிப்பதவியாகும். ஆகவே இப் பதவியானது எனக்கான பதவியன்று இது மக்களுடைய பதவியே. எனவே அவ்வாறான பதவியை மக்களின் பிரச்சினைகளை தீர்க்கும் விதத்தில் நான் பயன்படுத்துவேன்.
எதிர்க்கட்சிப் பதவியில்லாத முன்னைய காலத்தில் கூட வெளிநாட்டுத் தலைவர்கள் முக்கிய பிரதிநிதிகள் அதேபோன்று நாங்கள் வெளிநாடுகளுக்குச் செல்லும்போது தலைவர்கள் பிரதி நிதிகள் ஆகியோரைச் சந்திப்பதில் எமக்கு கடினம் இருந்ததில்லை. ஏனெனில் எம்மை சந்தித்து எமதுமக்களுடைய உண்மையான நிலையை அறிந்துகொள்வது தமது கடமை என்று வெளி நாட் டுத்தலைவர்கள் எண்ணினார்கள் என்றார்.
