"குதிரை ஓடிய பின்னர் லயத்தை பூட்டியது போன்றதே மைத்திரியின் அறிவிப்பு''
“குதிரை ஓடிய பின்னர் லயத்தை பூட்டியது” போன்று மஹிந்த தொடர்பில் ஜனாதிபதி மைத்திரிபால சிறிசேன இறுதி நேரத்தில் அறிவிப்பு விடுத்துள்ளார். இது காலம் தாமதித்த முடிவு என ஜே.வி.பி.யின் பொதுச்செயலாளர் ரில்வின் சில்வா தெரிவித்தார்.
காலம் தாழ்த்தியாவது ஜனாதிபதி சரியான முடிவை எடுத்துள்ளார். இதனை வரவேற்கின்றோம் என்றும் அவர் தெரிவித்தார். இது தொடர்பாக ரில்வின் சில்வா மேலும் தெரிவிக்கையில் மஹிந்த ராஜபக் ஷ விற்கும் திருடர் கூட்டத்திற்கும் தேர்தலில் போட்டியிடுவதற்கான வேட்புமனு வழங்காமல் ஜனாதிபதி தவிர்த்திருக்க வேண்டும்.
ஸ்ரீலங்கா சுதந்திரக் கட்சியின் தலைவராக இந்த முடிவை தைரியத்துடன் அன்று மேற்கொண்டிருந்தால் மஹிந்தவும் அவரது ஆதரவு அணியும் இந்தளவிற்கு வளர்ச்சி கண்டிருக்காது. அந்த இடத்தில் ஜனாதிபதி விட்ட தவறுதான் மஹிந்தவுக்கு பிரசாரத்தை தேடிக் கொடுத்தது.
அத்தோடு 100 நாட்களின் பின்னர் பாராளுமன்றத்தை கலைத்து தேர்தல் நடத்தியிருந்தாலும் இன்றைய நிலை ஏற்பட்டிருக்காது. ஜனாதிபதித் தேர்தலில் மக்களால் நிராகரிக்கப்பட்டு தோல்வியடைந்த மஹிந்த செல்லாக் காசாகவே இருந்தார். அப்போதே கடும் தீர்மானங்களை கட்சி மட்டத்தில் ஜனாதிபதி எடுத்திருக்க வேண்டும்.
இன்று “குதிரை ஓடிய பின்னர் லயத்தை பூட்டியது” போன்று ஜனாதிபதி செயற்பட்டுள்ளார். காலம் கடந்தாவது ஜனாதிபதிக்கு ஞானம் பிறந்துள்ளதை வரவேற்கின்றோம் என்றும் ரில்வின் சில்வா தெரிவித்தார்.
